بيومي فؤاد «ينفجر».. النقاد يحللون الوضع وتأثيره على الدراما
النجم بيومي فؤاد في رمضان السنة دي مشارك في 9 مسلسلات بس يا ترى هل قدر إنه ينوع في الشخصيات اللي بيقدمها؟ وهل كونه بيقدم أكتر من عمل ده حاجة في صالحه ولا لأ؟ طب هل في صالح المسلسلات نفسها؟
قبل ما نعرف الإجابة على أسئلتنا من الناقدين الفنيين رامي عبدالرازق ووليد سيف، هنستعرض الأول المسلسلات التي ظهر فيها النجم بيومي فؤاد.
شهادة ميلاد
تاجر سلاح مهموش إن الأمن دخل يقبض عليه وطارق لطفي ماسك المسدس في وشه وقعد ياكل ويتفرج على ماتش في التليفزيون في منتهى الهدوء.
بنات سوبر مان
صاحب كباريه اسمه «قرني» بيستغل قدرات بنات سوبر مان الخارقة لمصالحه الشخصية. والمسلسل من بطولة شيري عادل، ويسرا اللوزي، وريهام حجاج.
هى ودافنشي
لواء فاسد مسؤول عن المعتقل «دافنشي» اللي بيقوم بدوره خالد الصاوي وبيعذبه وبيستغله. والمسلسل من بطولة ليلى علوي ومي سليم.
نيللي وشريهان
رجل أعمال والد «نيللي» وبيتجوز من صباح خالة «شيريهان» على الرغم من فرق المستوى بينه وبينها. والمسلسل من بطولة دنيا سمير غانم وإيمي سمير غانم ومصطفى خاطر وسلوى خطاب.
الكيف
كبير الألاتية ومتجوز 4 نساء ولما أي مشكلة بتحصل بينه وبينهم بيلجأ لصاحبه «البيصي» اللي بيقوم بدور سعد الصغير عشان يحلها. والمسلسل متاخد عن فيلم الكيف وبطولة باسم سمرة وأحمد رزق.
رأس الغول
بيلعب فيه دور «ماهر» صديق محمود عبدالعزيز، وبتجمعهم زنزانة واحدة ولما بيخرجوا بيعيش عبدالعزيز في بيت ماهر. والمسلسل من بطولة فاروق الفيشاوي وميرفت أمين.
الميزان
أحد قيادات وزارة الداخلية اللي ليه دور في اللي بيحصل في المسلسل من جرايم وأحداث. والمسلسل من بطولة غادة عادل وأحمد فهمي.
صد رد
إرهابي عايز يفجر فندق بس «حورس» و«كونو» و«أوس أوس» بيعملوا خطة عشان ينقذوا الفندق من القنبلة اللي فيه. والمسلسل من بطولة علي ربيع ومحمد عبدالرحمن و«أوس أوس».
أنا وبابا وماما الجزء 2
رفعت رياض صديق أشرف عبدالباقي ونشوى مصطفى وبيعيش معاهم مشاكلهم اللي بيمروا بيها في حياتهم وبيحاول يحلها بأسلوب كوميدي.
أراء النقاد
الناقد رامي عبدالرازق بيقول إنه برغم تقديم بيومي فؤاد للأدوار الميلو دراما إلا إن أفضل ظهور ليه كان في الشكل الكوميدي وأكتر الأدوار الكوميدية، وخاصة دور «قرني» في مسلسل بنات سوبر مان ودور «عبدالله» والد نيللي في مسلسل نيللي وشيريهان.
وبيكمل كلامه وبيقول «معنديش مشكلة إنه يعمل أكتر من مسلسل لكنه لازم ينتبه إنه على الرغم إنه عامل أدوار مختلفة لكن ظهوره في أكتر من عمل في موسم واحد ده بيخلي الجمهور مش حاسس بفرق بين أدواره وعنده حالة من التشبع برؤيته على عكس لو كان قدم الأدوار دي على مدار السنة كان الموضوع فرق وكان الجمهور هيكون متشوق لرؤيته».
وبيطرح عبد الرازق تساؤل مهم هو «هل مفيش غير بيومي فؤاد يجسد الأدوار دي كلها؟ يعني مكنش فيه إختيارات قدام صناع العمل لنجوم تانية؟»
السر وراء التساؤل ده إن عبدالرازق شايف إن الإبداع الفني بيتطلب تعدد الوجوه بمعنى رؤية نجوم مختلفة بيجسدوا أدوار متنوعة، وكون بيومي فؤاد بيقدم نفس المراحل العمرية في كل الشخصيات فدي حاجة بتصيب المشاهد بالملل ومش بتكون في صالح العمل الفني.
أما الناقد وليد سيف بيقول إن الممثل الجيد بيقدر يلاقي مساحات تميز وإختلاف بين الشخصيات حتى لو تشابهت، لكن مسألة تعدد الأدوار ربما كانت في صالحه إلى حد ما في مرحلة الانتشار واللي بيتحول فيها من وجه مألوف لي اسم معروف.
ولكن في الحقيقة ده مش في صالح المشاهد ولا العمل بوجه عام لأنها بتعمل حالة تشتت. وبالإضافة لأدواره التمثيلية ظهوره كمان في البرامج والإعلانات ودي حاجة بتخليه يتحول من مرحلة الإنتشار لي مرحلة الإنفجار.
