طلاب في الأزهر سقطوا.. يعني هيعيدوا السنة كلها ولا ايه؟
بالتزامن مع ظهور نتيجة طلاب الثانوية الأزهرية، ورسوب حوالى 30% من طلاب دفعة 2015-2016، وبقاء 28% من الطلاب للإعادة، كتير من الطلاب حب يعرف الفرق بين الرسوب والدور الثاني؟ وهل الرسوب يعني إعادة السنة في كل المواد والا اللى سقط فيها بس؟
«شبابيك» يقدم كل ما يريد معرفته طالب الثانوية الأزهرية عن التحاق الطلاب الراسبين بالدور الثاني، من خلال هذا التقرير.
%41 نسبة نجاح طلاب الثانوية الأزهرية
الطبيعي
بص يا سيدي الطبيعي الطالب الأزهري اللى كان بيشيل كل المواد له حق دخول دور تاني أو يعيد السنة كلها.
شيخ الأزهر، أحمد الطيب، السنة اللى فاتت أصدر قرار، أقر فيه بمعاملة طلاب الشهادة الثانوية الأزهرية، نفس معاملة طلاب الثانوية العامة، ووقتها موضحش كيفية تطبيق القرار وهل سيكون اختياريا أم اجباريا؟ وهل سيتم تطبيقه من العام الحالي أم من العام القادم؟.
شرح القرار
معنى أن يتم معاملة طلاب الثانوية الأزهرية، معاملة طلاب التربية والتعليم، أن الطالب الراسب لا يحق له إعادة الامتحان في كل المواد، وانما بيعيد في المواد اللى سقط فيها بس.
وشيخ الأزهر فسر الموضوع ده في قرار (96) لعام 2015، واللى وضح فيه عدد المواد واللى سمح فيه دخول امتحانات الدور الثاني للطلاب اللى راسبين في مادتين فقط، فيما يتعلق بالمواد الشرعية والعربية، إضافة للقرآن.
ردود أفعال
السنة اللى فاتت عدد كبير من الطلاب الراسبين اعترضوا على القرار، على أمل تحسين مجموعهم، خاصة أن القرار لما أصدره شيخ الأزهر كان بموجبه سيتم دخول الامتحان في المواد الراسب فيها الطالب فقط، وبالفعل قطاعات المعاهد الأزهرية تقدمت بمقترحات لمشيخة الأزهر جعل هذا الأمر اختياري لدفعة 2014-2015، يعني ممكن تمتحن في مواد الرسوب فقط أو تعيد السنة كلها.
المعاهد الأزهرية
أستاذ بمعهد ثانوي رفض ذكر اسمه، قال لـ«شبابيك»، إنه قرار شيخ الأزهر سيتم تنفيذه بشكل رسمي من العام الجاري، بمعنى أن الطالب الراسب سيعيد العام في المواد التي رسب فيها فقط.
طيب هو ايه الفرق بين الرسوب والدور التاني
الفرق بين الرسوب وامتحانات الدور الثاني هي أن الطالب الراسب يعني «شايل 3 مواد وأكتر.. يعيد العام، وأما مرحلة الدور الثاني لمن رسب في مادتين فقط، من مواد التخصص (العربي والشرعي) بجانب مادة واحده فقط من مواد (الثقافية).
يشار إلى أن قطاع المعاهد الأزهرية أعلن أنه تم تحديد يوم 15 أغسطس لبدء امتحانات الدور الثاني للشهادة الثانوية.
جاء ذلك بعد أن أعلن وكيل الأزهر، عباس شومان، نسبة نجاح طلاب الثانوية الأزهرية 2015-2016؛ لمرحلة الدور الأول وهي 41.94%.
