8 أفلام لا تفوتك للمخرج محمد خان
«مخرج مصرى عاش فترة فى لندن ودرس فن الإخراج على يد خبراء وأساتذة كبار وأنا متحمس جدًا ليه»، ده اللي قاله نور الشريف من خلال سؤاله في إحدى اللقاءات التليفزيونية عن سبب إختياره لمحمد خان كمخرج لأول مرة لإخراج فيلمه ضربة شمس اللي كان من إنتاجه.
أعمال الراحل محمد خان هتفضل علامة في تاريخ الفن المصري.. وفي الموضوع د هنرصد ليكو أفلام لازم تشوفوها لـ«نجم الواقعية».
ضربة شمس
الفيلم من إنتاج سنة 1980، وبيحكي عن «شمس» مصور صحفى، بيدخل في قصة حب مع «سلوى»، وهى موظفة تشجعه فى عمله وتحلم معه بمشروعات كبيرة.. وفي مرة وهو رايح يصور حفل زفاف، صور بالصدفة قصاصة ورق عليها كلمات غامضة، والورقة دي وصلت «شمس» لعصابة بتتزعمها امرأة بتهرب آثار بره البلد، وكمان بتزور فلوس. بتبدأ مطاردة العصابة لشمس بعد ما كشف سرها، وتتوالى الأحداث.
ويعتبر «ضربة شمس» التجربة الإخراجية الأولى لمحمد خان بعد عمله كمساعد مخرج لفترة كبيرة، واللي قدمه من خلالها النجم نور الشريف.
موعد على العشاء
الفيلم بيحكي عن «نوال» اللي بتتجوز واحد اسمه «عزت» وبتتفاجيء بشخصية غير اللي كانت بتتعامل معاها وقت الخطوبة فبتتخنق وبتقرر تطلب الطلاق وبتقع في حب شكري اللي بيشتغل في الكوافير اللي بتروحه وبتتجوزوا.
لكن «عزت» بينتقم منها وبيقتل «شكري» اللي كانت بتعشقه فبتقرر «نوال» الانتقام من خلال موعد على العشاء.. الفيلم من بطولة سعاد حسني وحسين فهمي وأحمد زكي، وهو إنتاج سنة 1981.
الحريف
فيلم «الحريف» إنتاج 1983، وهو بطولة الفنان عادل إمام، اللي قام بدور «فارس» اللي بيشتغل في مصنع أحذية ومتجوز وعنده ولد، وبيحب مراته، إلا إنه بيقرر الانفصال عنها بسبب هوايته المفضلة وهي ممارسة كرة القدم «الشراب» في الشوارع والساحات الشعبية مقابل المراهنات.
حياة «فارس» بتبوظ خالص وبيخسر شغله لحد ما يقرر يعيد حساباته عشان يرجع لزوجته وابنه.
خرج ولم يعد
يعتبر واحد من أبرز أعمال «خان»، وهو الفيلم اللي بيحكي عن «عطية» اللي قرر إنه يسافر البلد بتاعته عشان يبيع أرض والده لأن حماته هددته إنها تفسخ خطوبته ببنتها لو مجهزش فلوس الشقة. وفعلًا بيشتري الأرض منه «كمال بك» وبيصر إنه يخليه قاعد عنده لحد ما يرجع القاهرة وأسرة «كمال» كريمة جدًا الأكل عندها شيء أساسي كانوا بيأكلوه كل ثانية.
بس «عطية» قرر إنه ميرجعش المدينة لأنه حب «خيرية» بنت كمال وحب جو الريف الهادي البعيد عن زحمة المدينة.. الفيلم من بطولة يحيى الفخراني، ليلى علوي، فريد شوقي، وعايدة عبد العزيز، ومن إنتاج سنة 1985.
زوجة رجل مهم
«هشام» ظابط شرطة حب بنت اسمها «منى»، واتجوزها، واكتشفت إنه عنده جنون السلطة ممكن يدوس على أي حد عشان يحافظ على مكانته بس عمرها ما كانت تتخيل إن توصل بيه الدرجة يقتل أقرب الناس ليها.
الفيلم من بطولة أحمد زكي وميرفت أمين ومن إنتاج سنة 1988.
في شقة مصر الجديدة
من أبرز عمال خان الأخير فيلم «في شقة مصر الجديدة» اللي بيحكي عن «نجوى» اللي بتقرر إنها تسافر بلد متعرفش فيها حد «القاهرة»، عشان تدور على مدرسة الموسيقى العزيزة على قلبها أبلة تهاني اللي علمتها يعني إيه معنى الحب وبتقابل من خلال رحلة بحثها عنها مواقف وشخصيات كتيرة منهم «يحيى» اللي قلبها دق ليه.
ورغم إن «يحيى» كمان قلبه دق لـ«نجوى»، لكن «خان» بيسبلنا النهاية بينهم مفتوحة.. الفيلم من إنتاج سنة 2007 ومن بطولة غادة عادل وخالد أبو النجا.
فتاة المصنع
«هيام» بتتشتغل في مصنع ملابس وزي أي بنت قلبها دق وحبت، لكن للأسف المجتمع وقف قصاد حبها.. الفيلم من بطولة ياسمين رئيس وهاني عادل وإنتاج سنة 2014.
قبل زحمة الصيف
الفيلم إنتاج 2015، وبيحكي عن الدكتور «يحيى» اللي بيقرر قضاء العطلة مع زوجته ماجدة قبل زحمة الصيف، في الساحل الشمالي.. وهناك بيتعرف «يحيى» ومراته، على «هالة» اللي بتشتغل مترجمة، وهي شابة مطلقة وأم لولدين، وتتبدل أحوال العطلة الصيفية من حال لحال منذ ذلك الوقت.
. والفيلم من بطولة ماجد الكدواني وهنا شيحة وأحمد داوود وهو أخر فيلم أخرجه محمد خان
