إكسر قوقعتك وسافر شوف الدنيا
السفر حلم ناس كتير، لكن أغلبنا لما بيفكر فيه بيربطه بطيران درجة أولى وبفندق فخم وشوبنج ومرشد سياحى. الفكرة دى بتضيع على الناس أحلى حاجة فى السفر : المغامرة. عشان كده قررنا نحكيلكوا عن مغامريين مصريين و حكاياتهم مع السفر.
صفحة على موقع التواصل الاجتماعي «فيس بوك» أنشأها محمود مصطفى كمال، صحفى مصر، بيحكى فيها عن تجربته مع بلاد العالم، وبينزل تجربته مع كل بلد زارها و كمان بيعرض زيارات المعجبين، وبتخليك تسافر العالم من بيتك.
بس تجربة السفر اللي بتعرضها صفحة "No fixed Address" لأغلب المشاركين مش بتتضمن فنادق فخمة وأي نوع من الفلوس الكتير إللى فى خيالنا. السفر كان أغلبه شنطة صغيرة و قراءة عن البلد إللى إنت رايحها و حجز أونلاين لمكان تعيش فيه فترة السفر.
وخلال فترة السفر بيبقى شعارك "إستكشف"، فبتنزل الشوارع وتشوف ثقافة البلد وبتكون صداقات من أهل البلد بعد كده الناس دى بتكون أحسن دليل سياحى ليك.
على الصفحة "محمود" بيفتح نقاشات كتير حوالين السفر وبيكتب نصايح كتير تساعدك في تخطيط رحلة ممتعة. لو عايز تشوف عدد البلاد إللى زارها محمود لحد دلوقتى إدخل على حسابه على موقع إنستجرام بالضغط هـــنـــا ، بس متخرجش إلا و إنت مقرر هتروح فين!
عمرسمره أول مصرى يوصل لقمة إفريست. "عمر" غير حياته 180 درجة لما إكتشف إن شغفه الحقيقى إنه يكتشف العالم و مش مجرد زيارة سياحية بشوية صور لطيفة.
عمر "قرر" إن حياته تبقى سلسلة مغامرات، فسافر فى 370 يوم حوالى 14 دولة فى أسيا و أمريكا اللاتينية وتسلق أعلى سبع قمم جبالية فى السبع قارات، وسافر القطبين و حاليا بيحضر لرحلة الفضاء.
وبسبب حب "عمر" للمغامرة أسس شركة WildGuanabana عشان هو مؤمن إن السفر ليه تأثيرات سحرية. الشركة متخصصة فى سياحة المغامرة ، يعنى إيه ؟
سياحة المغامرة
ده نوع من السفر غرضه إنك تستمتع بطبيعة البلد إللى إنت مسافرها من خلال رياضات زى تسلق أو مشى الجبال و التجديف و الغوص إلخ. Wild Guanabana بترتب الرحلات من النوع ده وممكن المسافرين ينشروا تجربتهم من خلال الموقع . أنت كمان ممكن تختار الرياضة إللى حابب تجربها و هيظهرك الرحلات الموجودة للرياضة دى.
الحياة مغامرة بلاش تقعد مكانك وتتفرج على صور وأنت ممكن تشوف ده بعينك وتستمتع بيه.. جرب واقرأ ويمكن تظبط، بس أهم حاجه إكسر القوقعة و شوف الدنيا.
