كيف تكسب احترام الآخرين؟.. (انفوجراف)
مين فينا مبيتمناش إن اللي حواليه يحترموه ويقدروه أكتر من أي حد تاني، طبعًا الاحترام حق مكفول لكل بني آدم، بس الواقع بيقول إنه مبيحصلش غير لما تصرفاتك إنت بتبقى صح.
بمعنى أوضح عشان تُحترم لازم إنت كمان تكون قد الإحترام ده في كل شىء بما فيه سلوكك وتصرفاتك، كل اللي عليك دلوقتي إنك تلتزم بالـ5 عناصر دي علشان تحصل على احترام الآخرين.
- احترام المواعيد
طالما بتفكر في طريقة تكسب بيها إحترام المحيطين ليك، يبقى لازم تحط في بالك إن ده عمره ما هيحصل وإنت مبتحترمش مواعيدك مع اللي حواليك.
متنساش كمان إن النقطة دي بتخلي وجهة نظرهم عنك سطحية وبتحطك في زواية وصورة صغيرة عمرك ما هتخرج منها مهما كانت إنجازاتك كبيرة في أي مجال.. ده غير إن مواعيدك هتبقى مصدر عدم ثقة من اللي حواليك وبالتالي عمرهم ما هيحترموك.
- الاعتذار
لو شايف إن الإعتذار كثقافة بتقلل من مكانتك تبقى أكبر غلطان، بالعكس هي بتزود قيمتك عند اللي حواليك.
ولما حد يقولك إنت كده ضعيف، لازم تعرف ترد عليه طالما أنت مقتنع بغلطتك.. بس اوعى في يوم تعتذر لمجرد إنك تعدي الموقف؛ لإن اللي بيزيد عن حده بينقلب ضده، وممكن الناس اللي بتحترمك دلوقتي علشان ببتعتذر يشوفوك بعد كده شخص مش كويس بيقول كلام وبس علشان ليه مصلحة معينة.
اقرأ أيضًا⇐علشان «اعتذارك» يتقبل.. 5 حاجات لازم تعرفها كويس
- التواضع مع الغير
لازم تعرف إن تواضعك مع اللي حواليك هيحببهم فيك وهيزود احترامهم ليك، وده على العكس تمامًا لو كان أسلوبك فيه تعالي عليهم.
علشان كده بلاش تتكلم عن نفسك كتير لإن ده هيبعدهم عنك بالمشوار وهيحسسهم إنك بتكذب عليهم في حاجات كتير حتى لو كنت صادق، خلي دايمًا تصرفاتك هي اللي تقول إنت مين مش لسانك.
- مساعدة الآخرين
تخيل كده إنك عرفت مشكلة واقع فيه حد من أصحابك أو حتى جارك وحاولت تعرض عليه مساعدتك من غير ما يطلب هو منك أي حاجة؟ عارف هنا إنت هتعلى في نظره قد إيه؟
حتى لو كانت مساعدتك مجرد كلام أو إن آخرك في المساعدة تبقى جنبه وبس، صدقني هيحترمك وشخصيتك هتكبر في نظره مقارنة بغيرك اللي حتى مساعدكش بالفعل ولا بالكلام.
اقرأ أيضًا⇐أنت حاسس بإيه ناحيتها؟.. 5 نصائح لزيادة «الوعي العاطفي»
- إتقان فن التحدث
للأسف في ناس كتير مبتعرفش متى تتكلم ومتى تسكت، النقطة دي ممكن كتير مننا يشوف إنها مبتأثرش على علاقتنا باللي حوالينا زي السكات.
ولو إن الواقع أثبتلنا إن السكات هنا أفضل بكتير، علشان كده لو عاوز تكسب احترامهم اعرف إن في أوقات هما بيبقوا مش عاوزين يتكلموا فالأفضل إنك تسكت.
ولما تلاقيهم محتاجين حد يتكلم معاه لازم تبقى أول واحد، هنا هتعلى في نظرهم لدرجة متتخيلهاش.
