اللي بيكدب بيبان عليه.. حركاته الـ6 دي هتفضحهولك
لغة الجسد علم يُدرس في الجامعات حول العالم ويستخدم في مجالات كتير زي مجال البيزنس، والمخابرات، والمجالات المرتبطة بالتواصل الاجتماعي، لأن حركات أجسادنا بتعبر عن اللي بنحس بيه ومن الصعب السيطرة عليها.
في بحث جديد أجرته الطبيبة النفسية الشرعية بكلية «هاس» لإدارة الأعمال في جامعة كاليفورنيا لاين تين بريك اتضح إن لغة الجسد من الصعب التحكم فيها، حتى لو حاولنا نكذب.
لاين تين بريك درست في بحثها التفاعلات الجسدية العصبية والنفسية للأشخاص اللي بيكدبوا ونشر موقع Business Insider كلامها حول النتائج دي.
وقالت الباحثة إن لغة الجسد من الصعب التحكم فيها إلا عن طريق تدريبات متخصصة ولفترات زمنية طويلة، عشان كدا من السهل أنك تحدد شخص بيكذب من حركات جسمه.
وفي بحثها حددت «لاين» الحركات اللي أغلب الأشخاص لما يكونوا بيكذبوا أو بيخفوا جزء من الحقيقة بتصدر عن أجسادهم لا إراديًا.
- حركة الرأس غير الطبيعية
لو وجهت للشخص الكذاب سؤال مباشر وهو كان باصصلك لكنه فجأة غير اتجاه راسه، وبص في اتجاه تاني غير اتجاهك قبل ما يجاوبك، فده قد يعني بنسبة كبيرة أنه مش بيقول الحقيقة.
- سرعة التنفس بتتغير
لما حد بيكدب سرعة تنفسه بتزداد وبيحس أن عنده جفاف في الحلق، خصوصًا في الوقت اللي بيقول فيه الكدبة لأن ضغط الدم ومعدل نبضات القلب بتزيد بشكل عام عشان تمد الجسم بالطاقة اللي بيحتاجها في المواقف اللي بتسبب التوتر- زي أنك تكذب.
- تكرار كلام معين
دا لأنهم بيحاولوا يقنعوك ويقنعوا نفسهم بالحاجة الي بيكرروها، وعشان كدا بيستمروا في تكرارها عشان تبدو منطقية، غير أن دي حيلة عشان يقدروا يقولوا كلام مترتب لانهم لما يكرروا الكلام نفسه، دا بيديهم وقت يجهزوا باقي الكلام اللي هيقولوه.
- لمس الفم أثناء الحديث
الحركة دي ليها أكتر من تفسير في لغة الجسد، وأحد التفسيرات هو أن اللي قدامك بيكدب عليك أو أنه مش عايز يتكلم في حاجة معينة.
فعندما يضع البالغون أيديهم حول أفواههم، فإن هذا يعني أنهم لا يريدون أن يقولوا شيئا ما، ولذلك لا إراديًا يحاولون أن يمنعوا أفواههم من نطق هذا الكلام.
- الإشارة بأصابع الاتهام
لما بنكدب بنبقى مش عايزين الشخص يركز في الكلام أوي، لأنه لو ركز فيه ممكن يكتشف الكدبة، عشان كدا بنحاول نشتت انتباهه بأي حاجة تانية وأسهل حاجة بيكون اتهامه هو بأي تهمة، عشان ينشغل بالدفاع عن نفسه ومينتبهش للكدب.
المشرفة على البحث والمحللة السلوكية وخبيرة لغة الجسد ومؤلفة كتاب «علامات لغة جسد الكذابين» ليليان جلاس تقول إن الشخص الكاذب عندما يشعر أن كذبته على وشك أن تنكشف، فإنه سيتخذ وضعًا دفاعيًا وقد يوجه أصابع الاتهام للمستمع لأنه غاضب منه لأكتشافه الكذب.
- البقاء ثابتا
تقول «جلاس» إن الشخص العادي يتحرك حركات لاإرادية وهو بيتكلم، حتى لو حركات بسيطة باليدين أو الرجلين، لكن غير طبيعي أن الشخص وهو بيتكلم يكون ثابت تمامًا كأنه بيترقب نتيجة كذبه وهل هينكشف أم لا.
توضح «جلاس» أن الثبات الشديد للمتكلم قد يكون إشارة على أنه يواجه صراعا داخليا بالفعل حول كلامه، وأنه يجبر جسده على انتظار شيء ما أو البقاء ثابتًا الآن حتى تمر تلك الأزمة أو المشكلة (التي دفعته للكذب في الأساس).
المصدر: 1
