هو إيه اللي مكتوب في الروشتة؟ إنجليزي ده يا مرسي؟
كلنا اتعرضنا لموقف إننا مش فاهمين إيه اللي مكتوب في الروشتة وده طبعًا بيخلي عقلنا يشط، وعشان كده هنتكلم في الموضوع ده عن روشتة الدكتور، ونعرف إيه المواقف اللي بتحصل للناس منها.
«شبابيك» تجول في بعض الصيدليات، عشان تحل «لغز الروشتة»، وطبعًا منسيش يسأل الدكتور صاحب الروشتة.
بيتقري وبيتصرف غلط
الدكتورة الصيدلانية رشا إبراهيم بتقول «أنا في البداية مكنش عندي خبرة فكان ممكن أقرى الدوا اللي مكتوب في الروشتة غلط وأصرفه غلط، وده لأن بعض الدكاترة بيكتبوا الروشة بخط مش واضح وكمان بيغلطوا في تركيز الدوا من كتر ما كتابتهم سريعة».
وتوضح «مرة كان دكتور كاتب دوا اسمه سبرام، وكاتب التركيز بتاعه 10 مع إن الدوا ده تركيزه 20 مش 10 وده طبعًا عرفته بعد خبرتي في التعامل مع نوعية الروشتات غير الواضحة دي».
وبتكمل كلامها وبتقول «بالنسبة للعملاء بقى فبيبقى عندهم صعوبة كبيرة في انهم يقروا الروشتة فإحنا بنبعت حد ليهم ياخد الروشتة ويجبها عشان نعرف نقراها».
بالحشيش وبشرة خير.. هكذا احتفل «الصيدليون الجدد» في مصر (فيديو)
الدكاترة خطهم مش مفهوم
دكتورة صيدلانية تانية طلبت عدم ذكر اسمها قالت إن «معظم الدكاترة بيكتبوا الروشتة مش مفهومة وأنا عندي قاعدة في الصيدلية إن لو المريض اتصل بيا ومكنش عارف يقرا الدوا ببعت أجيب الروشتة وأتصل بالدكتور شخصيًا. ولو ملقيتوش بتصل بالمستشفى اللي شغال فيها عشان أعرف منه اسم الدوا الصح وده عشان يهمني صحة المريض».
إهانة للدكتور
أما الدكتورة الصيدلانية داليا سعيد بتقول إن «بنسبة 60% روشتات الدكاترة بتكون مش مفهومة سواء كانوا كاتبنها انجليزي أو عربي ولما بنلاقي الروشتة بالشكل ده بنتصل بالدكتور عشان يوضح لينا الأدوية اللي مكتوبة بس بيعتبرها إهانة لو قولتي ليه إن الخط مش واضح».
الصيدلي سوبرمان
أما الصيدلي المساعد أحمد علي بيقول إن «فيه دكاترة بيكتبوا الحروف غلط وبالنسبة للمريض من كتر ما هو مش فاهم الخط بيعتبر الصيدلي سوبرمان اللي هيعرف يفهم كل اللي مكتوب في الروشتة».
انتبه.. 7 علامات تخبرك أن «المكتئب» ينوي الانتحار
كذا صيدلية رفضت الروشتة
منى أحمد كانت أحد الحالات اللي تعبت من خط الدكتور في الروشتة، وبتقول «روحت في مرة لدكتور أمراض جلدية وخدت الروشتة منه ومفهمتش اللي كتبه وودتها لكذا صيدلية ورفضوا يصرفوها لأنها مش واضحة فمكلمتش الدكتور وكلمت واحدة صحبتي كانت بتاخد نفس العلاج فصورت لينا الأدوية اللي كانت بتاخدها وجبتها».
أنواع الروشتة
الصيدلي في صيدلية ممتاز باسم صالح بيقول إن «فيه دكتور بيكتب بخط معين عشان صيدلية معينة هي اللي تفهم الخط ده والمريض يشتري منها وده موجود في الأقاليم بغرض نفعي ما بين الدكتور والصيدلية».
ويضيف «فيه دكتور تاني بيحس إنه لما بيكتب بخط مش مفهوم إنه مختلف عن الأخرين. وفيه دكاترة بيكتبوا الروشتة بالكمبيوتر عشان تكون واضحة للمرضى».
وطبعًا مكتفناش بس بسؤال الصيادلة وحبينا نجيب رأي الدكاترة من تخصصات مختلفة وده عشان يكون قدامنا أطراف الموضوع كلهم.
احذر التقاط الـ«سيلفي» بهذه الأماكن
سرعة مقرية
دكتور الطب النفسي جمال فرويز بيقول «بيجيلي في اليوم مرضى كتير ومع كل مريض بكتب الأدوية المعينة اللي بتتناسب مع كل حالة فبلاقي نفسي بكتب الروشتة بسرعة لأن الأدوية كلها اللي بتعالجه بتيجي في ذهني مرة واحدة فبكتبها بسرعة عشان مفيش دوا يفلت مني».
ويضيف إن «ضغط عدد المرضى كمان بيخليني أكتب بسرعة غصب عني مش بتعمد ده ولما الدنيا بتكون هادية وعدد المرضى قليل بكتب الروشتة بخط كويس. وعامة الخط بتاعي بيكون مقري والمرضى مش بيجدوا صعوبة في إنهم يقروه».
الدكاترة بتراعي الخط
أما دكتور القلب والأوعية الدموية أسامة عويس بيقول «الدكاترة بتراعي الخط كويس عشان يتقري لأن معظم اللي بقوا بيشتغلوا في الصيدليات بيكونوا مش صيادلة وخريجين تخصصات تانية فمش بيعرف يقرا الروشتة وممكن يدي دوا غلط».
وبيكمل «عويس» إن «برغم إن الخط مش حلو لكن الحروف بتكون واضحة والخط ده راجع للكلية اللي كنا بنكتب فيها كمية كبيرة من الكلام فالخط بيكون مش حلو من كتر الكلام اللي بنكتبه. وفيه كتير من الدكاترة بيكتبوا على الكمبيوتر عشان يسهلوا برضه موضوع قراية الروشتة».
