خريج علاج طبيعي.. دكتور بس بشروط

دخلت كلية علاج طببعي، طيب عارف هتطلع منها إيه، طيب هي بقت كام سنة، وهطلع منها دكتور ولا لا؟ كل الأسئلة اللي بتدور في دماغك عن الكلية في التقرير ده «شبابيك» هيقولك كل المعلومات اللي هتحتاج تعرفها عن الكلية.

إيه هي  الجامعات اللي فيها كليات العلاج الطبيعي في مصر؟

موجودة في جامعات زي «بني سويف، قنا، كفر الشيخ، والقاهرة»

هي الكلية كام سنة؟

بص هي زمان كانت 5 سنين بس دلوقتي بقت 6 والسنة السادسة دي اسمها تشخيص وهنتكلم عليها كمان شوية.

طيب هي بتاخد من كام؟

تنسيق 2016-2017  كان لكل الجامعات 398 درجة من أصل 410

ودي هدرس فيها إيه؟

أول سنتين بيبقوا مواد عامة زي «الأنتومي- فسيولوجي-هستلوجي-Biochemistry-Biophysices»

من أول سنة تالتة بقي بتبتدي تتدرب في مستشفيات وتدرس أقسام في كلية الطب البشري زي «باطنة-عظام-أطفال-نسا وتوليد».

طيب لما أنا هدرس أقسام في طب إيه الفرق بيني وبين خريج طب؟

أولا: أنت مش مسموحلك تعمل عمليات

ثانيا: كان زمان مش مسمحولك تكتب روشتة بس دلوقتي لما بقت الكلية 6 سنين أخر سنة بيبقي أسمها تشخيص عشان تعرف تكتب روشتة للمريض.

ثالثا: مينفعش يبقي أسمك دكتور غير بعد سنتين دكتوراه بعد الـ 6 سنين بتوع الكلية ☺ لو معملتش السنتين دول بيبقي اسمك أخصائي علاج طبيعي.

طيب لما اتخرج هشتغل إيه؟

مجالات الشغل كبيرة ممكن تشتغل في «المستشفيات العامة -العيادات الخاصة -مستشفـيات الولادة والأطفال  - الأعمال الاستشارية في مجال العلاج الطبيعي-معاهدالتربية الخاصة -مراكز الشلل المخي  - معاهد الأمراض العقلية والتخلف العقلي- رعاية الأطفال المعوقين - الطب الرياضي- التعليم والتدريـس -الوحدات النوعية منها وحدات علاج الروماتيزم».