لطلاب الثانوية.. آداب عين شمس حلوة مفيش كلام
كتب- ندى عثمان
إذا كنت من المحظوظين ودخلت كلية الآداب جامعة عين شمس فلازم تعرف جاحات كتير عنها، وخلي بالك إن طلاب الجامعات اللي في السينما حاجة تانية غير الواقع.
يعني مفيش «شلة كابوو» اللي في فيلم «الباشا تلميذ»، ومفيش حفلات وسهر بالليل متأخر في الكافيهات، ولا رحلات وسفر، وكمان مفيش قصص حب «عمر وسلمى».
لطلاب الثانوية .. الفرق بين المراحل الثلاثة للتنسيق (انفوجراف)
- مشكلة الـ18 قسم:
عادة بيكون أقرب صاحب ليك في الجامعة من قسم آخر غير قسمك، وده هيخليك تحضر محاضراته عشان تقعد معاه وقت أكتر، أو ممكن تتعارض محاضراتكم مع بعضها فيضظر أحدكم يتنازل عن محاضرته.
- الكافتيريات:
كافتيريات آداب اتنين: «كافتيريا آداب»، و«ميدو»، ومعظم طلاب آداب شايفين إن كافتيريات الكليات التانية وخصوصا «حقوق» أحسن من كافتيرات آداب، وده لاتساع المكان حولها.
ولكن إذا كنت مستعجل على المحاضرة هتجيب أكل من «ميدو» لأنهم أسرع، وأوعي تقرب من كافتيريات «حاسبات» هتكرهك في الأكل لأنه بيكون بارد.
أما عن الأكله الشعبية في الجامعة كلها فهي البطاطس السوري، ويمكن عشان رخيصة بـ5جنيه، بس لو حابب تغير في يوم ممكن تخرج ميدان العباسية تاكل كشري من عند «كشري هند» وتشرب عصير قصب من عند «عصائر هند».
لطلاب الثانوية.. شروط الالتحاق بـ«ألسن عين شمس»
- بنات آداب :)
لا تستغرب من وجود طلاب من كليات أخرى في كلية الآداب لأن فيها عدد كبير من الطالبات يفوق عدد الشباب، فطلاب الكليات الأخرى سيأتون طمعا في «المصاحبة»، وهذه نصيحة للبنات لا تثقي في أي شاب في الجامعة ولا توهمي نفسك بأشياء غير موجودة لأن في الاخر الشباب مبيفكروش في أشياء جادة في هذا العمر ويكون كل تفكيره أنك زميلته في الجامعة فقط.
- الأسر الطلابية
العمل التطوعي حاجة كويسة جدا خاصة إذا كان في الجامعة ومع أصحابك، فمن أول يوم لك في الكلية هتسمع كلام عن تاريخ كل أسرة والاتحاد، وعادة هتكون محتار بين الأسر ولكن لا تدخل أي أسرة لمجرد أن بعض الطلاب اقنعوك بيها، ولازم تكون مقتنع من جواك وتعرف أيه الفايدة اللي هتعود عليك إذا دخلت هذه الأسرة وإيه الخدمات اللي هتقدمها للطلاب.
إذا حطمت الثانوية العامة طموحك فإليك الخطة البديلة
- مذاكرة سنة أولى
في أول سنة هتكون تايه ومش عارف تذاكر من إيه ولا تذاكر إيه، وعادة هيكون ملكش نفس للمذاكرة، فهتنتظر ملازم المراجعات وتذاكرهم وتدخل تحطهم في الامتحان، ولكن في السنين اللي جاية هتتعود إنك تكون مش فاهم حاجة وهتعرف تذاكر وتلم المنهج قبل الامتحان، بس برضو ده مش سبب يخليك تقفل أي مادة أو متشيليش مواد لأن الموضوع في الاخر في أيد دكتور المادة.
- خناقات الجامعة
حاول تكون بعيد عن أي خناقة في الجامعة لانك هتبقى حديث الطلاب لغاية لما تتخرج ويمكن بعد كده، ده غير لو وصلت الخناقة لحد من الدكاترة او العميد ستوضع في القائمة السوداء واحتمال تعيد السنة.
لطلاب الثانوية.. شروط الالتحاق بأقسام أداب عين شمس
- نصايح لبنات أولى جامعة
متحطيش مكياج كتير ومتلبسيش كعب في الجامعة ـولا الألوان الفسفوري الملفتة للنظر لأنك هتكوني تريقة لجميع الطلاب، خلي لبسك بسيط وغير ملفت لأن الجمال في البساطة ولأن الجامعة في الاخر مكان للعلم وليس للتباهي بالجمال.
- ثانوي غير الجامعة
متشوفش إن مذاكرة الجامعة أسهل لأن منهج الكلية أقل من منهج ثانوي، وبلاش كلمة «دي المواد سهلة وهنجح بامتياز وهبقى معيد» متستعجلش أنت لسه مشفتش حاجة.
