جمد قلبك وخد قرار.. 6 مميزات للزواج من مغتربة

حبيت بنت مغتربة ونويت ترتبط بيها لكن أهلك عندهم قلق من اغترابها لأنها قاعدة في سكن خاص بعيد عن بيتها.

دلوقتي تقدر تقنع أهلك بالجوازه، خاصة بعد ماهتشوف مميزات المغتربات اللي جمعناها في التقرير ده. تحمل المسئولية 

المغتربة هتقدر تتحمل مسئولية بيت لأنها سبق واتحملت مسئولية نفسها في بلد غريبة، وده هيخليك مطمن إن لو حصلت أي مشكلة في غيابك هتعرف تتصرف مش هتبقى ملخومة ومش عارفة تعمل إيه. وكمان لو اتعرضتوا لأي ظرف صعب هتعرف إزاي تعديه معاك.

هتعرف إزاي تمشي البيت بالمصروف اللي إنت مديه ليها لأنها متعودة تمشي على ميزانية معينة تكفي مصاريف دراستها وشغلها. فهتكون عارفة إيه الأولويات اللي محتاجها البيت واللي على أساسها هتظبط ليه الميزانية.

التأقلم مع أنواع الشخصيات

حياة المغتربة من خلال الفترة الطويلة اللي قعدت في الغربة سواء للشغل أو الدراسة خلتها مستعدة إنها تتعامل مع أنواع كتير من الشخصيات المختلفين فكريًا وثقافيًا وإجتماعيًا وده هيخليها تعرف إزاي تتعامل معاك وتفهم فكرك وتتناقش في كافة الأمور.

وكمان مش هتسمح لحد أنه يدخل ما بينك وبينها ويأثر على فكرها وبالتالي تعاملها معاك. لأن من خلال تعاملها مع الشخصيات المختلفة قدرت تكون ليها خبرة حياتية تتعامل بيها مع الناس.

مش هتقيد حريتك 

هى اتعودت في غربتها يكون ليها حياتها الخاصة المستقلة فبالتالي هتحترم مساحتك الشخصية الخاصة بيك ومش هتقيد حريتك وكل شوية تقولك إنت كنت فين  وبتعمل إيه ولو نازل مع أصحابك تقولك في كل مرة أنا جاية معاك، أو أي شكل تاني من أشكال تقييد الحرية اللي يخليك تتخنق من العلاقة.

بما إنها قدرت تتحمل مسئوليتها في الغربة وتسعى إنها تحقق ذاتها من خلال دراستها وشغلها فلما تخلّف هتقدر تربي شخصيات مسئولة صاحبة قرار وهتساعدهم في تكوين حلمهم وانهم يوصلوا لكل اللي عايزينوا، لأنها هتقوي فيهم معنى العزيمة والإصرار والصبر.

ياما المغتربة اتحطت في مواقف كان لازم تاخد فيها قرار صارم وقدرت تاخد قرارات كتيرة مصيرية في حياتها وعشان كدة لو في أي حاجة في حياتك محتاج توصل فيها لقرار معين بالمناقشة والمشاركة معاها هتوصل للقرار اللي إنت عايزه.