لو «تحت 18 سنة».. الأكل الصحي اللي هيخليك برنس هنا
«العقل السليم في الجسم السليم» جملة سمعناها كتير وجه الوقت إنك تنفذها وتتعرف على النظام الغذائي اللي هيخلي جسمك سليم وصحي في فترة المراهقة، وهيحميك من الإصابة بأمراض مزمنة فيما بعد.
مرحلة نمو جسمك
خبير التغذية ناصر أبو النجا بيقول إن مرحلة المراهقة هي مرحلة إكتمال نمو جسمك وبينصحك إنك متفكرش تعمل ريجيم ولو شايف إن وزنك محتاج يتقلل يبقى عليك إنك تركز على الحصول على إحتياجاتك الغذائية الأساسية.
احتياجاتك الغذائية
والإحتياجات دي بتكون موجودة في عدة عناصر أساسية وهي البروتين اللي على سبيل المثال موجود في اللحوم والبيض والبقوليات زي الفاصوليا والفول والعدس، والكربوهيدرات اللي موجودة فيه الرز والمكرونة، واللبن الخالي من الدهون واللي بيتسمى لبن خالي الدسم، و الدهون الموجودة في جلد الفراخ والمايونيز.
وكما الاحتياجات دي موجودة في الفيتامين من الخضار والفاكهة، والمعادن زي الكالسيوم اللي موجود في الحليب، والفوسفور اللي موجود في الجمبري، والفراخ واللحوم.
وكمان مهم قوي ليك في المرحلة دي السلطة الخضرا والمية اللي على الأقل لازم تشرب 8 كوبايات منها في اليوم لأنها هتساعدك تتخلص من السموم والأملاح الزيادة في جسمك، بس لازم تقلل عنصرين منهم وهما الكربوهيدرات والدهون.
وطبعًا العناصر دي لازم تكون أساسية في نظامك الغذائي سواء عايز تقلل وزنك أو وزنك مناسب، وده زي ما «أبو النجا» قال هتساعدك في نمو جسمك وتكوين أجهزتك.
وفي حالة إنك مهتمتش بوجود العناصر دي في أكلك وقررت تعمل ريجيم هيحصل مشكلة كبيرة وهي إن أجهزتك مش هتبقى مكتملة وخاصة الأجهزة التناسلية وهتلاقي نفسك عرضة للإصابة بأمراض مزمنة.
يعني لو مهتمتش إنك تشرب لبن وكنت دايمًا بتشرب مشروبات غازية هيبقى عندك نقص في الكالسيوم وقدام هيكون عندك هشاشة في العظام وكمان هتصيبك الأنيميا.
للمراهقات.. نصائح هتحميكي من «التنمر الإلكتروني»
ممارسة الرياضة
و«أبو النجا» بيقولك إن عليك في المرحلة دي ممارسة الرياضة بشكل منتظم عشان يكون جسمك صحي ومتكونش عرضة إن وزنك يزيد لأن زيادة الوزن بتخليك عرضة للإصابة بالسكر فيما بعد.
والرياضة كمان هتكون مهمة لو عايز تقلل وزنك وطبعًا الرياضة هتمارسها مع الحفاظ على النظام الغذائي اللي فيه العناصر الغذائية اللي اتكلمنا عنها فوق.
محاذير
«أبو النجا» بيقولك إنك لازم تبعد عن المشروبات الغازية لأنها منخفضة القيمة الغذائية وزي ما قولنا فوق إن شربها هيسببلك هشاشة العظام فيما بعد وكمان ناصر بيقولك إنك لازم تبعد عن السكريات.
خلي بالك
وعليك كمان إنك تقلل من أغذية الـFast food أو الأغذية السريعة، وطبعًا قلل من أكل الدهون الموجودة في الأكل يعني مثلًا لو جيت تاكل فراخ في أي مكان برا شيل الطبقة الدهنية من على الفراخ.
