رغدة جلال الدين تكتب: لو متجوزة جديد.. ماتتحوليش لـ«خالتي اللتاتة»
في بنات أول ما بتتجوز، بتتحول فجأة من بنت كلامها فيه روح الشباب وحيويته ونشاطه وضحكه وهزاره، لـ«ست» كلامها كله فيه روح «خالتي اللتاتة» اللي كانت البنت دي نفسها بتكرهها في يوم من الأيام، فتلاقيها في وسط القاعدة بتحكي عن المشاكل اللي بينها وبين حماتها، ومين عمل ومين سَوَّى، وإن العيال قارفينها ومطيرين النوم من عنيها، وإن جوزها مطهقها في عيشتها، وفوق ده كله تحكي تفاصيل حكايتها مع التلاجة اللي «سرسبت» مايّه وغرقت الشقة، وغيرها من التفاصيل الكتيرة اللي بتخليها تفقد واحدة واحدة روح الشابة العفية جوّاها.. طيب إزاي بقى تحافظوا على روح الشابة العفية جواكوا من سيطرة روح خالتي اللتاتة؟
ده بقى السؤال اللي حبيت أجاوبكوا عليه النهاردة، عشان أكيد فيه بنات كتير منكوا على وش جواز :)
حافظي على روحك
بصي على جوازك إنه حياة جديدة، وعشان تعيشي تفاصيلها لازم تكون روحك لسه شابة، ولو بصيتي على جوازك إنه مسئولية، وطبخ، وتنضيف، وغسل، ومسح، وكنس، هتلاقيكي اتحولتي بسرعة لخالتي اللتاتة!.
مش معنى كلامي ده إن الجواز مش مسئولية، لأ مسئولية، بس بتفرق وروحك فيها شابة، فتعملي فيها كل حاجة وانتي حباها.. غير المسئولية اللي روحك فيها «لتاتة».
اخرجي مع أصحابك
قاعدتك مع أصحابك قبل الجواز حافظي عليها إنها تكون موجودة بعد الجواز، حتى ولو خروجة واحدة كل شهر، لأن قاعدتك وسط أصحابك هتخليكي محافظة على روحك اللي بترمي إيفيهات وتضحك وتهزر وتتكلم في أمور عامة في الحياة.
ولو خرجتوا ولقيتي نفسك بقيتي تتكلمي بروح «خالتي اللتاتة» حاولي تغيري كلامك بسرعة، وترجعي تاني زي ما كنتي لأن هتلاقي كلامك منفصل عن روح كلام أصحابك مع إنهم بردوا متجوزين زيك.
جوزك
نقطة ومن أول السطر.. لو روح «خالتي اللتاتة» اتكلمتي بيها مع جوزك، هتسيبوا بعض قريب جدًا، لأن الرجالة مش بيحبوا البنت اللي بتشكي وتحكيله مين عمل إيه من الجيران ومن جاب إيه، وكمان حتى لو جوزك هادي وانتي شايفاه ممل، وشايفة إن كلامك ليه بالأسلوب ده هيخليه يطلع من الملل بتاعه ويتكلم معاكي، فتفكيرك غلط، لأنه متجوزك عاشان عايز يعيش سعيد وفي راحة نفسية معاكي :)
