من إسماعيل البلبيسي لحد كايروكي.. هي دي الغُربة يا جدعان
«الاغتراب» في مننا اللي جربوا بنفسه سواء كان مسافر لشغل أو دراسة، وفيه اللي عاش تفاصيله مع حد عزيز عليه وفي الحالتين وجع الغربة واحد.
وبتفضل الأغاني هي اللي بنلجأ ليها عشان نفرغ شحنة الوجع اللي عشناها واللي لسة في كتير بيعيشها. وفي الموضوع ده جمعنا ليكوا مجموعة من المطربين اللي عبروا عن الغربة في أغانيهم.
أنا من البداية يا غربة بتحمل
«أنا من البداية يا غربة بتحمل وخلاص كفاية صعب إن أنا أكمل»، أيوة هي دي أغنية إسماعيل البلبيسي.
الأغنية دي تعتبر من أوائل الأغاني اللي اتكلمت عن معنى الاغتراب ومفيش حد فينا ما اتأثرش أول لما سمعها خصوصًا لما بتيجي في وقت بنعيش فيه لحظة سفر حد عزيز علينا بسبب ضغوط الحياة.
والتأثر ده بسبب كلمات الشاعر عنتر هلال اللي عبرت عن المعاناة النفسية اللي بيعيشها المغترب وتعبه من الاغتراب. والموسيقى اللي لعبت على وتر الحزن جوانا وطبعًا صوت اسماعيل البلبيسي اللي قدر يخلي الأغنية دي علامة في ذاكرة كل واحد فينا.
سرقة وتجاوزات.. البنات يشكين مشاكلهن في سكن المغتربات
يعني إيه كلمة وطن
«يعني ايه كلمة وطن يعني أرض حدود مكان ولا حالة من الشجن»، محمد فؤاد قدر يعبر بالأغنية دي واللي غناها في فيلم «أمريكا شيكا بيكا» عن إن الواحد بيكون حلمه أنه يسافر ولما يتغرب ويتعرض لمواقف صعبة كتير بيحن لوطنه وأهله وناسه.
وبيبتدي يفتكر ذكرياته في شوارع بلده ويقول «شاي بالحليب على قهوة في الضاهر هناك نسمة عصاري السيدة ودير الملاك. نشع الرطوبة في الجدار ولا شمس مغرقة برد النهار ولا أمك ولا أختك ولا عساكر دفعتك والرملة نار وهو ده معنى الوطن».
تذكرتي رايح جاي
«أحلامي صبحت بور ممنوع عليه الضي لكني مش قلقان تذكرتى رايح جي»، حمزة نمرة عبر في الأغنية دي عن إحساس المغترب اللي على الرغم من قلة حيلته في بلده، وإنو معرفش يحقق فيها حاجة وقراره إنه يسافر ويحقق طموحه برا إلا إنه عنده أمل في يوم من الأيام يقدر يرجع ليها ويحقق فيها كل اللي عايزه عشان كدة خلى تذكرته رايح جاي.
غريب في بلاد غريبة
«ناس شغالة والرزق عال وناس تتبطر وتشكي الحال شباب. كتير عاوز يتغير مش لاقي حلمه نفسه يعبر غريب في بلاد غريبة»، أما أمير عيد من فرقة كايروكي أتكلم في الأغنية دي عن الغربة داخل الوطن.
واللي كتير مننا بيحسها لما بيشوف إن فيه ناس مش لاقية العيش الحاف. وفيه ناس مش لاقية شغل وفيه ناس قليلة الحيلة بتتهان وغيرها من الحاجات اللي بتأثر في الواحد وبتخليه يحس إنه عايش في غربة نفسية جوا بلده.
عن تجارب.. هكذا تحققين الحلم وتقنعي أهلك بالاغتراب
اختلاف اللسان
«يعني اختلاف اللسان يسجن بني الانسان ممكن تقوم الحدود ما بين لسان ولسان يا وحدتي انتي سجني وغربتي وحيرتي»، أحمد ابراهيم عبر في الأغنية دي اللي غناها في فيلم النمر الأسود عن حالة المغترب في أول يوم ليه في الغربة.
واللي كان بيجسدها أحمد زكي والمعاناة اللي كان عايشها بسبب إنه مش فاهم الناس ولا الناس فاهماه لأنه مكنش معاه لغة فلقى نفسه وحيد في بلاد غريبة.
حرية أم انحلال.. كيف نرى طموح الفتاة المغتربة؟
