لو هتعمل الحاجات دي وتموت يلا بينا.. 10 حاجات مجنونة جدا
الحياة أكبر بكتير من العالم الإفتراضي اللي خانقين نفسنا بيه، وأكبر من التلفزيون، والعزلة، والأكتئاب، وأكبر من كل حاجة.
وفي حاجات في الحياة دي بقي مينفعش تموت من غير ما تجربها أو حتي تجرب جزء منها وحتي لو بقي عندك 100 سنة لازم تجرب حاجات جديدة لأنها هي دي اللي هتدي متعة لحياتك.
حتى لو أنت شايف أنها الحاجات دي ممكن تكون حاجة هايفة، بس تأثيرها نفسيا عليك هيحسسك إن حياتك مش روتينية، وكلها مغامرات وتجديد. في التقرير ده هنقولك علي شوية حاجات مجنونة لازم تجربها :D
1-«Bungee Jumping» أو القفز بالمطاط
دي بقي يا سيدي بيربطوا رجليك الأتنين بحبل مطاطي وتقف علي ارتفاع شاهق وتنط من فوق زي الصورة اللي أنت شايفها كده، إحساس مختلف.
2-«Shark Cage Diving» أو الغطس مع سمك القرش
الرياضة دي موجودة في أماكن زي المكسيك، وجنوب أفريقيا، وجزر غالاباغوس. ودي عبارة عن قفص بينزل فيه أفراد جوة الميه ويكون حواليك أسماك قرش، دي رياضة كده للناس اللي بتحب الأكشن.
3- التزلج على الماء
ودي يا سيدي بدل التزلج علي الجليد، وبتبقي فيها ماسك حبل ومعاك لوحة التزلج الخاصة بيك وعيش بقي المغامرة.
4- التخييم
المعسكرات والتخييم من أكتر الحاجات المتتعة. والأماكن عندك كتير ممكن تخيم في الصحرا، أو في الغابات، وأماكن تانية كتير بس لازم تجرب إحساس أنك نايم في خيمة وسط هدوء الليل، وده هيديك فرصة أنك تشوف النجوم وتتأمل وتنتعش بالهواء الطلق ويا سلام لو معاك حد بتحبه صديق، أو أخ، أو حبيب.
5- ركوب المنطاد
ودي بقت مشهورة في كل مكان، وموجودة في أسوان، وشرم الشيخ، والفيوم وأماكن كتير أوي.
6- سفاري في أفريقيا
أفريقيا من الأماكن اللي بتتميز بالغابات المفتوحة للحيوانات كلها، فلازم تجرب تعمل سفاري وتشوف الحيوانات وهي منطلقة مش محبوسة في قفص زي فيلم «أفريكانو» كده.
7- السباحة مع الدلافين
ودي رياضة موجودة في دبي، وأمريكا، وتركيا، والمكسيك، وفيها بتسبح في البحر مع الدلافين، وهي كائنات معروفة بأنها أليفة جدا في تعاملها مع البشر.
8- cave flight أو الطيران بين الكهوف
الرياضة دي بتلبس لبس عامل زي الطيور بجناحات، ومربوط في حبل وبتطير من أرتفاع عالي بين الجبال والكهوف.
9-القفز من الهليكوبتر
لازم تجرب أنك تنط من طيارة هليكوبتر وأنت لابس براشوت هتحس بمتعة المغامرة.
10-الشفق القطبي الشمالي في ألاسكا
الشفق القطبي هي ظاهرة كهربائية ناتجة عن تفاعلات بين الرياح الشمسية والغلاف الجوي العلوي للأرض، وفيه تنبعث من الشمس فوتونات بنشوفها كأنها الضوء، ولما بتصل بالقرب من كوكبنا تبدأ تنتهي بغازات مثيرة في طبقات الغلاف الجوي تؤدي إلى انبعاث ضوء أحمر وأخضر ناتج عن الأكسجين والأزرق والبنفسجي ناتج عن النيتروجين.
وهو موجود خلال اليوم تماماً زي النجوم لكننا مش بنشوفه في الليل، ويكون ألمع في القطبين الشمالي بسبب المجال المغناطيسي الشديد في الأقطاب.
