للأمهات.. دليلك للعبور من أزمة لبن الأطفال
لو مش متاح إنك ترضعي ابنك طبيعي أول ما يتولد وعايزة تلجأي للبن الصناعي بس شايفة إن اللبن الصناعي غالي جدا وناقص في الصيدليات، والموجود منه غالي جدا وهيخرب الميزانية، والبديل سيء جدا، يبقى تتابعي الموضوع ده :)
في الموضوع ده هنعرفك على بدائل اللبن الصناعي، وإزاي تغذي طفلك كويس، وإيه اللي ممكن تعمليه
اللبن البقري
دكتور طب الأطفال مجدي السيد بيقول إن البديل للبن الصناعي هو لبن الحليب البقري لأنه قريب من لبن الأم وهضمه أسهل، وهتجيبيه من أي سوبر ماركت وهتلاقي إن سعره من الناحية الاقتصادية مش مكلف بالنسبة ليكي.
واللبن ده ابتدي اديه لابنك بعد سن 6 شهور، لكن قبل الـ6 شهور استخدمي اللبن الطبيعي، ومعاه اللبن البودرة اللي بيكون مكتوب عليه رقم 1.
ولما تيجي تستخدمي لبن الحليب البقري بعد الـ6 شهور لازم تستخدميه بطريقة صح يعني تحطي 3 مكاييل لبن على مكيال مية عشان يتخفف ومتضيفيش عليه أي حاجة زي السكر مثلًا.
ولو استخدمتيه بطريقة غلط زي إنك تغيري في المكاييل بدل مكيال مية تدي ليه مكيالين مثلًا هيحصل لابنك اضطرابات في الجهاز الهضمي، ومن الاضطرابات دي: المغص، والانتفاخ، والترجيع، والإمساك.
ولو عايزة تستخدمي لبن الحليب البقري بعد سنة، دكتور مجدي السيد بيقولك إن في الحالة دي هتحتاجي تزودي نسب تركيز أعلى من اللبن يعني تحطي 4 مكاييل لبن لمكيال مية، وده طبعًا هيخليكي تدفعي فلوس أكتر وبالتالي هيأثر على حالتك الاقتصادية.
وعشان كدة دكتور مجدي السيد بيقول إن الأفضل تستخدمي اللبن البقري بعد الـ6 شهور بس، عشان استخدامك للبن هيكون نسبة تركيزه مناسبة فبالتالي مش هيعملك أزمة مادية.
للحوامل.. 8 نصائح تبعدك عن «اللبن الصناعي»
كمية الأكل المناسبة
«السيد» بيقول إن مع الحليب اللي هتشربيه لابنك بعد الـ6 شهور هتأكليه كمان مجموعة من الأكلات اللي هتديله السعرات الحرارية اللي محتاجها عشان وزنه يزيد زيادة طبيعية، وهيبقى عبارة عن إنك تأكليه صنف واحد في أول أسبوع ومش هتدخلي مع الصنف حاجة تانية عشان نتفادى حدوث تداخل بين الأطعمة والتداخل ده ممكن يؤدي إنه يعمل حساسية لطفلك من مادة معينة.
ولما تلاقيه تقبل أكل الصنف ده بشكل تدريجي هتيجي في الأسبوع التاني وتحتفظي بالصنف اللي أكلتيه ليه في الأسبوع الأول وهتضيفي عليه صنف جديد ولما تلاقيه تقبله برضه هتحتفظي بالصنفين اللي فاتوا وفي الأسبوع التالت تضيفي عليه صنف تالت جديد.
ومن الأصناف اللي بيرشحها ليكي دكتور مجدي السيد: كبدة الفراخ، صفار البيض، ضهر سمكة مشوية، نسيرة من صدر الفرخة، وده عشان أليافها أقصر وهضمها أسهل بعكس أجزاء الفراخ التانية، وطبعًا الخضار بس يبقى مسلوق والفاكهة تقطعيها قطع صغيرة، ولازم الخضار والفاكهة يكونوا طازة ومغسولين كويس.
أم لأول مرة.. نصائح مهمة في التغذية والرضاعة
لبن الماعز
بيكمل «السيد» إن الأم زمان لما ابنها كان يجيله فطريات تسببله مشاكل في البلع كان الدكتور بينصحها إنها ترضع ابنها من لبن المعزة مباشرة لأن لبن المعزة مضاد للفطريات.
وبيقول كمان إن فيه أمهات بيشتروا معزة والدة عشان يحلبوها كل يوم ويدوه للطفل. طبعا الأم بتصرف على المعزة وتغذيها لأنها بتوفر عليها إنها تشتري لبن بأسعار مرتفعة. وده حل تاني بديل للبن الصناعي لو قدرتي تعمليه هيوفر ليكي وهيحمي ابنك ويغذيه كمان.
الجانب الأخر
دكتور طب الأطفال بمستشفى شبرا العام سلوى نصر بتقول إن لحد 6 شهور تقدري تشربي ابنك لبن صناعي وبعد الـ6 شهور ابتدي دخلي مع اللبن ده أكلات زي اللي اتكلم عنها دكتور مجدي السيد.
لكن دكتور «سلوى» بتقول إن أي منتجات ألبان مينفعش تستخدميها إلا بعد سنة وده لأن فيه دراسات بتثبت إن كل الألبان بتؤدي للإصابة فيما بعد بمرض السكر.
ودكتور طب الأطفال نهى أبو الوفا بتأكد على معلومة دكتور «سلوى» اللي بتقول إن أي منتجات ألبان مينفعش تستخدميها إلا بعد سنة، وبتضيف إن لبن الحليب البقري إن تم استخدامه قبل السنة هيكون تكوينه مختلف عن تكوين لبن الأم وده هيعمل للطفل أنيميا عشان مفيهوش كمية الحديد الازمة وهيعمل للطفل لين عظام ونسبة الهضم هتكون صعب.
