من غير لخبطة.. زتونة قرار وزارة التربية والتعليم لطلاب الثانوية
ناقش مجلس الوزراء برئاسة المهندس شريف إسماعيل، اليوم الأربعاء، مشكلة تسريب امتحانات الثانوية العامة عشان يحاولوا يلاقوا حل للأزمة دي، وبعد الاجتماع أعلن وزير التربية والتعليم، الدكتور الهلالي الشربيني، 3 قرارات جديدة.
القرارات دي كانت غامضة شوية، وعملت جدل بين الطلاب، وكتير منهم موضحش ليه مفهوم القرارات دي.
«شبابيك» قرر يبسطلك الموضوع ويعرفك إيه القرارات دي:
الحكومة احتارت في موضوع تسريب أسئلة الامتحانات، فقررت تعمل لجنة مشكلة من 4 وزارات «العدل والدفاع والتربية والتعليم والداخلية» عشان يشوفوا إيه المشكلة دي، ويعملوا طريقة جديدة تسمح بوصول الامتحانات للجان من غير ما تتسرب بنماذج الإجابة بتاعتها زي ما حصل في امتحان الدين، وده هيتطبق من السنة اللي جاية، يعني طلاب السنادي براءة.
طيب وامتحان العربي؟
الوزير قال في المؤتمر إنهم هيراجعوا نسب النجاح في مادة اللغة العربية من خلال تصحيح 5% من أوراق الإجابات، وهيقارنوها بنسب نجاح السنوات اللي فاتت، وهيشوفوا معدل النجاح والدرجات عامل إيه، عشان يتأكدوا إن التسريبات أثرت على الدرجات ولا مأثرتش، وهل حصل خلل في منظومة الامتحانات ولا لأ.
إيه بقى موضوع تغيير القبول بالجامعات؟
وزارة التربية والتعليم أعلنت إنه لازم يغيروا من أسلوب الامتحانات، يعني ممكن يعملوا نظام اختبار القرات مثلا وتدريبات عملية، وكمان هيدرسوا تغيير نظام القبول بالجامعات، يعني ممكن ميكونش العامل الوحيد في دخول الكلية هو درجاتك وبس، لا! ممكن يعملولك اختبار قبول الأول.
والوزير قال إنهم هيقعدوا مع مختصين ويشكلوا لجنة عشان يدرسوا الموضوع ده، والكلام ده هياخد وقت كبير، يعني طلاب السنة دي وممكن اللي بعدها ميطبقش عليهم القرار.
