احذروا هذه الكلمات في العلاقة العاطفية

الكلمة دايمًا ليها تأثيرها وخصوصًا في العلاقة العاطفية لأن ممكن بكلمة واحدة الدنيا تتقلب بينكوا رأسًا على عقب وعشان تاخد حذرك فيه 4 كلمات أوعى تقولهم لأنهم ممكن يدمروا علاقتك العاطفية.

4 أسباب تؤدي لفتور الحياة بين الزوجين

مفروض

لما تقعد تقول «مفروض تعمل أو تسوي» في كلامك عمال على بطال ده بيحسس الطرف التاني إنك بتمارس عليه سلطة وقمع، وإنه عليه السمع والطاعة وده طبعًا شيء سيء جدًا.

لأن العلاقة العاطفية معناها «إتنين = بعض»، مفيش واحد مفروض يمارس سلطته وهيمنته على التاني واللي لازم يحصل هو المناقشة بينكوا اللي بعيدة تمامًا عن الفرضية.

ممكن تقول مثلًا «إيه رأيك تحاولي كذا»، بأسلوب لطيف. يعني كلامك يبان فيه إنك بتتكلم بغرض إنك بتحب مش بغرض إنك تفرض سلطتك على الطرف التاني.

أنت

«أنت عمرك ما بتكلمني.. أنا اللي دايمًا بكلمك» أو «أنت بتهتم بأصحابك أكتر مني». كلمة «أنت» في الجملتين دول استخدامك ليها غلط جدًا لإنك بتحسسيه إنه موضع اتهام ولازم يدافع عن نفسه مع إنك مش قاصدة ده.

وقاصدة تقوليلوا «أنا محتاجة إنك تهتم بيا» يعني قصدك كويس بس زعلك منه بيخلي كلامك طالع بأسلوب اتهام أوله كلمة «أنت كذا ». وعشان الموضوع ميبقاش باين إنك بتتهميه حاولي بدل من كلمة «أنت» تقولي إحساسك «أنا حاسة كذا ولما حصل ده حسيت بكذا».

الحب من النظرة الأولى.. حقيقة ولا خدعة؟

لازم

لما تقول «لازم إنك تعملي كذا» أو «اللي إنتي بتقوليه مش صح لازم إنك..» وهكذا. كلمة «لازم» دي بتكون كلمة مستفزة على سمعها لأنها بتكون حاسة إنك بتأمرها.

وبتحس كمان إنك مش مهتم برأيها ولا شايف إنها بتفكر صح. فبدل من الكلمة دي حاول تقول «أنا حابب ليكي إنك تعملي كذا» أو «هيبقي مفيد جدًا إنك تحاولي تعملي كذا».

التوقع

«كنت متوقع إنك. نقطة ومن أول السطر» مينفعش الكلمة دي تكون موجودة في العلاقة لأن التوقعات اللي بتتتقال بتكون مبنية على سوء ظن بالطرف الآخر وبتكون كلها غلط في غلط وإتبنت بناءً على ضيقتنا من الطرف ده تفسيرنا للأمور بشكل غلط.

فأفضل شيء هو إنك تتعامل مع الطرف الأخر بدون ما تتوقع حاجة وحشة منه ولو كنت مضايق منه إهدى وخليك مستعد إنك تسمع وفكر قبل ما تتكلم.

وخلي المقولة دي دايمًا في دماغك «السلام يبدأ عندما تنتهي التوقعات».

المصدر