فواصل الإعلانات مزعجة في رمضان؟ دليلك للتخلص منها
معظمنا بيستنى مسلسلات رمضان المختلفة لكن بنمل من إعلاناتها اللي بنشوفها مدة أطول من المسلسل نفسه، وللأسف بتخلص الحلقة، وبنلاقي نفسنا ضيعنا وقت كبير كان ممكن نستغله في حاجة تانيه بس لو ركزنا شوية.
يا ترى إيه هي الحاجة دي؟.. أكيد اهتمامات ومشغوليات كل واحد فينا بتختلف عن التاني، بس عمومًا أيًا كانت المشغوليات دي حاول تخلي وقت الإعلانات فرصة لإنجاز حاجات مهمة؛ لإن أكيد مش هتفضل ربع ساعة مثلًا بتتفرج على إعلانات إلا لو كان ده مجالك أو حابب تتعرف عليه.
وعلشان وقتك «شبابيك» هيقدملك مقترحات هتساعدك في التغلب على فواصل الإعلانات.
مكالمة مهمة
أحيانًا بتجيلنا اتصالات مهمة وللأسف مبنعرفش نرد عليها لأي سبب ما، في الوقت ده إنت ممكن جدًا تستغل الفاصل في إنك تعمل المكالمات المهمة اللي أجلتها طالما مش هتزيد عن 10 دقائق.
ولو معندكش مكالمة مهمة، امسك تليفونك وكلم قرايبك وأصحابك اللي التكنولوجيا شغلتك عنهم وقولهم كل سنة وهما طيبين، أو حتى تتطمن عليهم.
اقرأ أيضًا⇐بهذه الطرق تخدعك الإعلانات دون أن تدري.. (اسمع)
أهم الأخبار
ممكن كمان تستغل الفترة دي في متابعة أهم الأخبار والأحداث سواء من خلال القنوات الإخبارية أو حتى وسائل التواصل الاجتماعي؛ لإن ده هيساعدك في إنك تكون عارف اللي بحصل حواليك كويس.
التسالي والمشروبات
لو نفسك تشرب حاجة أو حتى تجهز أي «تسالي، وجبات سريعة» لازم تستغل فترة الإعلانات دي كويس علشان تستمع بالمسلسل صح.
ده إنت كمان لو محتاج تجيب أكل من تحت، تقدر تعملها طالما إنت عارف إن مشوارك مش طويل وهتنجز فيه بسرعة.
فيديو إنجلش
ليه متطلعش موبايلك اللي منزل عليه فيديوهات لأي لغة سواءً كانت (إنجليزي- فرنساوي- إيطالي.. إلخ) وتسمع فيهم لحد ما الإعلانات تخلص.
ده غير إنك كمان لو عندك تطبيقات في اللغة، هتقدر تستفيد بيها خلال الفواصل المزعجة دي.
اقرأ أيضًا⇐6 قنوات «يوتيوب» هتعلمك التسويق بسهولة
شغل متأجل
لو عندك شغل متأخر بقاله فترة، حاول في الفواصل تشتغله علشان الوقت ميضعش منك، وبالنسبة للبنات ممكن جدًا لو في حاجات متاخرة في البيت تعمليها وتنجزي اللي وراكي.
ولو مفيش حاجة عندك، ممكن تشوفي شغلك المتأخر أو حتى تخلصي مشوار قريب من البيت طالما مش هتتأخري فيه.
المراجعة
طيب لو إنت طالب ثانوي ومحتاج تتابع المسلسل اللي بتحبه، خلي الكتاب جنبك ولما الاعلانات تشتغل راجع على اللي ذاكرته، وفي الوقت هتكون استغليت وقت الترفيه في حاجتين من غير ما يأثر على مستقبلك.
تابع مسلسل تاني
لما يكون في مسلسلين عاوز تتابعهم ومش عارف، ممكن هنا تستغل فترة الإعلانات في إنك تروح للتاني سواء كان مسلسل أو برنامج أو أي حاجة تانية.
أينعم إنت ممكن تلاقي عليه إعلانات هو كمان بس الأكيد إن ده مش هيحصل بشكل دائم، يعني مرة تصيب والتانية لأ، المهم إنك تستفيد بالوقت ده في أي شىء إنت عاوزه.
