علشان «اعتذارك» يتقبل.. 5 حاجات لازم تعرفها كويس
معظمنا بيتعامل مع «الاعتذار» على إنه مجرد تقضيه واجب، لازم اللي قدامنا يقبله أيًا كانت الطريقة اللي احنا بنتعامل بيها، ولما الطرف التاني بيرفض، بتزيد الإساءة وبننسى إننا كنا غلط من البداية.
وعلشان كده «شبابيك» بيعرفك، في التقرير ده، على 5 نصائح لو التزمت بيها هتخلي الطرف التاني يقبل اعتذارك بسهولة ومن غير أي مشاكل.
- حاسب نفسك أولًا ثم اعتذر
طبعًا الاعتذار ثقافة مهمة وخصوصًا في العصر اللي إحنا فيه دلوقتي، بس الأهم إنك قبل ما تعتذر لأي شخص على أي إساءة تحاسب نفسك علشان متكررش الغلط تاني.
حسابك لنفسك معناه إنك مقتنع إنك غلطت، وبالتالي ده هيظهر جدًا في الكلام اللي هتقوله وأنت بتقدم اعتذارك، والخطوة دي هتساعدك كمان في اختيار كلام معين علشان متزودش الغلط بغلط أكبر.
- اختار الوقت المناسب
إيه فائدة اعتذارك لشخص ما وهو مضايق أو مشغول بحاجة مهمة؟ في الوقت ده يا إما هو هيحس إنك مش مهتم أصلًا بالاعتذار وبالتالي هو مش هيقبل، أو هتزود المشكلة بإنه يتنرفز عليك ويسمعك كلام أوحش كتير من الغلط اللي أنت عملته في حقه.
علشان كده بنقول إن اختيار الوقت هو اللي بيحدد موافقته ولا لأ زي بالظبط لما تروح لوالدك وهو مبسوط علشان تطلب منه طلب وأنت عارف إنه هيوافق.
- لا تبرر كثيرًا
معروف إن الكلام الكتير أحيانًا بيوصلك للغلط، بمعنى إنك تروح تعتذر لحد فتقعد تقول مبررات كتير ممكن يكون منها حاجة مينفعش تقولها من الأساسي.
وبدل ما تلاقي نفسك بتخلص من مشكلة، تدخلك المبررات في واحدة تانية أكبر أنت مش قدها، حاول تمتص غضبة ومتزودش الأزمة بكلام مش هيضرك أنت أول واحد.
- اسمع وناقش بتهذيب
قبل ما تبدأ كلامك معاه لازم تعرف إنه أكيد هيرد عليك، وهيحاول يطلع شحنة الغضب بتاعه بأي طريقة علشان كده درب نفسك على السكوت اللي ميستفزهوش.
اعرف متى تتكلم ومتى تسكت، متى ترد صح بمبررات تقوي موقفك مش تضعفه، ومتى تقول أنا غلطت، ده هيكبرك في نظره وهيزود احترامه ليك.
- ابتعد عن الانفعال
طالما أنت ناوي تعتذر عن غلطة عملتها يبقى ابعد خالص عن الانفعال لإنه هيوصلك لنتيجة أنت مش هتكون حاببها في النهاية.
كمان الانفعال ممكن يضيع حقك لو كان الشخص ده غلط فيك هو كمان، والتالي أنت هنا بتكبر المشكلة وبتزودها مش بتحلها خالص.
