عايز تدخل ألسن؟.. اعرف اللي فيها من دلوقتي

بتحب اللغات وتعليمها يبقي أنت اخترت المكان المناسب، كلية الألسن حاجة حلوة وتشرف، وفي الكام سطر اللي جايين دول هنقولك على شوية حاجات لازم تعرفها في الأول عنها.

أولا: كلية الألسن موجودة في جامعات عين شمس، والمنيا، وأسوان، وسوهاج، وكفر الشيخ، والوادي الجديد، وقناة السويس، وبني سويف.

ثانيا: عادي ممكن تدخلها من علمي أو من أدبي.

ثالثا: أقسام الكلية

بص يا سيدي أقسام الكلية 14 قسم، بس في شروط للأقسام دي منها اللي بيعتمد على درجة الإنجليزي، وأقسام تانية بيتعمد درجاتها على درجة اللغة الأجنبية التانية.

• الأقسام اللي بتعتمد على درجة الإنجليزي:

اللغة اليابانية، والكورية، ودول قسمين بياخدوا أعلى درجات من كل الأقسام التانية.

وقسم العربية، والإنجليزية، واللغات السلافية (شعبة اللغة الروسية – شعبة اللغة التشيكية)، والصينية.

قسم اللغات الأفريقية ويضم: السواحيلية- والهوس، الغات الدول الأفريقية – قسم اللغات السامية (العبرية)- وقسم اللغات الشرقية الإسلامية ويضم: «فارسي وتركي».

• الأقسام اللي بتعتمد على درجاتك في اللغة الأجنبية التانية

قسم اللغة الإيطالية- والإسبانية- والألمانية، وخلي بالك إن قسم اللغة الفرنسية أهم شرط فيه أنك تكون خريج مدارس فرنسية.

أكيد بتسأل نفسك طب أنا هدرس إيه بقي لما أدخل؟

بص يا أستاذي أنت هتختار اللغة اللي أنت حابب تدرسها وتتقنها من الأقسام الكتير اللي قولناهم فوق. وبتعرف كل حاجة في اللغة دي لأنك بمنتهي البساطة هتبقي بنسبة كبيرة «مترجم» فيها، فلازم تعرف الحضارة والأدب وكل ما تتخيله عن اللغة.

بعد كده بتختار لغة تانية خفيفة كده بتدرسها من اللغة الأساسية والعربي أساسي معاك طول الأربع سنين.

واخيرًا بقى

كلية الألسن مش بس بتخرج مترجمين كمان ممكن تخرح مرشد سياحي، بعد ما تعمل دبلومة في الإرشاد، ولو حابب تبقي مرشد، وكمان مدرسين call center بمرتبات خيالية نتيجة اللغات اللي بتكتسبها في الكلية.