طفلك بيحب الشيل.. كيف تتخلصين من هذه المشكلة؟

لو طفلك من النوع اللي بيحب الشيل وأنتي مش عايزة تعوديه على كدة هنقولك في الموضوع ده تعملي أيه من خلال نصايح استشاري طب الأطفال بمستشفى إمبابة العام دكتور محمد طه وبعض تجارب الناس.

عادة ليست في الطب

دكتور «طه» بيقول إن شيل الطفل هو عادة إنتي عودتيه عليها لكنها مش موجود في الطب حاجة بتقول إن الأم لازم تشيل الطفل وعليكي إنك متعوديش الطفل على العادة دي ويبقى عندك حزم معاه شوية.

الشيل بشروط

بيكمل «طه» كلامه وبيقول لكن لو حصل ليه إنه عيط جامد لدرجة إنه حصله breath hold بمعنى إنه وشه إزرق من كتر البكاء عشان عايز يتشال فشيليه على طول عشان ميحصلش ليه حاجة. لكن لو بيعيط عادي ومفيهوش حاجة شيليه مرة وسيبيه مرات.

اقرأ أيضا:«خلي حمادة يلعب».. هكذا يتعلم الأطفال

أسباب الشيل

بيقول دكتور «طه» إن الطفل تحت السنة بيكون عايز يتشال عشان عاوز حضن أمه أما اللي بيكون عنده سنتين وتلاتة بيكون سبب إنه عايز يتشال إما مرضي عنده مثلًا روماتيزم.

والمرض ده بيتعرف من شكوته المتكررة ولازم الأم تكون ملاحظة جيدة لأبنها عشان تعملوا الفحوصات الطبية اللازمة، أو إنه بيدلع وعايز إنها تشيله.

اقرأ أيضا:عشان تتبسط.. 6 حاجات لازم تتعلمها من الأطفال

تجارب الأمهات

زيزي محسن بتقول «كنت جايبالها بتاعة كدا زي سجادة صغيرة عليها رسومات وعليها عامود كدا نازل منه لعب كانت بتحب أوي تنام فيهم وتلعب بيهم أو أقعدها في وسط اللعب اللي هيا بتحبها او أخدها جنبي في المطبخ أو البلكونة مثلًا في الكرسي بتاعها».

اقرأ أيضا: «عشان تربي ابنك صح؟».. تعرف على أهمية الحديث مع الطفل

حل مشكلة العياط من البداية

دينا حنفي بتقول «لو حلينا مشكلة العياط من أول الولادة الطفل هيبطل يكون عايز يتشال..أنا من أول ما اتولدوا معودتهومش على الشيل بمعنى لو عيطوا وكانوا مضايقين من حاجة كنت بشوف سبب العياط فين وأحله فبأكلهم وأغير ليهم وأدي ليهم دوا المغص فبيناموا. ولو فضلوا يعيطوا بسيبهم فبيعيطوا شوية وبعدة كدة يروحوا في النوم».

قرآن أو موسيقى

بتكمل «دينا» كلامها وبتقول «برضه كنت ببقى مشغلة قرآن أو موسيقى هادية عشان تساعدهم يروحوا في النوم ويكونوا في حالة هدوء».