رئيس التحرير أحمد متولي
 مش عارف تستفيد بالإجازة؟.. اعرف الطريقة

مش عارف تستفيد بالإجازة؟.. اعرف الطريقة

لو مش بتعرف تستفيد من وقت فراغك في الأجازة، في الموضوع ده هنقولك إزاي تستفيد منه بنصايح خبير التنمية البشرية أحمد محمد كرم.

«كرم» بيقول إن في 4 جوانب في العموم لازم كلهم يتحققوا مع بعض في الحياة عشان يحصل ليك حالة من الاتزان في يومك بحيث متحسش إن عندك وقت فراغ ومش عارف تعمل إيه لأن لو جانب منهم وقع حياتك هيحصل فيها خلل والجوانب دي لازم تبقى نظام أساسي تمشي عليه طول العمر.

الروحاني

وفي الجانب ده عليك إنك تخصص جزء من وقتك في إنك تقرا قصص عن الدين عشان القصص دي هتحفزك إنك تقرب من ربنا أكتر في صلاتك وتنمي علاقتك الروحانية بيه.

الصحي

روح الجيم أو العب رياضة بتحبها ومتقعدش على «فيس بوك» وقت طويل لأن القعدة بتخلي الجسم غير نشيط وكمان هضيع وقتك والرياضة هتشغل جزء من وقتك وعليك كمان إنك تهتم بأكلك يعني تاكل أكل خفيف على مدار اليوم مش تدبها وتاكل أكل تقيل مرة واحدة يعملك تخمة ويخليك تنام وتضيع اليوم كله في النوم. لازم تظبط نومك إنه يكون من 6 لـ8 ساعات.

المهني

خصص وقت في إنك تطور من نفسك وتقرا كتير لأن أي شخص بيتقاس بمدى المعرفة اللي عنده وازاي قدر يطبق المعرفة دي في حياته وكمان تاخد كورسات عشان توصل لمراتب عالية في حياتك.

وفيه معادلة بتقول رأس المال العقلي+رأس المال العلاقاتي= رأس مال مادي يعني لو طورت من نفسك + إنك عملت ليك علاقات كويسة هتلاقي نفسك عندك رأس مال مادي كويس.

لو عايز تشتغل.. الكورسات دي لازم تتعلمها في الإجازة

الاجتماعي

وده بقى خاص بإنك تخصص جزء من وقتك وتصل رحمك وتتصل بأصحابك وتوطد علاقتك بيهم لأن طبعًا ده ليه فوايد عليك في إنك لو وقعت في مشكلة هتلاقي اللي يقف جنبك.

أما بقى لو أنت عندك مشكلة في إنك لما بتاخد أجازتك من الشغل بتقضيها نوم ولما بتيجي تشتغل بتبقى عايز تخرج الخروجة اللي مخرجتهاش يوم الأجازة فخبير التنمية البشرية بيقولك الآتي:

جلسة استرخاء

اعمل ليك جلسة استرخاء لمدة ربع ساعة في الشغل لأن ده هيجدد طاقتك لغاية ما اليوم يخلص ومش هيخليك حاسس بملل إنك عايز تخرج لأن لو خرجت ممكن تأثر على شغلك فلا تعمل ده كويس ولا الخروجة تبقى كويسة، وفي الصين كل اللي بيشتغلوا بيعملوا استراحة يناموا فيها بس وبيفصلوا عن كل حاجة عشان يقدروا يكملوا اليوم.

الإجازة مش للعب.. كيف تستغلها للحصول على وظيفة؟

علاج النوم في الإجازة

أما بقى علاج النوم في الأجازة فاللي هتعمله عشان تستفيد بوقت فراغك في أجازتك هو إنك تدور على أكتر حاجة بتسعدك وتعملها. وخبير التنمية البشرية بيديك شوية مقترحات للحاجات دي بس بيديك نصيحة إنك تقفل موبايلك في أجازتك ومتردش على أي حد من الشغل عشان تنفصل عن المود بتاعه وتعرف تستمتع بالحاجات دي:

اللمة الحلوة

ممكن تخرج مع أصحابك أو أسرتك في أي مكان أنت حابه عشان تعيش جو الأسرة ولمة الصحاب J

خضرة ومية

روح أي مكان فيه مية وخضرة لأنه هيخليك تجدد نشاطك وهترجع منه عندك طاقة وحماس للشغل.

القراءة

انزل اشتري روايات بتحبها واقراها وثقف نفسك.. اقرأ أيضا:  الإجازة أحلى بالقراءة.. قائمة إصدارات صيف 2016

الكلمات المفتاحية

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»