الطالبة المغتربة بتكون معرضة زي غيرها من البنات للحب والارتباط، لكن بعض المغتربات بسبب ظروف البعد عن بيتها وأهلها واحساسها بالغربة ممكن يخليها تتعلق بالحب بسرعة من غير تفكير.

في الموضوع ده هندردش في شوية نصايح للبنات، عشان قلبها ميتكسرش ويضّحك عليها باسم الحب.

أكتر من 50% جوع عاطفي 

استشاري العلاقات الأسرية أسماء مراد بتقول «إن أكتر من 50% من الحالات اللي بتجيلي من المغتربات بتكون إما البنت بتتخيل إن الولد أو الدكتور اللي بيدرس ليها بيحبها وهو معملش أي حاجة خالص توحي ليها بده أو الولد هو اللي بيضحك عليها ويمثل إنه بيحبها وهو بتقع في حبه. وفي كلا الحالتين البنت بتكون عايزة تشبع الجوع العاطفي اللي عندها».

المغتربة مش رخيصة.. هكذا تُغيّر الفتاة نظرة المجتمع السيئة

تقترح أسماء مراد مجموعة من النصائح للبنات المغتربات عشان ميقعوش في مصيدة الحب الوهمي:

التواصل مع الوالدين 

خلي دايمًا فيه تواصل مع أهلك اتكلمي معاهم واحكلهم عن يومك وكل لما تحسي بألم الغربة سافري ليهم على طول اقعدي معاهم شوية حتى لو مش هتباتي وده عشان تقدري تشحني طاقة حب من والدك ووالدتك :) طاقة تخليكي مبسوطة لما ترجعي تاني من السفر.

وطبعًا احساسك بحب والدك ووالدتك واخواتك تجاهك بيعملك حالة من الإشباع العاطفي والحالة ديه مش هتخليكي عرضة إن أي حد يقولك كلمة حب تقعي في دباديبه لأنك مشبعة عاطفيًا مش عندك فراغ عاطفي.

سكن طالبات مش مغتربات 

مراد كمان بتفضل إنك تسكني في سكن طالبات عشان هتلاقي ناس من نفس سنك والناس اللي هتختاري تصاحبيهم منهم لازم يكونوا من الناس الناجحة الإيجابية اللي هتأثر فيكي بالإيجاب مش من الناس السلبية الفاشلة اللي هيأثروا فيكي بالسلب. وكمان خلي علاقتك كويسة مع الأخصائية الإجتماعية اللي في المكان عشان لو حبيتي تتكلمي معاها في حاجة مضيقاكي تلاقيها بتسمعك بحب وإهتمام.

أما سكن المغتربات فالأفضل تبعدي عنه لأنك هتلاقي فيه ناس أكبر من سنك فمش هيكون فيه توافق بينك وبينهم وهتلاقي إهتماماتك غير اهتماماتهم، وكمان بعضهم هتلاقيه بيفتح مواضيع حساسة قدامك الى حد ما ومش هيراعوا الحياء العام وهما بيتكلموا في حاجات قصاد بنت لسة متجوزتش.

الإستعانة بالله 

قربي من ربنا جامد واتكلمي معاه في كل اللي إنتي حاساه عشان متحسيش بالفقد النفسي لأن ربنا هو القادر إنه يطمن روحك ويحميكي من أي مخاطر ممكن تقابلك في غربتك.

حرية أم انحلال.. كيف نرى طموح الفتاة المغتربة؟

الفراغ العاطفي وفترة الإمتحانات 

استشاري العلاقات العاطفية أسماء مراد شايفه إن المغتربات بيحسوا بالفراغ العاطفي لما بتزيد فترة الإمتحانات وأي كلمة يقولها الولد ليها تفتكره بيحبها وطبعًا نتايج الحالة اللي هى فيها ممكن تخليها تعمل حاجات تأثر على سمعتها وممكن يحصل إنها تتجوز عرفي مثلًا.

وعشان ده ميحصلش مراد بتنصحك إنك تملي حياتك بحب عيلتك وأصحابك ودارستك وشغلك وتكوني شخصية قوية مش ضعيفة سهل أي حد يأثر فيها. واتقي الله دايمًا في والديكي واعرفي إن لو عملتي أي حاجة غلط إنتي بكدة أهنتيهم وأهنتي نفسك.

هل تعوق الغربة حلم الفتاة في الزواج؟




1
2
1
0
0
1
1

شارك المقال


صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»