للمغتربين.. 5 أكلات سهلة تعملها وأنت واقف
اتكتبت عليك الغربة؟ مش لاقي حد "يستتك" ويعملك اللي أنت عايزه؟ بتخاف من وقفة المطبخ ولا بتعرف تسلق بيضة أصلا؟.. متخفش احنا في ضهرك وهنقولك على 5 أكلات سريعة هتعملها وأنت واقف في أقل من ربع ساعة.
الراعي الرسمي
سنة أولى جامعة، الراعى الرسمي لأكل المغتربين «الجبنة».. بعد ما تخلص الكلية أو شغلك أول حاجة هتقابلك هو «السوبر ماركت» تشتري علبة جبنة كبيرة وكيس شيبسي، ولو الميزانية تسمح ربع «لنشون» مش هيخسر؛ وبعد روتين الجبنة اليومي تجيلك «الإندومي» وهي الحل الأمثل والبديل السريع للجبنة لو زهقت يعني.
افتكس في الأكل
إنت ممكن تعمل أكلات خفيفة، وتحس نفسك ولا أحسن شيف زي الأكلات دي:
مكرونة بالسوسيس
سواء كنت بتحب السوسيس أو لأ طعمه هيكون متغير وحلو، هتحطه مع مكرونة بالصلصة وهتحس إنك بتاكل حاجة لا هي لحمة ولا فراخ.
املأ الحلة بمية لحد نصها، وخليها تغلي 5 دقايق وبعدها حط المكرونة وخد بالك منها وأنت بتقلب، وتحط عليها معلقة زيت، وبعد حوالي 10 دقايق هتلاقيها استوت.
طاسة صغيرة فيها معلقتين زيت أو سمنة، وقطع بصل لحتت صغيرة أو توم، وفي ناس بتحب الاتنين مع بعض، المهم حطهم على النار مع الزيت وقلبهم شوية لحد ما يدبلو وبعدها جيب الصلصة الجاهزة أو عصير الطماطم.
خد بالك إن عصير الطماطم لازم يتسبك الأول يعني هتحطه مع البصل وتحط عليه التوابل كلها «ملح، وفلفل، ومرقة لو حابب، وشوية سكر صغيرين عشان يعدلو حموضة الطماطم» وهتسبهم شوية لحد ما تنشف وتبقي صلصلة، لكن لو جاهزة مش هتاخد أكتر من دقيقتين.
هتصفي المكرونة وتسيبها تبرد شوية، هتقطع السوسيس للحجم إللي عاوزه وبعدها هتضيفه للصلصة وممكن تقطع فلفل رومي معاها وحط المكرونة عليهم وبالهنا.
مكرونة بالسجق البلدي
نفس طريقة المكرونة إللي قلنا عليها؛ أما السجق ليه طريقيتين: أول طريقة، تحمره بس بنفس حجمه إللي اشتريته بيه وتقطع عليه بقدونس وفلف رومي وتحطة جنب المكرونة بصلصلة وخلاص.
تاني طريقة، ممكن بنفس طريقة المكرونة إللي قلنا تقطع السجق بدل السوسيس وتحطه معاها.
في حاجة بقي، المكرونة ممكن تأكلها بصلصلة أو محمرة أو بطريقة تانية خالص، بعد ما سلقت المكرونة ممكن تحط في الحلة سمنة أو زيت يعني معلقتين كده بس كبار شوية وبعدها تحط المكرونة وعليها التوابل المعتادة ملح وفلف أسود وتقلبها قلبتين على النار هتاخد لون دهبي فاتح قوي وهيكون طعمها حلو.
التونة
ليك بالتونة أكتر من أكلة. مكرونة بالتونة، بعد سلق المكرونة حط التونة عليها وقلبها كويس وعليها شوية فلفل أسود وفي ناس بتحب تحط زيتون أو شيبسي.
أرز بالتونة، كوباية رز بعد ما تغسلها كويس هتحط على النار معلقة زيت أو سمنة وبعدها هتحطلهم الرز وعليها كوبايتين مية والنار لسه عالية هيغلي الرز غلوتين وبعدين توطي النار وإنت حاطط غطي الحلة.. هيستوي، اغرفه في الطبق وبعدها صفي التونة خالص من الزيت وحطها عليه وقلب وعيش.
وممكن تعمل التونة ساندوتش بالخص والمايونيز والكاتشب بيكون حلو وسهل بس المهم قلل الزيت إللي بيكون جاي معاها.
أرز بطاطس وفراخ
لو جالك وقت زهقت من أكل «النواشف» وعايز الخضار بتاع الست الوالدة والتسبيكة الحلوة هتعمل التالي:
الرز وعرفنا بيتعمل إزاي، فاضل البطاطس والفراخ بقي.. أولا الفراخ هتغسلها كويس وتسلقها زي ما هي وحط عليها ملح وفلف أسود وبصلة صغيرة وطماطم متقطعين أربع ترباع لحد ما تستوي الفراخ.
أو ممكن ولا تسلق ولا تتعب نفسك قطع الفراخ أربعة وتقطع البطاطس شرايح والبصل شرايح برده حطهم فى صنية كبيرة شوية وحط عليهم الملح والفلف ومرقة فورية ومعلقة سمنة كويسة وعليهم الفراخ وشوية مية وسبها تستوي لوحدها.
سلطة فاصوليا، وكبدة. سلطة كلها 5 دقايق على النار وتخلص، وهي كالتالي:
حلة بمية مغلية حط فيها الفاصوليا لحد ما تستوي، بعدها حضر طبق كبير فيه ملح وفلفل أسود وخل وزيت وفلفل أخضر وكمون وبعد ما تستوي الفاصوليا حطها في الطبق وممكن لو بتحب التوم تحط فص واحد أو اتنين.
أما الكبدة
مفيش أسهل منها؛ طاسة سخنة اغسل الكبدة بمية الحنفية وحط على الطاسة التوم الكتير بمعلقة زيت وبعدها حط الكبدة ومعاها فلفل رومي وملح وفلفل أسود وشطة وقلب كتير وفي الآخر عصرة لمون وبالهنا والشفا.
