وأنت بتدور على عروسة حلوة.. خلّي بالك
حينما يفكر الرجال في الزواج، تأخذهم الجلالة فيقعون في فخ المحظور أحيانا، وبدلًا من التروي في هذه الخطوة يسيرون على درب أسلافهم للحصول على مبتغاهم والوصول للبر.
هو أيه البر ده؟.. بر الأهل ولا بر الشهوة؟ أيًا كانت مبرراتك فسنقدم لك وفقًا لاستبيان تم إجرائه على عينة من الشباب المخطوبين والمتزوجين بعض الأخطاء التي قد تقع فيها خلال البحث عن عروسة.
الاختيار بناءً على الأهل
يقول محمد إسماعيل: «محدش يقدر ينكر إن الأهل ليهم دور مهم، بس في الاختيار لازم الدور الأول والأخير يبقى على العريس؛ لإن دي حياته هو، ومش معنى إن أهله شايفين إن البني آدمة دي محترمة وبنت ناس إنه يتجوزها، لازم يكون مقتنع بكل شىء فيها ببساطة لإنها ممكن تكون وهمية بالنسبة لأهله ومفيهاش أي حاجة تعجبه هو».
ويتابع «يا ريت يحط في باله قبل ما يبدأ الخطوة دي إنه هو اللي هيتجوز ويعاشر مش أهله؛ علشان كده لازم يختار بناءً على نفسه مش أهله».
اللي بيحصل بينكو في الخطوبة.. صح ولا غلط؟
التركيز مع الشكل
أما حسن عصام فقال: «مفيش أسوأ من تركيز الولد مع الشكل وهو بيدور على عروسة؛ لإنه لو حاطط في باله إنها لازم تكون جميلة وبيضاء.. إلخ، مش هيعرف يشوف سلبياتها، وجمالها هيخليه مشدود للشكل وبس وناسي الجوهر وأي حاجة تانية».
غير كده هي ممكن كمان تستغل نقطة ضعفه دي وتعمل تصرفات مينفعش إنه يقبلها تمامًا، وفي النهاية حتى لو اتجوزوا وقعدوا فترة، حياته هتبقى قلق وتوتر؛ لإن الست الجميلة فعلًا مرهقة.
تحقيق المتعة الجنسية
محمد عادل كان ليه رأي مختلف: «طول ما الراجل حاطط في دماغه المتعة الجنسية وبس كوسيلة للجواز، ده هيعمله مشاكل كتير مع مراته في المستقبل؛ لإنها هتحس إنها مجرد وسيلة بيفرغ فيها شهوته ودي آخرتها الطلاق أو الخيانة أكيد».
ولو محصلش طلاق فدائمًا هيكون فيه خناق لإنها مش شايفة منه أي حب أو احتواء، فبالتالي هتحاول تعبر عن المشاكل دي بالزعيق والخناق.
أوعي تخبي عليه حاجة زي كده وانتو مخطوبين
مستوى تعليمي أقل
أحمد ياسر حذر: «للأسف في ناس كتير حواليا بقت بتركز وهي بتدور على عروسة إنها تكون مستوى تعليمي أقل بالرغم أنه بيكون مستوى عالي في التعليم، ولما جيت سألت واحد فيهم عن السبب قالي أنه هيعرف يسيطر عليها أكثر».
ده غير إحساسه بإنه الأقوى وهو معاها، المشكلة إن ده تفكير عدد كبير من الشباب دلوقتي بالرغم إن ده أول ما هيأثر هيأثر على ولاده اللي مش هتعرف تعلمهم.
المركز الاجتماعي
وائل ممدوح كان شايف: «طبعًا المركز الاجتماعي شىء مهم بس يا ترى إنت لما بتختار تتجوز المركز هو اللي بيكمل معاك حياته ولا البنت اللي ممكن يكون الناس بتستحملها علشان مركزها وبس لإنها في الحقيقة شخصية مغرورة».
ويضيف «للأسف النقطة دي بهتم بيها شباب كتير وبينسوا حاجات تانية بتخلي الجواز حتى لو كمل يبقى ميت وهو حي زي أخلاقها زي ثقافتها زي أسلوبها، وتلاقيه بعد الجواز يقول أنا غلطان».
التعميم
علاء محمود يقول: «شباب كتير بتبقى مش واخدة بالها إن عندها مشكلة وبتطبقها على نفسها وعلى اللي حواليهم زي بالظبط نظرية التعميم اللي بتخلي الولد شايف البنات كلها مثلًا واحد أو إنهم ميستاهلوش الحب».
ويضيف «يعني مثلًا كان في حد أعرفه مرتبط بواحدة وانفصلوا بسبب مشاكل مادية لإنها رفضت تستناه وده خلاه يقرر إنه يوقف الحب ويتجوز أي واحدة بتحبه وده حصل، بس بعد كده لقى نفسه تايه وبيظلمها معاه فانفصل بعد 4 شهور».
للبنات فقط.. هتوقعيه في حبك إزاي؟
