«الإخراج اليقظ».. الحل السحري لتوفير فلوس البامبرز

فلوس البامبرز بند كبير جدا في مصاريف البيت، لكن الأمهات دايما بيحبوا يضمنوا نضافة البيبيهات، وده بيكون على حساب ميزانية الشهر، لكن زمان مكنش فيه حاجة اسمها بامبرز، وكانت العيال زي الفل، طب إيه الحل؟

في الموضوع ده من «شبابيك» هنكلمك عن الحل السحري، اللي هو الـPotty Training أو «الإخراج اليقظ». في الموضوع ده هتعرف إن الطفل بيدرك حاجته للإخراج في سن مبكر جدا لا يتجاوز العشر شهور، وممكن في الوقت ده يقعد على البوتي. وهتعرف إزاي تدربه.

الموضوع ده اتكلم عنه المدير العام لمكتبة «ألف» أحمد رحمي من خلال تجربته مع ابنه «عمر» في بوست على الفيس بوك. وأشار إلى دراسة عن أهمية إن الأم والأب يكونوا مدركين لعملية الإخراج اليقظ لابنهم لأن ده هيوفر عليهم كتير.

علّمي طفلك استخدام «البوتي» في 7 خطوات

الإخراج اليقظ

معناه إنك تعودي ابنك من سن مبكر على إنه يعمل حمام في التواليت لأن كل ما عودتيه على ده من بدري مش هتتعبي بعدين في المحايلة.

وأهلنا زمان كان بيعودونا على الإخراج اليقظ لأن استخدام الكوافيل وقتها كان متعب ليهم لأنهم لازم يغلوها كل شوية عشان يتخلصوا من الجراثيم اللي فيها فكان الحل الأسلم ليهم هو إنهم من بدري يعودوا ولادهم على إنهم يعملوا حمام في التواليت.

فحطي نفسك مكان أهلك زمان وهتلاقيكي معودة ابنك على الإخراج اليقظ بدل استخدامك للبامبرز اللي هتلاقي نفسك بدون ما تدري شايفة سهولة في استخدامه وهتلاقي الحياة بتجري وابنك بقى عنده سنتين ولا تلاتة ولسة بيعملها في البامبرز.

الحفاضات

وعلى ذكر فكرة الحفاضات بيحكي المدير العام لمكتبة «ألف» أحمد رحمي، وبيقول إن الستات وقت الحرب العالمية التانية لقوا نفسهم فجأة بينزلوا يشتغلوا مكان الرجالة عشان بلدهم متقعش وده لما الرجالة فيه منهم اللي مات في الحرب، وفيه اللي اتصاب بعجز وفيه اللي كان مشغول بالحرب.

فالستات اضطرت تختصر أوقات كتيرة في حياتها زي استخدام الكافولة وغليها وغسلها ونشرها وده عشان مبقتش فاضية إنها تعمل المجهود اللي كانت بتعمله زمان في الموضوع ده.

واضطرت تستخدم الحفاضات لأنها أسهل بالنسبة ليها فهتستخدمها مرة واحدة وترميها. والحرب العالمية التانية كانت بداية تاريخ استخدام الحفاضات اللي على الرغم من سهولة استخدامها إلا إنها خلت الأم متعودش ابنها على الإخراج اليقظ وتسيبه للأسف لحد لما مزاجه يحدد ويقرر إمتى يبدأ يستخدم الحمام.

ويوصل للسن اللي مفروض يدخل فيه مدرسة ولسة لابس البامبرز اللي أصلًا المدارس بترفض الولد أو البنت اللي لسة لابسينه لأن مفروض يكونوا متعودين على الإخراج من بدري وطبعًا المدارس بتوجه اللوم للأم اللي سابت ابنها لابس البامبرز لحد ما وصل للسن اللي يدخل فيه المدرسة.

أمريكا والإخراج اليقظ

في أمريكا متوسط سن إعتماد الطفل على نفسه وإدراك إخراجه في الخمسينات كان 10 شهور، وفي السبعينات 18 شهر، ودلوقتي وصل 26 شهر (سنتين وشهرين) وده مش بس علشان الأم كانت بتزهق وعايزة تخلص.

ده كمان علشان الطفل كان بيدرك إحساس البلل اللي الكافولة مش بتمنعه زي البامبرز، وبيبتدى يحس بالقرف وبالرغبة في تغيير الوضع المشين ده، وطبعاً في السن ده كانت الأم بتساعد الطفل في دخول الحمام أو استخدام القصرية والأم كانت بتساعده علشان لسه مش بيتكلم ولا بيمشي.

تأثير الحفاضات على البيئة

الحفاضات بتأثر على الطبيعة بشكل سيء وفيه فريقين دخلوا في صراع مع بعض حوالين تأثير الحفاضات على الطبيعة. الفريق المعارض بيقول إن الحفاضة الواحدة بتاخد 500 سنة عشان تتحلل.

وحفاضات العالم سنويًا بتحتاج 200 ألف شجرة تتقطع لأن الشجر فيه مكونات بيتعمل منها الحفاضات، والفريق التاني المشجع للحفاضات بيقول إن غسل الكوافيل بياخد طاقة كبيرة جدًا قد توازي الضرر البيئي للحفاضة. والكلام ده معناه إنك لما تعودي ابنك على الإخراج اليقظ مش هتستهلكي حفاضات كتير وكمان هتحفظي على البيئة.

وبيعتب «رحمي» على الشركات اللي بتصنع الحفاضات لأن قدامها إنها تصنع حفاضة متسببش ضرر كبير للبيئة زي اختراع الحفاضة الميكس أو Hybrid Diaperاللي في سنة 2005 اتنين استراليين كانوا متجوزين جديد ومستنيين أول بيبي ليهم فقرروا إنهم يخترعوا طريقة جديدة للتخلص من عملية إخراج أولادهم، وأسسوا شركة  gdiaper، وهي صاحبة الاختراع العبقري الحفاضة الميكس  اللي انتشرت في أستراليا، وبتنتشر ببطء في العالم.

وبيتكون من شورت بمواصفات معينة وبيمتص السوائل وده جزء، وجزء تاني عبارة عن حفاضة خفيفة معمولة من مواد صالحة للتحلل وينفع تترمي في التواليت، بتشتري الشورت مرة واحدة وبعدها تشتري الحفاضات نفسها كل شوية.

التدريب على الإخراج اليقظ

فيه مدرسة في أمريكا اسمها التواصل من أجل الإخراج أو Elimination Communication  والمدرسة دي بتقولك إزاي تدربي ابنك على الإخراج اليقظ من خلال أربع عناصر.

• التوقيت

لازم تعرفي امتى طفلك بيخرج وتبتدي تفهمي الجدول بتاع إخراجه.

• الإشارات

كمان لازم تبتدي تحفظي إشارات معينة بيعملها طفلك قبل ما ينوي يخرج وعلى أساسها تبتدي تجهزي إنك تدخليه الحمام.

• الصوت المصاحب

حاولي تعملي أصوات معينة زي الصفارة أو الهمهمة أو صوت المية بحيث ترتبط بدماغ ابنك ويعرف لما تعمليها إن ده وقت الإخراج اللي مفروض يدخل فيه الحمام وطبعًا دي حاجة هتشجعه.

• الحدس

الحدس بتاعك إنك تكوني حاسة ان ابنك عايز يعمل حمام دلوقت هيضمن ليكي نجاح ابنك إنه يدرب كويس على عملية الإخراج اليقظ.

الأسلوب في التدريب

وطبعًا لازم أسلوبك في تدريب ابنك على الإخراج اليقظ يكون أسلوب غير عنيف لأن فيه بعض المدارس العلمية زي مدرسة فرويد النفسية بتقول إن تدريب الإخراج اليقظ لو اتعمل غلط وفيه قهر من الآباء للطفل هيبقى ده مكون رئيسي في تعقيد الطفل طول عمره لحد لما يموت، وهيبقى سبب في اصابته بالعديد من الأمراض النفسية.