يا ترى تتجوز مين؟.. اللي بتحبك ولا اللي بتحبها
هو لم يعد كما كان في السابق، الأيام تمر عليه كأنها شهور والشهور سنوات، يحاول مرارًا وتكرارًا نسيان قصة حبه الفاشل لكن الظروف تعانده وتتفنن في تذكيره كل يوم بما لا يريد، ليجد نفسه في النهاية رهينة عقله الذي بات راهبًا في محراب الحب.
ولكن ماذا عن زميلته التي تعشقه؟ أيحاول بها نسيان السابقة أم يُصلح قلبه ويبدأ من جديد؟، حقًا الإجابة في غاية الصعوبة ولكن مع هذا التقرير والتجارب الحية، قد تجد ضالتك إذا كنت في موقفه.
الفشل بيقوي
يحكي «حسام. ز»: «صحيح أنا مريت بتجربة وحشة في حياتي لما خطبت اللي بحبها واللي اكتشفت أنها متطلعة زيادة عن اللزوم، كل يوم كانت طلبتها بتزيد من غير ما يكون فارق معاها أنا هقدر أجيب الحاجة دي ولا لأ، بس لما عرفتها إني مش هقدر أجيب مواصفات الشقة اللي بتحلم بيها هي وأهلها وإني هعمل اللي هقدر عليه طلبت الانفصال».
بعدها اتفاجئ حسام إنها «اتخطبت لحد شغال في بنك أجنبي».
كره الحب
تقول «بسمة. ص»: «قبل ما ارتبط من كام شهر كنت مقتنعة جدًا إن الاتنين لازم يحبوا بعض مش واحد اه والتاني لا، بس بعد ما اتقدملي بني آدم بحجة إنه بيحبني وعاوز يقابل بابا علشان ارتباطنا يبقى رسمي، جت وفاة والده ووالدته في حادثة عربية قلبت الموازين وخلته يبعد فترة ومكنتش عارفة أوصله».
وتتابع «فضل على الحال ده شهور وبعدها اكتشفت إنه كذاب وإن باباه ومامته عايشين بعد كام شهر في كذب، في الوقت ده عرفت إنك تاخد اللي بيحبك هيبقى أفضل بكتير من اللي بتحبه أو حتى اللي في بينكم حب متبادل».
يعني إيه استشاري العلاقات الأسرية؟ وهيعملك إيه؟
الحب من طرفين
«رضا. م» يقول: «برغم إني كنت مرتبط ببني آدمة كنا إحنا الاتنين بنحب بعض، بس لما لقيتها بتفضل دراستها ومستقبلها على كل حاجة حتى في عز أوقات احتياجي ليها، وده فعلًا حصل لما طلبتها في مرة وقولتلها أنا جايلك مخصوص وأنا أصلًا مش معاها في نفس البلد لقيتها بتقولي لا لإني مشغولة وواحدة واحدة هي اللي بعدت، في الوقت ده قررت أبعد أنا كمان بس لسه عاوز اللي بتحبني واللي بحبها».
بنتعلم من الغلط
«سناء.ج» تقول: «المفروض إن أي واحدة في مكاني بعد ما ترتبط فترة طويلة من شخص المفروض إنه عمل كل حاجة علشان يرضيها ويثبتلها إنه بيحبها، وفجأة تلاقيه بعد ما كان مقرر وقت معين ينزل فيه من السفر علشان يطلبني من أهلي لدرجة إني عرفت ناس معينة من أهلي، يتهرب مني وقافل تمامًا وسائل الاتصال بيه، طبيعي إني أقول لأ ولازم هو يحبني أكتر بس أنا عارفة إني اخترت الشخص الغلط ودي كانت النتيجة علشان كده لازم الاتنين يكونوا بيحبوا بعض».
أوعي تخبي عليه حاجة زي كده وانتو مخطوبين
لازم يحبك
«سمر. خ» متزوجة: «لما اتخطبتله كنت عارفة إنه مبيحبنيش وإنها مجرد جوازة عنده، بس قولت لنفسي إني هقدر اغيره وأخليه يحبني، في الوقت ده أنا كنت ماشية بمبدأ خدي اللي بتحبيه لإنك هتقدري تخليه يحبك بأسلوبك، بس للأسف بعد الجواز الحياة كانت كلها مشاكل وخناقات لدرجة إنه حتى مبيحتفلش بعيد جوازنا ولا ميلادي أنا اللي بحتفل بس، علشان كده لو السنين رجعت بيا كنت هختار أكيد اللي بيحبني حتى لو أنا مبحبهوش المهم إني مكررش نفس الغلط تاني».
فشل الحب
«إيمان. ح»: «بعد ما اتخرجت من الجامعة بفترة، لقيت في واحد بيحاول يتواصل معايا عن طريق الفيس بحجة إنه عاوزني في حاجات ليها علاقة بشغلي، وفعلًا كان في تواصل معاه وعرفته الحاجات اللي كان عاوزها بس لقيت اهتمامه بقى زايد شوية بشوية لحد ما قالي بصراحة إنه بيحبني وعاوزنا نرتبط في الوقت ده أنا كنت اتشديت ليه، وقعدنا فترة كانت من أسعد حياتي بس اللي نهى الموضوع إني اكتشفت إنه متجوز، فطبعًا الموضوع انتهى، من بعد الموضوع ده قررت إن اللي هتجوزوا لازم يكون بيحبني وبيحبني قوي كمان وده فعلا اللي حصل دلوقتي».
في النهاية مهما كانت تجربتك غاية في السوء، حاول الاستفادة منها وتذكر دائمًا أن ما ضاع منك، ترك مكانا ليحل محله ما هو أحسن منه.
