رايح تخطب ومحتار.. هنقولك تعمل إيه

كل شاب رايح يخطب الموضوع بيبقى بالنسباله صعب شوية، وبيكون محتار يلبس إيه والشكل اللى هيظهر بيه أول مرة قدام العروسة واهلها يكون ازاي،  وكل ده أختياره بيكون صعب جدا بالنسبة لشباب كتير،  لانه بيبقا محط أنظار كل اللى قاعدين.

لو بتفكر تخطب ومحتار الحيرة دي، هنقولك إيه اللي ممكن تعمله وانت رايح تخطف فتاة أحلامك :)

اختيار اللبس

اختيارك للبسك اليوم ده لازم يكون متوافق مع شخصيتك. يعنى تلبس اللى يليق عليك،  والتناسق فى الألوان مهم جداً،  واللبس الكلاسيك هو أحسن لبس بيكون مناسب فى الوقت ده وأهم شئ يكون مكوى، وأبعد عن اللبس الكاجوال لأنه مش بيكون محبوب وأهم شئ الشوز يكون متلمع على الأخر.

تسريحة الشعر

تسريحة شعرك لازم تكون منسقة وهادية،  يعنى متروحش تعمل تسريحة جديدة لأول مرة وانت متعرفش شكلك هيبقا حلو فيها ولا لا، عشان محدش ياخد أنطباع مش حلو عنك،  وخد بالك أول مقابلة هى أهم مرة .

الاتيكيت  

من الاتيكيت والزوء وانت رايح للعروسة لازم تاخد معاك حاجة حلوة يعنى تورتة أوعلبة شوكولاتة تكون قيمة،  ومش لازم تاخد معاك العيلة كلها ياعنى أكتفى بوالدتك ووالدك فى الاول هما  أهم حد  فى الوقت ده عشان التعارف،  وكمان عشان ميحصلش أختلافات كتير،  لما تكون قاعد والعروسة تكون داخلة حاول تتحكم فى رد فعلك ومتبصش كتير عليها.

التوافق   

التوافق هو شرط نجاح أى علاقة،  يعنى متروحش تخطب واحدة وانت متعرفش أى  حاجة عنها وعن اهلها،  لازم يكون عندك فكرة عن طبيعة شغل والدها وحالتها الاجتماعية والعلمية،  وهل هتناسب ظروفك الاجتماعية والاقتصادية ولا لا عشان متتحطش فى موقف محرج أنت وأهلك.

التصرفات

خد بالك أوى من تصرفاتك وانت قاعد لان كل حاجة هتعملها محسوبة عليك،  متنفعلش حتى لو حد من أهل العروسة حب يختبرك،  ولا تحاول تتحرك وانت قاعد على الكرسى وتاخد راحتك كأنك فى بيتك،  ومتقعدش تبص حواليك ولا تثبت عنيك فى حتة واحدة،  وصوتك يكون واطى وتحاول توصل كلامك بطريقة شيك كلها احترام.

شباب كتير مرت عليهم  المرحلة دى وعدت، بس أهم شئ انك تكون واثق من أختيارك لشريكة حياتك اللى هتكمل معاها بقية عمرك.