أشرقت ياسين تكتب: مش هنفرح بيكى بقى؟!
"مش هنفرح بيكى بقى؟!".. دي أكتر جملة بتواجه البنت في حياتها من أول ما تدخل الجامعة ولحد ما تخلص الجامعة، وفى نظر الناس بتكون وصلت لمرحلة الخطر بنهاية المرحلة دى.
البنت بتسمع الجملة دى فى الأفراح والأعياد وكل المناسبات العائلية والاجتماعية.. طول الوقت كل الناس عاوزين يفرحوا بيكى!
طيب وانتى إيه اللى ممكن يفرحك ؟
أنا فاهمة جدا إن الجملة دى بتمثل ضغط كبير على البنت وممكن تعمل تغيير كبير في تفكيرها من غير حتى ما تاخد بالها .. الزن على الودان طبعا واللى بيعمله.
بس هقولك شوية حاجات علشان متخسريش السنين الجاية فى حياتك وعلشان تفرحى انتى كمان مش يفرحوا هما وانتى تدفعى الفاتورة لوحدك:
1- متتجوزيش لو مش حاسة إنك أد مسئولية خطوة زى دى علشان متدخليش فى دايرة يا لهوى وشبابى اللى ضاع ومش معنى انك ناجحة فى حياتك العملية انك هتكونى ناجحة في تكوين بيت وأسرة جهزى نفسك الأول للخطوة دى.
2- متتجوزيش لو مش عندك أهداف واضحة عاوزة تحققيها ومخططة بشكل عملى لمستقبلك بدل ما تعيشى دورة حياة أي كائن حيوانى بيتولد يكبر يتجوز يخلف ويموت وزي ما جيه زي ما راح.
3- متتجوزيش إلا لما تلاقى الشخص اللى تقدروا تتفاهموا فى كل التفاصيل.. اللى يكون مدرك كويس جدا إنك إنسانة ليكى كيانك وتفكيرك .. وياريت نبعد عن جو الفارس والحصان الأبيض يا بنات علشان بعد كدا منرجعش نقول ده مجتمع ذكوري وبيضيع حق المرأة.. اختارى صح من الأول اللى يناسب شخصيتك
4- متتجوزيش إلا لما تكونى ناضجة كفاية وحققتى الحاجات اللى غالبا لو مبدأتيش فيها صعب تبدأيها بعد الجواز زى إنك تمارسي هوايتك وتشتغلى لو عايزة وتحققى كل حاجة ممكن تحققيها وإنتى لوحدك علشان مترجعيش تندمى وتقولى أبص لروحى فجأة لقيتنى كبرت فجأة وكدا
5- متتجوزيش علشان نفسك تكونى أم وانتى اصلا معندكيش أى فكرة عن التربية الصح اللى تخليكى تبنى أفراد اسوياء وعندهم سلام نفسى وتكون النتيجة أطفال مشوهين نفسيا وكارهين وجودهم
و أخيراً متتجوزيش علشانهم.. متتجوزيش علشان ترضيهم وخلاص..
الجواز مرحلة فيها حاجات حلوة وحاجات صعبة بس الأكيد إنها مرحلة مش سهلة علشان كدا لازم تستعدى كويس علشان تكونى زوجة وأم ناجحة جدا في حياتها.
