إزاي تطفشي عريس من غير ما تزعلي أهلك؟
زمان مكنش مسموح للبنات إنها تختار الشخص اللي هتقضي معاه عمرها كله، وكإن الجواز اللي ربنا حطهولنا في منزلة المودة والرحمة مجرد وسيلة علشان استمرار البشرية.
بس مع تطور العصر اللي سمح للبنت بالدراسة والشغل زيها زي الولاد، تفكير البنت اختلف وبقت عارفة إن من أهم حقوقها اختيار البني آدم اللي هتعيش معاه. صحيح إن ده حق مهم بس في عرف الأهل حق مش مشروع وخصوصًا لو بتكبري في السن.
ولإن أسرع وسيلة للجواز هي الصالونات اللي أغلب البنات بتتجبر عليه، «شبابيك» هتعرفك بعد استطلاع رأي عملته مع البنات إزاي تطفشي عريس بمنتهى البراءة ومن غير ما يحس أهلك إنك قاصدة؟
والدة العريس
الأم لما بتفكر تختار عروسة لابنها بتحب تختار واحدة مناسبة لشخصيتها وتقدر تسيطر عليها، ولو عرفتي تستغلي النقطة دي وتحسسيها إنك ليكي شخصية مستقلة ومش هتوافقي على أي حاجة تقولها حتى لو ابنها عاوز يرتبط بيكي الجوازه هتبوظ.
لما تقعدي معاهم خلي أهلك يطلبوا منه إنه يقعد معاكي تتكلموا لوحدكوا عشان تعرفي شخصيته، وفي الوقت ده هي هتحس إنك بتخرجيها من حياتكو بشكل مش مباشر وهترفضك. اقرأ أيضًا⇐عشان ترتاحي.. اهتمي بنفسك وخلي العريس على ربنا.
تفكيره متناقض
لما تقعدي معاه حاولي تسمعي كويس كل اللي هيقوله علشان تعرفي تقولي عكس الحاجات اللي هو عاوزها، يعني مثلًا هيقولك «أنا معنديش مشكلة في شغلك بس في نفس الوقت لازم تشتغلي بس في مجالك ومتخرجيش منه».
في الوقت ده تقدري تستغلي النقطة دي لإن مش لازم تشتغلي في مجالك الجامعي ممكن تكوني حابه تغيري المهنة وهو بالشكل ده مش هيرضى، أو إنه بيتظاهر بحرية المرأة وحقوقها وهو مش موافق إنها تتعامل أصلًا مع زمايلها الولاد في الشغل.
اقنعيه إنك تافهة
معظم اللي بيتجوزو بالطريقة دي بيبقوا عاوزين شخصية بشروط معينة أهم حاجة فيها إنها تقدر تتحمل مسؤولية بيت وأسرة وده بيبقوا شايفينه صعب مع زميلاتهم اللي حسوا معاهم إن شغلهم ومستقبلهم أهم من مرحلة الجواز عندهم.
علشان كده حسسيه إنك تافهة ومضايقة مثلًا من إن صاحبتك نزلت الصورة السيلفي اللي مكنش شكلك فيها مظبوط علشان هي شكلها كان حلو.
استرجلي
لازم تعرفي إن إنوثتك دي أهم حاجة بتشده ليكي، يعني الخجل وقلة الكلام وطريقة المشي هما الأساس اللي بناءً عليه بيقول موافق على إنه يأخد خطوة تانية ولا لأ. اقرأ أيضًا⇐ مستعد للارتباط؟.. الأمور دي لازم تاخد بالك منها الأول
علشان كده طالما أنتي مش عاوزه الموضوع يكمل حاولي لما تقعدي معاه بحجة إنك تفهمي دماغه، اتعاملي بشكل رجولي يحسسه إنه جاي يخطب واحد صاحبه، عرفيه إنك بتكرهي أي حاجة بتستخدمها البنات سواءً كان مكياج أو فساتين.. إلخ.
طوّلي فترة الخطوبة
تقريبًا مفيش عريس صالونات غير وبيبقى عاوز يتجوز بسرعة يعني بكتير أوي سنة، وده لو حدد المدة؟ هنا بقى أنتي لازم تعرفي الأول هو مستعجل ولا لا؟
لو فعلًا كان مستعجل تقدري تقوليله إنك مش هتقدري تتجوزي قبل سنتين مثلًا بحجة إنك لازم تعرفي شخصيته كويس قبل ما تتجوزو، ولو هو ممكن يستنى قوليله إنك مش هينفع تستني حد الفترة دي كلها لإن تقاليد العيلة متسمحش بالمدة دي.
