رئيس التحرير أحمد متولي
 10 عبارات للرجل تُسيء فهمها المرأة

10 عبارات للرجل تُسيء فهمها المرأة

الحياة بينهم دايمًا ألغاز، اللي يقولوا هو متفهموش هي، واللي تقولوا هي ميحسوش هو، ومادام كل واحد مستني التاني يفهمه من غير كلام هتزيد المشكلة ويبقى مستحيل يوصلوا لحل مع إن الصراحة مفيش أحسن منها.

الصراحة!! آه مهو لو كان الولاد والبنات متربين على إن اللي يتقال يتفهم زي ما هو، مكنش بقى فيه كلام يقوله الراجل تفهمه الست غلط.

وعلشان ميبقاش في سوء تفاهم «شبابيك» قرر إنه يجمعلك أشهر 10 عبارات يقولها الرجل وتسيء فهمها المرأة كما جاء في استطلاع الرأي الخاص بالموقع.

  • مشغول دلوقتي

لما يقولك مشغول، مش معناه إنه مش عاوز يتكلم معاكي أو معاه واحدة تانية، علشان كده لازم تحترمي مواعيد شغله وتساعديه إنه يخلص من غير أي ضغوطات يومية.

  • أنا مع أصحابي

مين مننا مبيحبش يكون ليه وقت خاص مع أصحابه بعيد عن الشغل وحتى عن البيت والأهل، بس ده مش معناه إنه بيفضلهم عليكي، علشان كده لازم تسيبيله مساحته الخاصة معاهم من غير أي ملل.

  • الموبايل كان على الشاحن

مش لازم لما يتأخر عليكي في الرد يكون بيخونك مع واحدة تانية، ممكن فعلًا يكون الموبايل على الشاحن وبعيد عنه، الزعيق وكتر الشك مش هيقربه بالعكس ده هيخليه يبعد لمسافات مش هتعرفي ترجعيها تاني.

  • نفسي تتعلمي تعملي كذا

مش معنى إنه عاوزك تتعملي حاجه سواء كانت أكل أو مهارة أو أي شىء تاني إنه بيفكر في نفسه ومش عاوز غير مصلحته الشخصية، ممكن يكون شايف إن المهارة دي هتضيف ليكي أو هتفيدك بعدين في حياتكم مع بعض.

  • أنا متضايق

الراجل لما بيكون متضايق مبيبقاش عاوز يتكلم، يعني لما يقولك الجملة دي احترمي رغبته وبلاش تصممي إنك تعرفي السبب اللي مدايقه، خليه هو بنفسه اللي يجي ويحكيلك من غير ما تكوني إنتي كمان ضاغطة عليه.

  • الموضوع مش مستاهل

الجملة دي لما يقولهالك، لازم فعلًا تكوني واثقة إنه مقتنع بيها مش مجرد وسيلة علشان ينهي الكلام أو محاولة منه للسخرية من اهتمامك بالموضوع، هو لما بيقولها بيقصدها فعلًا علشان كده لازم متكبريش الموضوع.

  • أنا كويس

حاولي تفهمي كلامه زي ما بيقوله لإن طبيعته مختلفة عنك، علشان كده لما يقولك أنا بخير لازم تعرفي إنه فعلًا كويس، مش لازم تصممي إن في حاجه وهو مخبيها عنك أو إنه عاوز يبعدك عن مشاكله ومش عاوز يشاركك فيها.

  • عاوز أنام

لو عاوز ينام وهو بيكلمك خليه على راحته ومتتخانقيش؛ لإن مش معنى إنه عاوز ينام إنه بيفضل النوم عنك أو إن الشغل بتاعه أهم منك، نجاحكم مع بعض راجع لأسلوبكم في التعامل ومدى التفاهم اللي بينكم.

  • إنتي ست بيت مفيش منها

معروف إن الراجل لما بيقدر دور زوجته في حياته بيحب دايمًا يعبر بالكلام، بس الغريب إنه لما بيقوم بالدور ده وبيشكرها هي تعتبرها معايرة لإنها قاعدة في البيت.

  • اعملي اللي تشوفيه​​​​​​​

الجملة دي لما بيقولها الراجل مش معناها إن الأمر مبيهموش أو أنه مش حابب يشغل نفسه بيه أو حتى يتحمل مسؤوليته، لإنه ممكن يكون شايف إنك هتعرفي تقرري صح أو ممكن يكون مشغول ومش هيعرف يوصلك لقرار يفيدك.

سوزان حسني

سوزان حسني

صحفية مهتمة بالكتابة في مجال العلاقات