إزاي تختاري الشنطة المناسبة للمكان المناسب؟.. (صور)
كتبت: مي مصطفى
العادي إن كل بنات عندها 6 أو 7 شنط بألوان وأحجام مختلفة، ومسببين ليها زحمة في الأوضة أو جوة الدولاب، ورغم كده أغلب البنات عادة بيستخدموا شنطتين بس منهم، بسبب الكسل من نقل محتويات الشنطة في كل مرة خروج، حتى لو كانت الشنطة مش لايقة كفاية على الملابس أو على المشوار.
في التقرير ده من «شبابيك» حنقدملك كتالوج مواصفات الشنطة الأمثل لكل خروجة من مشاويرك:
شنطة الجامعة أو العمل
لو كنتي بتدرسي أو بتشتغلي، يفضل تستخدمي شنطة كبيرة عشان تكون مناسبة لضم كل أغراضك خاصة لو كنتي بتشيلي كتب كتير أو تابلت،، ويفضل أكتر لو كانت الشنطة مقسمة كخانات، مش خانة واحدة كبيرة بتضم كل المحتويات، لأن النوع ده من الشنط بيعذب صاحبته وقت ما تحب تدور على حاجة جوة الشنطة لحد ما تلاقيها.
6 محلات في وسط البلد نقي منهم شنطة إيدك
شنطة الزيارات
لو خارجة مشوار مع زمايلك أو زيارة لقرايبك فأكيد انتي محتاجة شنطة صغيرة، ممكن تكون في نص حجم الشنطة اللي بتستخدميها في الشغل، لأنك مش حتحتاجي تاخدي معاكي إلا تليفون ومحفظة فلوس ومناديل، فمفيش داعي للشنط العملية اللي حجمها كبير.
شنطة الجيم
أما في حالة النادي أو «الجيم»، فأحسن شطة تستخدميها هي شنطة الظهر، أو شطة تثبتيها على كتف وتكون مايلة للوسط من الناحية التانية (Cross)، لأن عادة حتكون محتويات الشنطة دي إزازة مية، وكيس للهدوم بعد التمرين، فالأفضل تكون شنطة كبيرة وعملية وما يكونش ليها استخدام تاني غير أيام التدريب.
شنطة البنات فيها إيه؟.. «مفاجآت»
شنطة الرحلات
عادة ما بتكوني خارجة في رحلة هتستغرق اليوم كله، وبتحتاجي شنطة كبيرة بدراعات قوية، عشان ما تتقطعش مهما شيلتي فيها حاجات كتيرة أو تقيلة، وطبعا تفضل تكون متقسمة لجيوب كتير، عشان ما تاخديش وقت طويل في التدوير على الحاجة.
شنطة الطفل
كل الأمهات بعد الولادة بيضطروا يمشوا بشنطتين، الشنطة الشخصية العادية وشنطة تانية تكون فيها كل مستلزمات الطفل، ولكن من باب تقليل الحمل، يفضل تخصصي لأغراضك الشخصية جيب من الجيوب تحطي فيه كل متعلقاتك جوة شنطة البيبي، لأنها كده كده هتبقى معاكي طول ما انتي برة البيت، فتبقى حاجتك وحاجته في شنطة واحدة بدل اتنين.
اعرفي انتي مين من ماسكِة شنطتك.. أبو صلاح ولا برنسيسة؟
شنطة سواريه
الشنط السواريه عادة بيكون لونها أسود أو فضي، وبتستعمل وقت حضور الأفراح والحفلات، وبتكون صغيرة قوي في الحجم لو قورنت بشنط الخروج العادية، لأن مش بيكون فيها غير موبايل ومناديل، وبتمسك في الإيد من غير دراع وأحيانا حتى من غير سلسلة، لأن الشنط الكبيرة بتضيع جمال الفساتين السواريه ومش بيبقى ليها استخدام في أوقات السهرات.
