يوسف شاهين.. الخواجة وبنات البلد(1)

يوسف جبرائيل شاهين، الخواجة المصري، مولود من أب لبناني وأم من أصول يونانية لكنه إسكندراني النشاة، درس في جامعة إسكندرية وبعدها سافر الولايات المتحدة يدرس مسرح، ولما رجع عمل أول فيلم "بابا أمين" وهو سنه 24 سنة..ودي حكاويه مع بنات البلد. "جو وتونة" علاقة يوسف شاهين بـ فاتن حمامة كانت علاقة صداقة قوية، إتطورت لحب لكن من طرف واحد، طرف "جو" اللي ماقدرش يعبر عن حبه لـ "فاتن" لأنها كانت متجوزة المخرج عز الدين ذو الفقار، لكن في آخر علاقة "فاتن" بـ" عز الدين" وقبل طلاقهم كان يوسف شاهين بيبتدي يجهز لإعترافه ليها بحبه لأنه كان عارف إن المشاكل اللي في حياة "فاتن" الزوجية زادت ولازم العلاقة دي تنتهي، لكن " لا تأتي الرياح بما يشتهي جو" والحظ لعب لعبته ضده وخلاه يعرفها بنفسه على صاحب دراسته القديم "ميشيل شلهوب" اللي سماه "جو" باسم عمر الشريف. الصورة: عمر الشريف بجانبه "كوليت زوجة يوسف شاهين" ويوسف شاهين وفاتن حمامة. بسبب المعرفة دي بدات قصة الحب مع فيلم "صراع فى الوادي" اللي كان اول بطولة لـ "عمر وفاتن" واللي بسبب آخر مشهد فيه اتفضحت قصة حبهم مع "البوسة" اللي وضحت جداً إنها بره النص واللي عرف بيها "جو" إن فاتن بتحب خلاص وخصوصاً. بسبب صدمة "جو" حاول ينتحر لأنه حس إن "فاتن" خانته و قال في حوار تلفزيوني مع مذيع بيسأله لما فاتن كدبت قصة حبه ليها "نعم أحببتها، كانت فاتن قطقوطة وتجبر الجميع على الوقوع فى حبها". ولما إتسأل عن محاولة إنتحارة وقطع شرايينه "جو"، رد وقال " عيب يا ولد تقول كده، إنت عرفت منين الكلام ده. فاتن نفسها معرفتش إني حبتها" وعشان يغطي على زعله ضحك وقاله " بس بصراحة عمر الشريف حلو ويتحب" . وفضلت العلاقة مستمرة بين "يوسف شاهين" و"فاتن حمامة" كأصدقاء وكزمايل في العمل بالرغم من جوازها لـ"عمر الشريف" وماخسروش بعض. انتظرو الجزء التاني من حكايات الخواجة وبنات البلد..