خروجتك عندنا.. نسمة محجوب في القلعة و«دقة بدقة» على «الفلكي»

عايز تخرج ومش عارف تروح فين؟ النهارده الأحد فيه مجموعة من الحفلات هنقولك عليها وكل اللي عليك بس إنك تختار تروح تروح أنهي حفلة منهم.

النهارده هيكون فيه حفلة موسيقية الساعة 8 مساءً في قاعة الحكمة بساقية الصاوي لفرقة ميوزيك فيجن. والفرقة بتعمل على إنها تخلي الجمهور يشوف اللي بيسمعه وده من خلال المزج بين الموسيقى وأنواع مختلفة من الفنون زي عرائس الماريونت والبانتو مايم والفن التشكيلى والشعر والمونولوج والتمثيل. سعر التذكرة للأعضاء ٢٠ جنيه ولغير الأعضاء ٢٥ جنيه.

أما الفنانة نسمة محجوب فهتقدم حفلة غنائية، الساعة 10 مساءً في قلعة صلاح الدين وده ضمن فعاليات الدورة 22 لمهرجان قلعة صلاح الدين للموسيقى والغناء اللي بتنظمها دار الأوبرا المصرية.. و«نسمة» سبق وفازت بالمركز الأول في ستار أكاديمي في نسخته الثامنة.

وهيتعرض النهارده كمان مسرحية «دقة بدقة» للكاتب وليام شيكسبير، واللي تمت كتابتها بين عامي ١٦٠٣ و١٦٠٤ ودي أول مرة تتعرض في مصر.. المسرحية هتبدأ الساعة 8 مساءً على مسرح الفلكي.

والمسرحية بتروي قصة صراع بين العدالة المطلقة التي يضعها الناس على أسس القوانين، وبين العدالة المقترنة بالرحمة، وتقدم لنا العديد من الشخصيات التي تجبر على التأقلم مع التطرف بأشكاله المختلفة في مجتمعها.

ترجم النص من اللغة الإنجليزية إلى العربية الفصحى الدكتور محمد عناني، وقام وليد حماد وأمنية طه بإعداد وتمصير النص. والعرض من تمثيل أحمد شمعة بدور الملك ومحمد عرفة بدور إسكالوس وباسم الكحكي بدور أنجيلو ومن إخراج وليد حماد ومدته ساعتين و ١٠ دقايق بما فيهم فترة الإستراحة.

مسرح الفلكي موجود في حرم الجامعة الامريكية بميدان التحرير ٢٤ شارع الفلكى، وسط البلد، القاهرة. سعر التذكرة ٤٠ جنيه.