متتلخبطش.. الأوراق المطلوبة وخطوات التقديم في سنة أولى جامعة

بعد ما طلاب الثانوية عرفوا نتيجيتهم، وكل واحد عرف هو التنسيق بتاعه مرحلة أولى ولا مرحلة تانية أو حتى مرحلة تالتة، كل واحد بيروح يسجل رغباته على حسب المواعيد المحددة ليه وعلى حسب المراحل.

بعد تسجيل الرغبات الطالب بيجيله بطاقة ترشيح للكلية اللي يدخلها، وبعد كده لازم يروح الكلية ويقدم فيها ويخلص شوية إجراءات علشان تبقى مقيد في الكلية.

«شبابيك» هيعرفك إيه هي الأوراق دي، وإيه الإجراءات اللي مطلوبة منك وانت بتقدم عشان متتلخبطش:

الأرواق المطلوبة

-الاستمارة البيضاء الدالة علي النجاح.

-عدد (6) صور شخصية.

-شهادة الميلاد الأصلية أو مستخرج رسمي منها.

-نموذج (2) جند للطلاب الذكور فقط (من مكتب التجنيد التابع له الطالب).

-شهادة التفوق الرياضي (للطلاب الحاصلين علي حوافز رياضية فقط).

-موافقة كتابية من مدير المدرسة الثانوية الجوية والثانوية العسكرية الداخلية للطلاب الحاصلين علي الثانوية العامة من إحدى هاتين المدرستين للالتحاق بإحدى الكليات أو المعاهد.

وكمان وزارة التعليم العالي بالتعاون مع مكتب التنسيق بتعمل كشوف نهائية بأسماء الطلاب، كل واحد مترشح لكلية إيه وجامعة إيه، وبتبعتها للجامعات والكليات والمعاهد على (C D) وده بعد إعلان نتايج التحويلات الإلكترونية لكل مرحلة.

الخطوة التانية

بعد ما تقدم أوراقك للموظف المختص يتسلم الأوراق من طلاب سنة أولى جامعة في مكتب شئون الطلاب، بتستلم ورقتين وحدة للكشف الطبي والتانية إذن دفع الرسوم الدراسية ودول من مكتب الشئون برضه، وبتروح العياة الطبية في الكلية لتوقيع الكشف الطبي، وبعد ما الدكتور يمضي بـ«لائق طبيا» بتروح الخزنة وتسدد الرسوم الدراسية بتقديم ورقة إذن الدفع اللي أخدتها من الشئون وتدفع الفلوس وتاخد وصل لون أحمر، بتصوره صورتين وتروح لموظف الشئون تاني وتديله (الكشف الطبي المختوم من الدكتور، والوصل الأحمر بتاع المصاريف وصورة منه) وتخلي صورة معاك محتفظ بيها.

وبكده انت خلاص بقيت مقيد بالكلية وطالب في الفرقة الأولى، وخلصت من الثانوية وكوابيسها.