رئيس التحرير أحمد متولي
 عايز تعمل أصحاب كتير من أول يوم جامعة؟.. بلاش الحاجات دي

عايز تعمل أصحاب كتير من أول يوم جامعة؟.. بلاش الحاجات دي

أول يوم في الجامعة يوم مش زي أي يوم عدى عليك في حياتك لأنك فيه هتتنقل لمرحلة تانية في عمرك وهي المرحلة اللي هتأهلك للحياة العملية بعدين.

وعشان ميكونش فيه عداوة بينك وبين الناس من أول يوم في الجامعة وتكون العلاقة بينكوا قايمة على الحب بلاش تعمل الحاجات اللي هنقولها ليك في الموضوع ده.

النظرة الطبقية​​​​​​​

وهي نظرتك من فوق لتحت سواء للطالب اللي جاي من الأقاليم أو الطالب اللي داخل كلية أنت شايفها كلية مش معترف بيها أو قليلة من وجهة نظرك. والنظرة دي كفيلة طبعًا إنها تبني حاجز بينك وبين الناس وتقفلهم منك لغاية أخر يوم في الجامعة.

الغرور

متبصش على إن غرورك هو إثبات شخصية وسط الناس من أول يوم في الجامعة لأن عمر الغرور ما كان صفة حميدة ودايمًا صاحبها بينفر منه الناس وخصوصًا لو كان غرورك ده على طالب معاك في نفس الكلية جايب مجموع زيه زيك يعني مفيش حد أحسن من حد.

والكلام عن نفسك وعن إنجازاتك كتير بيحسس برضه الناس إنك شخص مغرور وجاي تعيش عليهم وتبين إنك أحسن منهم. فبلاش منه وخلي أفعالك هى اللي تتكلم عن نفسها.

التطبيل للدكتور

نتيجة بحث الصور عن التطبيل

بلاش تطبل لدكتور الجامعة بمعنى إنك تحاول بكل الطرق إنك تكسبه، وده يعني على سبيل المثال إنك تشيل الشنطة بتاعته أو تجري تفتحله باب المدرج وده على اعتقاد منك إنك بكده هتخليه يظبطك في الدرجات لأن كل ده بيخلي الطلبة تبصلك بنظرة إنك بتقلل من كرامتك عشان خاطر مصلحة شخصية.

وده طبعًا هيخليهم ميحسوش بالأمان في صداقتك وهيبعدوا عنك لأنهم هيقلقوا إنك تكون بتقرب منهم وبتتكلم معاهم حلو عشان عايز مصلحة وهتبقى في نظرهم الشخص «المطبلاتي».

التعصب السياسي

نتيجة بحث الصور عن التعصب السياسي

أكيد هتقابل طلبة ليهم تفكير سياسي مختلف عن تفكيرك ولو اتكلمت معاهم وعارضتهم بشكل عصبي ممكن تحصل خناقة بينك وبينهم فمن الأول لو هيحصل كلام بينك وبين حد في السياسة خليك دبلوماسي في طريقة كلامك بمعنى إن كلامك نتيجته متبقاش خناقة توصل لوكيل الكلية ويكون رد فعله سيء تجاهكوا إنتوا الإتنين.

الاصطناع

إصطناعك لطريقة كلام لمجرد جذب الانتباه بيخلي الشخص يبص ليك إنك شخص Over ومش على طبيعتك كده زي بقية الناس، وده طبعًا هيقفل برضه الطلبة منك لأنهم هيحسوك شخصية مصطنعة مش بتتعامل بطبيعتها.

الخليل كوميدي

نتيجة بحث الصور عن الخليل كوميدي

متحاولش تبذل مجهود وتبين للناس إنك بتعرف تضحك اعتقادًا منك إنك بكده هتكسب ودهم لأنك عمرك ما هتكسبه، واللي هيحصل إنهم هيشوفوا دمك تقيل وهيضحكوا عليك مش ليك وهتبقى معروف في الجامعة إنك «أبو دم تقيل» وطبعًا هتتهري تريقة من الناس.

السر مش في بير

مدرب التنمية البشرية كمال نعيم بيقول إن من أبرز الحاجات اللي ممكن تعمل عداوة بينك وبين الناس إنك تقول سر حد كان مأمنك عليه. وعشان كدة لازم تتعود على إنك تكون كاتم لأسرار الناس لأنهم بكده هيحبوك وهيرتاحوا إنهم يتكلموا معاك ومش هيخافوا إنك تقول سرهم لحد.

استثارة عصبية

عصبية وغضب

بيكمل نعيم كلامه وبيقول لو حد جه قالك حاجة ضايقتك حاول ميكونش رد فعلك عصبي تجاهه وخلي عندك ثبات انفعالي وافهم منه المشكلة بهدوء وحللها لأن استثارتك العصبية دي لو بقت دايمًا في شخصيتك هيبقى ليها تأثير نفسي بالسلب عليك وكمان هتبعد عنك الناس لأنهم هيشوفوا إنك دايمًا بتتعصب ومفيش حد بيعرف يكمل معاك كلمة غير ويلاقوا خلقك يضيق وتتعصب.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»