رغم عزلته.. هذه المهارات يكتسبها الشخص الإنطوائي
العزلة عن الناس ليها عيوب وأضرار زي الشعور بالوحدة وقلة العلاقات الاجتماعية، لكن ليها مميزات برضه، لأن الشخص اللي مبيحبش يتواجد مع ناس كتير بيضطر يطور بعض المهارات اللي مبتكونش موجودة بنفس القوة عن الأشخاص الاجتماعيين.
الاعتماد على النفس
الشخص الإنطوائي بيخلي آخر اختياراته هي أنه يتكلم مع حد أو يتواصل مع حد عشان يطلب منه حاجة، وعشان كدا هو بيفرض على نفسه الاعتماد على النفس من وهو صغير، بيتعلم يتصرف إزاي في المواقف الصعبة وإزاي يعتمد على نفسه عشان يتجنب أنه يطلب أي حاجة من أي حد.
مهارة الاستماع والإنصات
لأن الأشخاص الإنطوائيين مش متكلمين بطبعهم، ومهارة الإنصات هي المهارة اللي بيمتلكوها في الأحاديث، الشخص الإنطوائي بيركز مع المتكلم جدًا وبيتابع كلامه من غير ما يقاطعه.
اقرأ أيضًا: 6 أخطاء نرتكبها عند الاستماع للآخرين
التحكم في الإنفعالات
الإنطوائي غالبًا بيكون شخص هاديء الطباع، ويتجنب الإنفعال أو العصبية، بينما الأشخاص سريعي الغضب والإنفعال بيكونوا على الأغلب أشخاص إجتماعيين.
الشخص الإنطوائي بيكون كتوم، وقليل التعبير عن مشاعره ومش سهل إنه يتعصب أو ينفعل.
بيبسط نفسه
الشخص الإنطوائي بيكون عنده عدد قليل من الأصدقاء، وعشان كدا هو بيقضي أوقات كتير لوحده وبيبقى الحل الوحيد قدامه أنه يتولى مسؤولية إسعاد نفسه بنفسه بأنه يقوم بالأنشطة أو الهوايات اللي بيحبها لوحده. الشخص الإنطوائي بيستمتع بصحبة نفسه يعني ممكن يخرج لوحده يروح السينما أو ياكل في أي مكان لوحده ويكون مبسوط بوجوده لوحده.
احترام الخصوصيات
الإنطوائيين بيقدروا وقت العزلة والهدوء وبيقدسوه. وأسوأ حاجة للشخص المنطوي أن حد يتدخل في خصوصياته أو يزعجه في وقته اللي بيخصصه لقضاءه مع نفسه، ودا سبب كافي أنه يحترم خصوصيات الآخرين، عشان ميتسببلهومش في أي ضيق.
مهارة التخطيط
الإنطوائيين هما أفضل ناس تحط خطط أو تجهز لأي حاجة قبلها بوقت طويل، عشان كدا بينجحوا في الأعمال الإدارية أو إدارة الأعمال اللي بتتضمن وضع الخطط والتجهيزات.
التفكير قبل أي قرار
من إحدى المميزات والعيوب فيه إنه بيفكر في أي موضوع من كل الجوانب الممكنة. التفكير بهدوء في أي قرار بيكون كويس في أوقات كتير لكن دا أحيانًا بيخليه يتردد كتير قبل ما ياخد أي قرار حتى بعد دراسته كويس.
قوة الملاحظة
نتيجة الهدوء وقلة الكلام، الشخص الإنطوائي بيبقى عنده قدرة عقلية أكبر على أنه يلاحظ اللي حواليه بدقة، وينتبه للتفاصيل الدقيقة ويفتكرها كويس.
اقرأ أيضًا: «العزلة» مفيدة.. ولكنها تسبب هذه الأمراض اخترنا لك:
