مرتبطين وعندكوا مشاكل؟.. الحل في 6 طرق
الخلافات في العلاقات شيء طبيعي جدًا، ومفيش علاقة مهما كانت قوتها مبيحصلش فيها خلافات، لكن الفرق بين علاقة والتانية هو إزاي أطراف العلاقة بينظموا تعاملهم مع بعض خلال فترة الخلافات دي.
مبدئيًا لما يكون في مشكلة أو حاجة مضايقاكوا، لازم تتكلموا فيها وتعبروا عن رأيكوا لبعض، لأنه في دراسة اتعملت في جامعة «وينستون» (في أمريكا)، تتبعوا فيها 97 من المتزوجين حديثًا لمدة 3 سنين.
ووجدت الدراسة إن الأزواج الي بيتجنبوا الكلام في موضوع معين أو مشكلة ما بيبقى بينهم خلافات ومشاكل نفسية على المدى البعيد وبتختفي السعادة من حياتهم بالتدريج على العكس من الأزواج الي بيتناقشوا ويتكلموا حتى لو النقاشات بتكون حادة في بعض الأوقات.
اتفقوا على الاختلاف
مفيش اتنين زي بعض في العالم، عشان كدا مهما كنتوا شبه بعض في كل حاجة، هتلاقو حاجات مختلفين فيها ولازم لما تختلفوا تكون طريقة الاختلاف واعية وناضجة.
لو مش حاطين قواعد للنقاشات، ابدأوا من دلوقتي حطوا القواعد دي، وهتلاحظوا اختلاف كبير، وحطوا كمان عقوبات لخرق القواعد تختاروها مع بعض، وتتفقوا عليها تماما بحيث عند التطبيق ميكونش في اعتراض.
صياغة المشكلة بكلمات أقل
عشان توصل أي معلومة لأي حد، اتبع الأسوب دا، بأنك تشرح المشكلة بأقل الكلام، خاصة لو أنتو منفعلين ومش مستحملين كلام كتير حول موضوع معين أو كلام كتير عامة. قوليله أو قولها المشكلة باختصار شديد وانتظر الرد.
مثلا: بدل ما تقوليله «أنا قولتلك كذا مرة متبقاش متسرع بالشكل دا، وحاولت معاك كتير إنك تغير من نفسك بس مفيش فايدة، وأنت هتفضل كدا على طول» استبدلي الكلام دا كله بـ «أنت عندك مشكلة في التسرع».
اسمعوا بعض
بعد ما كل واحد فيكو بيحدد المشكلة بالنسباله بوضوح وبصراحة، خدوا وقت انكوا تسمعوا بعض. خلو تنظيم النقاش حتى وأنتو منفعلين أولوية بالنسبالكو، لأن دا الي هيساعدكوا تحلو المشكلة بسرعة وبأقل خسائر ممكنة.
متدخلوش في نقاشات فرعية
لو أنتوا بتتناقشوا في حاجة معينة بس الكلام فتح مواضيع تانية، التزموا بالنقاش في الحاجة دي، ولو في مشاكل فرعية حددوا وقت تاني للكلام فيها لكن متبعدوش عن الموضوع الأصلي الي بتتناقشو فيه لأن دا هيخلي النقاش غير منظم وفيه فرعيات كتير مش هتوصلكو لحاجة.
واحد يشد وواحد يرخي
العصبية من أكتر الحاجات اللي بتدمر العلاقات لأن العصبية بتخرج أسوأ حاجة في أي إنسان، الشخص المتعصب دا مش بيبقى عارف هو بيقول إيه وممكن يقول كلام ميقصدهوش أو يعمل تصرفات يندم عليها بعد كدا، ولما يكون في طرف عصبي لازم الطرف التاني يكون هادي، دا هيرجع للطرف اللي عايز العلاقة تستمر أو حريص على الطرف التاني أكتر.
إنهاء النقاش
دايمًا بعد أي نقاش، حددوا وصلتوا لايه في النقاش خاصة النتائج الإيجابية زي أنكو قربتوا من وجهات نظركوا أو اتفقتوا على حاجة معينة، حتى لو النتائج دي هي انكو بس عبرتوا لبعض عن اللي جواكوا، وفكروا بعض أنه مهما اختلفتوا علاقتكوا أهم من أي خلاف، وأن الخلافات شيء طبيعي ومش معناها أن علاقتكم هتنتهي.
أما لو ظهرت العلامات اللي هـنـــا في علاقتكوا يبقى لازم تنتبهوا أن في حاجة غلط وتهتموا بحل المشكلة قبل فوات الأوان.
اخترنا لك:
