الإنجليزية والروسية والصينية.. تعلم لغة ووفر وظيفة
تعرف أن العالم فيه أكتر من 4000 لغة موجودة في الدول والمدن والشعوب والقبائل، لكن في نفس الوقت فيه لغات هي المتصدرة المشهد، يمكن لأن عدد المتحدثين بها كتير، ويمكن لأن الدولة المتحدثة بها دولة قوية ومهيمنة على العالم وبالتالي الناس بتتعلم لغتها، المهم أنك تعرف اللغات الأكتر استخداما في العالم، وتختار لغة تتعلمها، عشان تشتغل في مصر.
- الصينية
تخيل أن اللغة الصينية هي أول لغة على رأس اللغات المنتشرة في العالم، لأن وصل عدد المتحدثين بها لـ 14%من سكان العالم، تقدر تتعلمها في المركز الثقافي الصيني في شارع الهرم بالجيزة، ومركز كونفوشيوس في جامعة القاهرة، وهما أشهر مراكز معتمدة في تعليم اللغة الصينية في مصر.
أوعى تصدق كل واحد يقول اللغة غير مستخدمة في مصر، لأنها مستخدمة ومجالها مفتوح جدا في كل شركات ومكاتب الاستيراد والتصدير، وأغلبها بيعتمد بشكل أساسي على الاستيراد من الصين، وبالتالي محتاجينك تكون المترجم الصيني للشركة، ومرتبك عالي حسب خبرتك وشطارتك ويبدأ من أول 2000 جنيه لفوق جدا، كمان معظم المصانع في مصر تستعين بخبراء وفنيين وعمال صنيين لتركيب ماكينات بتكون في الأصل صينية، وطبيعي محتاجين مترجم يتفاهم معاهم، وعندك فرصة للسفر للصين مع مديرك في أي معرض دولي أو تجاري أو صفقة شغل هناك، وطبعا الإقامة والانتقالات على حساب المكان، وتأخد مرتب تقيل وتتفسح وترجع.
- الإنجليزية
كلنا عايزين نتعلم إنجليزي، ومهما كبرنا وخلصنا مدرسة وجامعة واشتغلنا هندور على دورات تدريبية في الإنجليزي، لأنها تاني أكثر اللغات استخداما في العالم، وهي اللغة الرسمية في إنجلترا والولايات المتحدة ونيوزلاندا وغيرها.
تقدر تتعلم انجليزي في أماكن كتير جدا الجامعة الامريكية، والمركز الثقافي البريطاني، وجامعة القاهرة، ومعهد اللغات للقوات المسلحة، وطبعا مجالات العمل بالإنجليزية كتيرة جدا، يعني أي شركة متعددة الجنسيات بتحتاج الانجليزي بتاعك يكون تمام، ولو حبيت تسافر في أي وقت لأي دولة فرصتك كبيرة جدا.
- الإسبانية
طبعا تلاقي ناس كتير تقول أنها لغة سهلة وجميلة، لكن تعرف أن الإسبانية من اللغات الأكتر استخداما في العالم، وأنه فعلا لغة لذيذة بيتكلمها 6% (حسب اخر إحصائية في 2010) من سكان العالم. تقدر تدرس اسباني في معهد اللغات للقوات المسلحة، والمركز الثقافي الاسباني، وأي مركز كورسات معتمد يدرس لغات مختلفة، ممكن شتغل بيها مرشد سياحي، أو موظف خدمة عملاء في شركة فودافون، أو أوت سورس out sourcing تابعة لفودافون الموجودين ويوم ما تتعب اشتغل مدرس إسباني في مركز تعليمي.
- الهندية
من اللغات المستخدمة بشكل كبير في العالم، لأن الهند نسبة سكانها عالية جدا تصل إلى مليار نسمة، زيادة عليهم الدارسين للهندية وغيرهم، المكان المعتمد لتدريس اللغة الهندية هو مركز مولانا أزاد الثقافي الهندي في وسط البلد. لكن لو هنتكلم على مجال الشغل في اللغة الهندية، ممكن نقول أنه مقتصر في مصر على كونك مترجم حر تبع مكتب ترجمة وبسعر عالي طبعا لأنها لغة نادرة، يعني عدد قليل يعرفها.
- العربية
الغريب أن اللغة العربية رغم أننا فاكرين أنها اللغة الثانية على مستوى العالم إلا أنها اللغة الخامسة، ويصل عدد المتحدثين بها إلى 4% من إجمالي لغات العالم. طبعا العربية لغتنا مش محتاجين نتعلمها أو ندور على شغل فيها يعني.
- الروسية
وصل عدد المتحدثين باللغة الروسية إلى 3% من سكان العالم وفقا لآخر إحصائية عام 2010، ويزيد الإقبال على تعلمها في كل دول العالم، تدرس في أماكن كتير في مصر منها المركز الثقافي الروسي في الدقي، ومعهد اللغات للقوات المسلحة، ومراكز اللغات المعتمدة. الشغل في مجال اللغة الروسية يعني سياحة لأن نسبة السائحين الروس في مصر عالية جدا، كمان الفنادق وشركات السياحة فى شرم الشيخ بتطلب كتير متحدثي الروسية بمبالغ مغرية جدا؟
