للبنات.. جمل لو سمعتيها ماتصدقيهاش

الولاد أنواع..كل نوع بيختلف عن التاني في طريقته.. في التعبير والكلام، لكن أغلبهم بيتشابهوا في حاجة واحدة وهي "حبهم للبنات"، وعلشان كده لازم تاخدي بالك لو مرتبطة أو هترتبطي.

في جمل لما تتقالك من ولد بيحبك أو لسا بيلمحلك بحبه ما تصدقيهاش بسهولة زي الكلام اللي جاي:

1- "إنتي مختلفة جداً، ومميزة عن كل البنات، أنا مش عارف ليه إتشديت لك كده" يمكن إنتي فعلاً مختلفة بس هو بيقولك الجملة دي عشان تتشدي له وتحسي إنه مهتم بيكي وشايفك حاجة تانية رغم إن الجملة أساساً عكس بعض يعني هو شايفك مميزة ومش عارف إتشد لك ليه؟ إزاي؟!، ساعات الكلام بيكون صادق وساعات لأ، إنتي وإحساسك بقى.

2- "إني أري الرب في عينيكي، عينيكي دي بتفكرني بصوت فيروز في ليلة شتوية وتدفيني" دي جملة ممكن تسمعيها من ولد عميق عايزك تنبهري بيه، والبداية دي عمرها ما كانت مبشرة لأنها بتأدي لنهاية مش هتحبيها، إبعدي عن مدعيين العمق من أولها أحسن وإتفرجي عليهم من بعيد.

3- "أنا مؤمن بحرية المرأة وبدافع عنها بكل طاقتي" ولأن كل البنات بتحتاج حد يقولها أنا مؤمن بيكي وبحريتك.. هتتشدي للنوع ده، لكن غالباً الولد اللي بيفضل يكرر جمل عن حرية المراة وهو أساساً مش فاهمها وخاصة جملة "كل البنات حلوين" اللي بتبسط بنات كتير، ده بيبقى عايز يجرب كل البنات فعلاً ومش هتكفيه بنت واحدة..

مفيش حد بيدافع عن حرية حاجة بيفضل يقول "أنا موجود" كل شوية ويرفع شعارات بدون فعل، في الأول هتنبسطي لكن في الآخر هتكتشفي راجل شرقي عادي جداً شايف إن مجرد تفكيرك في إنك تحطي صورتك على فيسبوك جريمة وفُجر في حين إنه لسا بيقول للناس إنه "متحرر" وشايف إن البنات ألطف الكائنات فعلاً.

4- "إنتي مراتي" دي جملة بيقولها الولد لبنت داخل معاها في علاقة عاطفية مش لحبه الشديد فيها ولأنه حاسس بالمعني النفسي والعاطفي لكلمة "مراتي" لأ ده لأنه شايف إن فيه متعة جسدية من الكلمة، مش مراته بقى يبقى حقه؟!.. لما تسمعي الجملة دي ياريت تعيدي تفكيرك وتقييمك للعلاقة من جديد.

5- "لست أنا الذي أهتم بالأبد" دي جملة من أغنية لكاظم الساهر ممكن يقولها لك الولد عشان من الآخر يوصل لك فكرة "هنحب بعض آه بس نكمل مع بعض ليه؟ مش مهم"..الولد ده مش بيخاف من الإلتزام أو مثلاً عنده قلق من مستقبله لأ ده بيبقى واخدها حجة عشان لما تقوليله "ليه كده ده أنا إتغيرت علشانك" بصوت غادة عادل وإنتي متأثرة.. يقولك "أنا ماوعدتكيش نكمل".

6- "أنا بحبك بس عندي جيش" لحد دلوقتي محدش من العلماء فسر وجود إرتباط بين الحب والجيش، يمكن علشان هما الإتنين صعبين، لكن برضه إيه المانع ولا هو الجيش لا يعرف الحب؟

عامة الجملة دي بتتقال لما يكون الولد جاب آخره في العلاقة ومش عارف "يخلع" فقال يجيبها كده..ده تعمليله باي باي وتدعي عليه في سرك لو داخل جيش بجد "يلبس" في 3 سنين.

7- "أهلي مش موافقين على جوازنا و عايزني أتجوز بنت خالته بس أنا هحارب الدنيا علشانك" الجملة دي بتتقال لما الولد بيبقى حابب يحتفظ بعلاقته مع البنت وفي نفس الوقت "يشوف حاله" مع بنت تانية ويستقر وشايف إن البنت دي مش إنتي بس برضه بيقول "وماله زيادة الخير خيرين ماخسرهاش"، إنتي بقى ماتخليهوش يحارب الدنيا الوهمية اللي بيخترعها دي وسيبيه من سكات، مفيش حد في الزمن ده بيتجوز غصب عنه خاصة لو كان ولد وكمان من بنت خالته!

8- "إنتي تستاهلي واحد أحسن مني بكتير" أكتر جملة كليشيه ومبتذلة بيستخدمها الولد في إنه ينهي علاقته ببنت خلاص مابقاش عايزها.. تحسي إنه فجأة بيكتشف إنك "ملاك الرحمة الطاهر" وإنه "شيطان جهنم البرتقالي" وماتستاهليش حد زيه، هو بصراحة ماكدبش في دي لأنك تستاهلي حد أحسن من كده بمراحل وردك على الجملة دي لازم يكون شبه كده "تصدق صح، أنا معرفش ماكنتش واخدة بالي إزاي،باي".

9- "أنا همشي، بس أنا هفضل جمبك..خلي بالك من نفسك" تركيبة الجملة مش مقبولة أساساً، إزاي هتمشي وإزاي جمبي؟ وبعدين إفرض انا مش عايزة أخلي بالي من نفسي،إنت بقى دخلك إيه؟.. اللي زي ده يتنسي خالص لأنه حتى مش صريح في قراراه وعايز يمثل دور الصديق الصدوق وده مش مقبول.

من الآخر في أنواع ولاد كتير هتقابليها، منافقة وصادقة..بتحب وبتتسلي، هتقابلي كل الأنواع اللي كان ممكن تتخيليها أو اللي عمرك ما توقعتي وجودها أو عرفتي عنها قبل كده.. الفكرة في كل الكلام ده الكلام طالع من مين وإزاي؟، ممكن حد يقول لك الجمل دي فعلاً ويكون صادق وده نوع نادر لكنه موجود، اللي يفصل في كل ده "الإحساس".. ما يمنعش برضه إن الإحساس بيخون صاحبه ساعات بس التجارب أياً كانت بتعلم وما بتتنسيش.