لسة الأماني ممكنة.. رسائل أمل يقدمها النجوم للجمهور

لو حاسس إن عمرك ما هتحقق حلمك.. والظروف كلها ضدك.. ارمي الطاقة السلبية ديه ورا ضهرك وركز.. جبنالك مجموعة من النجوم اللي قدموا من خلال أدوارهم في الأعمال الفنية الأمل للشباب بأن "الأماني ممكنة" رغم الظروف الصعبة.

همام 

"همام" زيه زي أي شاب في البلد بيعاني من إنه مش لاقي شغل بعد محاولات كتير في البحث عنه.. شاف السفر إلى امستردام في هولند فرصة للعمل.. لكن الموضوع مكنش سهل زي ما أغلب الناس فاكرة إن أول ما تسافر على طول هتلاقي الفرصة قدامها.

أول ما سافر مر بمواقف صعبة كتيرة بداية من خاله اللي رفض يساعده.. أو من الناس اللي في الشغل أبرزهم الشخص الإسرائيلي اللي حاول ينتقم منه بكل الطرق.. لكن اتعرف على ناس في الغربة هونوا عليه المصاعب اللي قابلها وحاول إنه يدور ويلاقي شغل ومفقدش الأمل.

أصحابه  ساعدوه إنه يعمل مشروع مطعم صغير.. المشروع ده كبر وبقى سلسلة مطاعم باسم همام.

من قصة همام تقدر تطلع بإنك متبصش على السفر إنه طوق النجاة ليك "لأ" لازم تبص إنك برضه هتعافر هناك وهتدور على شغل لغاية ما توصل.. في الأول هتقابلك صعاب بس عليك تعديها ومتخلهاش تهزمك وتفقد الأمل.

محمد حسن المصري

نتيجة بحث الصور عن النمر الاسود فيلم

قصة همام شبيهة بقصة كفاح "محمد حسن المصري" من حيث فكرة السفر لبلاد برا للبحث عن وظيفة.. "محمد" في فيلم النمر الأسود اللي قام بدوره الفنان الراحل أحمد زكي.. قرر يسافر ألمانيا ويشتغل في مصنع خراطة عشان يقدر يبني نفسه ويصرف على والدته.. لكن برضه واجهته مصاعب كتير تمثلت في شعوره بالغربة.. وشخص حاول بكل الطرق إنه ينتقم منه لدرجة إنه تسبب في طرده من المصنع اللي كان رايح يشتغل فيه.. رغم كل ده مخلاش محمد يفقد الأمل.

قرر إنه ينفذ فكرته بخصوص ماكينة شاف إنها لو اتعملت هتحقق نجاح لمصانع كبيرة.. وفعلًا الفكرة ديه خلته وصل لمركز عالي وبقى رجل أعمال كبير.

الفيلم ده بيأكدلك وبيثبتلك كمان نفس اللي قولناه عن فيلم همام في أمسترادم.. وهو إن مع المعافرة في الحياة هتلاقي حلمك اتحقق بس أهم حاجة متفقدش الأمل.

جبت مجموع وحش؟.. دي رسايل بعتهالك نجوم مع «شبابيك»

عبد الغفور البرعي  نتيجة بحث الصور عن عبد الغفور البرعي

أما بقى قصة عبد الغفور البرعي في مسلسل "لن أعيش في جلباب أبي" اللي قدمها الفنان نور الشريف.. الراجل اللي قرر إنه يسافر من الصعيد ويجي مصر ويدور على شغل لأن ظروفه كانت صعبة جدًا.. ومكنش لاقي العيش الحاف.. ولقى المعلم سردينة فاتح ليه دراعاته وشغله عنده في الوكالة ورعاه.. فبرضه بتديك جرعة أمل وتفاؤل بأن الاجتهاد والمعافرة هما الحل.

"عبد الغفور البرعي" مكنش معاه ولا مليم عشان يفكر حتى إنه يسافر.. لكن كان يمتلك عقل فكر بيه إزاي يطور من نفسه والأمل في إنه هيغير وضعه للأحسن.. فعلًا اتعلم من المعلم "سردينة" كل حاجة تخص الشغل وطبعًا قابلته مصاعب وناس كانت ناوية ليه على نية شر لكنه وقف قدامهم.. وفتح محل بعدين كبر وبقى وكالة ثم مصنع وبقى المعلم عبد الغفور البرعي.

وقصة عبد الغفور بتقولك إن لو حتى مكنتش قدامك فرصة إنك تسافر تقدر تفكر إزاي إنك تدور على الشغل اللي أنت عايزه في بلدك.. حتى لو كان في مكان صغير مش كبير زي ما أنت كنت بتتمنى.. وإن أنت مسيرك تشتغل في مكان كبير بس أهم حاجة برضه يكون عندك أمل في إنك هتوصل ليه.. وفي طريقك لازم هيقابلك صعوبات بس أهم حاجة إنك تتعلم منها ومتخليهاش تأثر فيك زي ما حصل مع همام ومحمد وعبد الغفور.

دليلة

همام ومحمد وعبد الغفور كانوا بيدوروا على شغل.. أما "دليلة" في مسلسل "طريقي" كانت بتمتلك موهبة الغناء.. وكانت بتدور على طريق حد يكتشفها فيه ويظهر موهبتها للنور.. لكن زي ما إحنا شوفنا إن أي قصة كفاح لازم حد يقف قدام الشخص فيها واللي وقف هنا قصاد دليلة مش شخص غريب لأ ديه والدتها اللي كانت بتعذبها عشان تبطل تفكر في الغناء.

لكن ده موقفهاش عن حلمها في إن موهبتها توصل للنور.. وفعلًا وصلت وبقت مطربة مشهورة وغنت أغنية لسة "فيه أمل".. الأغنية ديه تعتبر إهداء لكل شخص عنده حلم إنه مسيره يتحقق طول ما عنده أمل.

هيما

أما "هيما" في فيلم "إسماعيلية رايح جاي" كان بيمتلك موهبة الغناء زي "دليلة".. راح لـ"عزت أبو عوف" اللي وقف معاه وساعده في إنه يحط رجله على أول طريق الشهرة.. لكن لما قال لوالده على اللي نفسه فيه وقف قدامه وعارضه.. لكنه أقنعه ووافق والده واتمناله الخير.. وفعلًا وصل وحقق حلمه وبقى مطرب مشهور.

نقدر نقول من قصة هيما إن زي ما هتقابلك صعاب مش هينفع تتحل.. هتقابلك برضه  صعاب ممكن تتحل زي ما "هيما" عرف يقنع والده اللي كان صعب اقناعه بالموضوع.

كمان نقدر نقول من قصة دليلة وهيما.. إن لو مكنش قدامك شغل متاح ممكن تكتشف موهبتك وتطورها وتبقى هي الشغل بتاعك اللي من خلاله بتحقق حلمك.

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»

ميكس ميديا