إيمان شاهين تكتب: عاوز تتعامل ﻣﻊ ﺭﺳﺎﻡ؟ اوعى تقوله ارسمني?
لو فكرت في يوم تتعامل مع حد بيرسم أو أي حد ليه علاقة بالمجال الفني يبقي لازم تحضر نفسك لقواعد التعامل معاه لإن الفنانين ليهم طبيعة وتصرفات لازم تكون واخد بالك منها.
اوعي تقوله ارسمني ?
♠ الرسم بيتكلف كتير جدا من حيث الأدوات والورق والوقت محدش هيقدر يعرف ده غير لو بيرسم وأكيد الرسام مش هيضيع من وقته علي الأقل 10 ساعات عشان يرسمك كمجاملة.
♠ لو لقيت هدومه أو إيده مبقعه متحاولش تنبهه دي في الغالب بقعة فحم أو ألوان الحاجات دي بالنسباله مش بقع، ابتسم وحسسه أن حتي البقعه حلوه وبها فن ولايقه عليه.
♠ متفكرش تقوله ارسمني?.
♠ لو تنح في السقف متفكرش تسأله بيعمل ايه ولا تفصله من تركيزه، خليك في حالك أحسن.
♠ متفكرش تقوله ارسمني ☺.
♠ لو لقيته متنح في شرخ في السقف أو حاجه مكسوره أو في رغاوي الكابيتشينو مثلا هو مش متخلف لكن بيكون شايف في الحاجات دي تكوين فني جديد عمرك ما هتقدر تشوفه زي ما هو شايفه.
♠ متفكرش تقوله ارسمني ☺.
♠ لو لقيته فجأه بيلم ظلط أو ورق شجر من الأرض متستغربش اكيد هو مش هيأكلهم دول بيكونوا جزء من عمل فني جديد.
♠ اوعي تقوله لم كراكيبك كده هيعتبرك بتهينه لان الحاجات دي بالنسباله مش كراكيب حياته هي الفوضي دي ومبسوط بيها، سيبه في حاله أو متقعدشي معاه في نفس المكان.
♠ لو بتحبه هاتله في عيد ميلاده فرش وألوان واسكتشات غالبا هتجيله ذبحه صدرية من الفرحه.
♠ متقولوش أنه بوهيمي ومجنون ومهمل هو عارف ده كويس، معلوماتك قديمه أوي.
♠ متفكرش تقوله ارسمني ☺.
♠ متكلموش و هو بيرسم غالبا مش هيسمعك أصلا ولو سمعك مش هيرد ?.
♠ متكلموش خالص أحسن، اتأمل معاه، اهتم بيه، حبه زي ما هو كده بهبله بعبطه بجنانه بكل حاجه مش حلوه فيه قبل الحلوه.
♠ متفكرش تقوله ارسمني ☺.
♠ طول ما انت مصدق الجنان اللي هو بيعمله يبقي وجودك معاه مهم جدا، لو سبته بعد ما لقاك هينهار.
♠ متقولوش ارسمني .
♠ نسيت معلش -متفكرش تقوله ارسمني ???.
