لطلاب ثانوي.. إزاي تبدأ العام الدراسي صح؟
لما بنسمع كلمة ثانوية عامة، بنفتكر ضغط المذاكرة والتوتر والخوف من الامتحانات. لكن الثانوية العامة في حد ذاتها مش مرعبة للدرجة دي.. الفكرة كلها في بعض العادات الخاطئة اللي بتصعب علينا المذاكرة.
في التقرير ده «شبابيك» هيوضح لك بعض الخطوات اللي تقدر بيها كطالب ثانوية عامة، تبدأ السنة الدراسية الجديدة من غير ما تحس بتعب المذاكرة، أو تكون شايف أن الثانوية العامة دي كابوس ولازم تخلص منه بسرعة.
أسس نفسك
المواد الدراسية في الثانوية العامة مش صعبة زي ما بيخوفوك منها. الفكرة كلها أن بعض المواد بتعتمد على حصيلة اللي درسته في الأعوام السابقة.
فلو لقيت نفسك مش بتفهم كتير من المواد بسهولة، زي النحو أو «الجرامر» في اللغة الإنجليزية أو الرياضيات، فهو بسبب أنك مش متأسس فيها كويس. والحل هو استغلال الوقت المتبقي في الإجازة عشان تؤسس نفسك في المواد دي «من أول وجديد».
متتكسفش من أنك تطلب المساعدة من مدرسينك ، لأن معظم المدرسين فاهمين أن الطلاب مش متأسيسن كويس في المواد دي. واتفق مع المدرس على نصف ساعة قبل أو بعد دروسك الخصوصية أو الحصص المدرسية، عشان تسأله عن أي معلومة بتقف أمامك أو قاعدة قديمة بتحاول تفهمها.
بهذا الدليل.. متخليش حاجة تطلعك بره مود المذاكرة
اختار المدرس اللي ترتاح معاه
اختار المدرس اللي عنده القدرة على تبسيط المعلومة مهما كنت معقدة، وعنده الصبر وطول البال عشان يشرح لك المعلومة مرة واثنين وتلاته لحد ما تفهمها.
ومتختارش المدرس لمجرد أنك تكون مع أصدقائك في نفس المجموعة، أو لمجرد أنه مدرس مشهور أو أن طلابه بيجيبوا مجموع كبير أو أن توقعاته مضمونة في الامتحانات.
فحصول أي طالب على درجات عالية، بيرجع في الأول والآخر لقدرة الطالب على الفهم وأسلوبه في المذاكرة.. وأنت شخصيا مش هتستفيد أي شيء لما تأخد درس مع درس مع مدرس مشهور وطريقته في الشرح مش مناسبة ليك.
بهذه الخطوات.. هتقع في غرام المذاكرة
لا تضغط نفسك
لو ضغطت على نفسك في بداية العام الدراسي، فبسبب كثرة المجهود والتوتر، هتصاب بالتعب في نص السنة، وهتفقد الحماس وقدرتك على المذاكرة.
في الحالة دي هتحتاج لتنظيم وقتك بين المذاكرة وإنهاء دروسك عشان متحسش أن فيه حمل تقيل عليك، وفي نفس الوقت تخصص وقت للراحة تمارس فيه أي نشاط أو هواية عشان تريح عقلك من تعب المذاكرة، وتقدر تواصل.
حدد الوقت الأفضل للمذاكرة في 3 خطوات
وذاكر أول بأول
لو افتكرت أن السنة طويلة وابتديت تأجل المذاكرة، وأنت متخيل أنك هتقدر تبدأ في أي وقت من السنة.. فدي هي أول خطوة للفشل.
المواد الدراسية في الثانوية العامة مبنية على بعضها. ولو تراكمت الدروس عليك هتفقد قدرتك على الفهم، وهتصاب بالإحباط لما تلاقي الدروس بتتراكم عليك. الإحباط ده هخليك بتؤجل قرار البدء في المذاكرة لحد آخر السنة.
خدلك غفوة.. نصائح لفترات راحة فعاة خلال المذاكرة
شخص يساعدك
أي طالب في سنك طبيعي أنه يكره التوجيه والأوامر المباشرة من الوالدين بالمذاكرة. لكن في نفس الوقت هتحاج لشخص يتابعك عشان متكلسش
اختار شخص من الأقارب أو الأصدقاء الجادين أو مدرسينك اللي فاهمين طبيعتك ويعرفوا الطريقة المناسبة لتشجيعك على المذاكرة أو حتى يعرفوا إزاي يتعاملوا معاك لما تكسل، من غير ما يتسببوا في أنك تفقد الحماس للمذاكرة وتمل منها.
المعلومات بتطير بعد المذاكرة؟ .. اتعلم تثبتها إزاي
تواصل مع مدرسيك
متترددش في التواصل مع مدرسك وطلب المساعدة منه في أي حاجة مش فاهمها، في نص الأسبوع، وبعيد عن أيام الدرس.
المتابعة دي هتمنعك من تراكم النقاط الصعبة عليك، واللي مش هتلاقي أي وقت تسأل فيها خلال الدرس، خاصة لو كنت بتاخد درسك مع عدد كبير من الناس أو في المراكز المختصة.
حدد هدف
الشيء الوحيد اللي هيمنعك من هذا التكاسل وتأجيل المذاكرة هو أنك تحط لنفسك هدف «يصبرك» على المذاكرة.
وحتى لو كنت مش قادر تحدد الكلية اللي أنت عايزها دلوقتي، فحصولك على مجموع جيد هو هدف في حد ذاته، عشان متضطرش لدخول كلية مش بتحبها وتكون قدامك اختيارات أفضل.
عندك مشكلة في الحفظ.. الحل هنا
