إزاي تعمل اللي أنت عايزه من غير ما تزعل أهلك؟

طبيعي يكون في اختلاف في الأجيال من ناحية الإمكانيات المتاحة والعادات والتقاليد، لكن احنا جيلنا مختلف تماما عن الجيل الي قبله. احنا جيل محشور بين العادات والتقاليد الي أهالينا متمسكين بيها من غير أي أسباب غير انها بس عادات وتقاليد، وبيحاول يتخلص منها عشان يعيش حياة طبيعية، احنا كمان الجيل الي بدأت طفرة انتشار التكنولوجيا وهو لسه بيبدأ حياته، والجيل الي كان ومازال بيتعرض للقهر والكبت والوصم الاجتماعي.

مهما اختلفنا معاهم، فأهلنا هم أكتر ناس بيحبونا وبيكونوا خايفين فعلا علينا، لكنهم مش بيعرفوا يعبروا عن دا، وكمان لو بيعبروا فأساليب التعبير بتختلف عن توقعاتنا، لأن تفكيرنا مختلف عن تفكيرهم، كمان أحنا متاح لينا حاجات مكانتش متاحة ليهم زمان وبالتالي بقينا عارفين حاجات هم مش عارفينها.

البنات بالذات ممكن يواجهوا مشاكل كتير لما يحاولوا يقنعوا أهاليهم بحاجة عايزين يعملوها وهم مش راضيين.

" عشان أقنع أمي أسافر أدرس واشتغل في القاهرة، قولتلها الكلام الي هيريحها، قولتلها دي هتبقى فرصة أني الاقي عريس واتجوز زي ما هي نفسها يحصل" ضي - 25 سنة

" لما كنت عايزة ادخل الكلية في القاهرة وانا من بنها، بابا وماما ماكانوش موافقين، بس لما شافو تأثير رفضهم عليا وأد ايه انا متضايقة وبقالي فترة مش بتكلم ولا بشارك معاهم ف البيت ودي مش طبيعتي، وافقوا اني اسافر أدرس" شيماء - 23 سنة

لو عايز تعمل الي انت عايزه وفي نفس الوقت متتصادمش مع أبوك او أمك دي محتاجة ذكاء وتخطيط وشوية تنازل، دي شوية نصائح عشان تعرف تتعامل مع رفضهم:

1- اختار المعاد المناسب 

متجيش وقت ما أمك أو أبوك متنرفز أو مشغول أو بياكل وتطلب منه انكو تتكلمو ف أي موضوع أو تطلب طلب انت حاسس انك مش هيوافقوا عليه.

2-الهدوء مهم في الحالة دي

لو باباك أو مامتك بيتعصبوا بسرعة ،يبقى لازم تاخد بالك أنك تكون هادي خالص في حوارك معاهم، ومتدخلش في صدام مباشر.

3- اعرف هم بيحبوا ايه واعمله

دا قبل ما تطلب طلبك على طول، خلي فيه تمهيد مثلا اشتري لمامتك طلبات البيت، أو وديها مشوار كانت عايزة تروحه أو أيا كانت الحاجات الي بيحبوها.

4- اعرف شخصياتهم كويس

لو باباك أو مامتك دوافعهم دايما ف منعك من أي حاجة هي أنهم خايفين عليك، اقنعهم ان الي هتعمله مش حاجة خطيرة، وأن ناس يعرفوهم عملوا كدا مثلا أو حد من صحابك هم بيثقو فيه.

5- حضر إجابات كل الأسئلة الي ممكن يسئلوها

توقع رد فعلهم، ودا سهل لأن الجيل دا صعب التغيير وغالبا شخصيته ثابتة وردود أفعاله سهل تتوقعها، وبالتالي بسهولة.

6- التنازل

قبل ما تتناقش مع باباك أو مامتك حدد ايه الحاجات الأساسية اللي مش هتتنازل عنها، وإيه الحاجات اللي ممكن تتنازل عنها لو هم صمموا. وجهز نفسك دايما أنه يكون في تنازلات عشان توصل للهدف الأساسي الي انت عايزه.

أوقات كتير أهالينا بينشفوا دماغهم على حاجات بنكون احنا عايزينها بس هم شايفين أنها مش مناسبة لينا، قبل ما تتصادم مع أهلك اتأكد ان الحاجة دي تستاهل فعلا أنك تحارب عشانها، لأنك كمان لما تكون متأكد من الي انت عايزه دا هيديهم ثقة فيك، وفي نفس الوقت تكون واقف على أرض ثابتة وانت بتتناقش معاهم وتقنعهم بوجهة نظرك.