للسفر فوائد ودروس
السفر وإنك تلف حوالين العالم حلم أغلب الناس ولأن الحياة صعبة فى مجتمعنا ففى الاغلب الحلم ده بيتوه. بس لما بتيجى سيرة السفر بنسمع إن للسفر سبع فوائد بس محدش بيوضح لنا إيه هما السبع فوائد دول؟ وهل الموضوع ده يمشى على أى سفر؟ أغلب الناس إجتمعت على خمس فوائد أو دروس إتعلموها من السفر هنستعرضها في التقرير ده.
يامسافر وحدك .. متقلقش
حتى لو مسافر لوحدك أنت عمرك ما هتكون وحيد. طبيعة الإنسان وفضوله بيخليه يحاول يكون صداقات كنوع من الونس أو حب لمعرفة الثقافة إللى هو بيزورها. الصداقة إللى المسافر بيكونها من أهل البلد بتكون كنز عشان بتعرفه أماكن مش موجودة فى الدليل السياحى وبتوفر عليه حاجات بتنظمها الشركات السياحية مقابل أسعار عالية.
بره القوقعة فى إيه؟
السفر بيخليك تعرف إن الحياه بره قوقعتك مش صعبة زى ما إنت تخيلت بالعكس بيحطك فى مواقف بتربى عندك مهارات جديدة زى طريقة التعامل مع المشاكل وأساليب اللياقة والكلام وطرق النقاش.
كمان السفر بيغير فكرة إن الدنيا غابة إللى أغلب وسائل الإعلام بتسوقلها. لما بتسافر بتشوف إن البشر مهما اختلفت لغتهم وثقافتهم بيجتمعوا على البساطة والمعاملة الطيبة طول ما إنت مش بتأذى حد.
ما وراء الأكل؟
من أهم المهارات إللى السفر بيعلمها للناس هى الطبيخ والتجربة! وعشان الأساسى فى السفر هى روح المغامرة وإزاى بتحرك صاحبها، السفر بيعلمك إن الأكل فن لا ينتهى من الوصفات إللى تجنن وكمان ممكن تتعمل من مكونات بسيطة الطبخ بكذا طريقة يعلمك جرأة الإختيار وقيمة التجربة.
إزاى تصرف؟
السفر مش بس بيعلمك إنك تكون مستقل بذاتك لكن كمان بيعلمك إزاى تتعامل مديا وتبقى مدبر. الموضوع مش بخل بس مصروفات السفر أول حاجة بتخوف الناس من السفر نتيجة لفرق العملات. السفر بيعلمك إزاى تصرف فلوسك وإيه الحاجات إللى فعلا ليها قيمة ولازم تشتريها.
إرمى الصناديق
زى ما إنت مسافر عشان تخرج بره الصندوق فالسفر بيخليك تكسر كل الصناديق من ناحية الافكار والمعتقدات وبيخليك تحسن من عاداتك الشخصية والأدبية. وبتتحول لإنسان مبدع يعرف يصنع من اللاشئ فن. كمان بتتعلم إحترام الثقافات وإحترام الآخر وتفكيره.
مهما كان السفر طويل أو بيبعدك عن الناس إللى بتحبهم لكن بيجبلك الخيال بين إديك وبيعلمك دروس بتحولك من مجرد عايش لـ إنسان بيستمتع فى كل لحظة.
