دلعي قطتك.. هنا دليلك للتعامل مع «مشمشة»
لو عايزة تشتري قطة بس معندكيش خبرة في تربيتها وعمالة تسألي نفسك هأكلها إيه؟ وياترى إيه الحاجات اللي بتضايقها؟ وإيه الحاجات اللي هتفرحها؟ متفكريش كتير لأن في الموضوع ده هنرسيكي على إجابة أسئلتك عن «مشمشة».
الأكل
لازم تعودي القطة إنها تاكل أي حاجة في البيت، ومفيش مانع من إنك تأكليها أكل مجفف اللي هو الـ Dry food مع أكل البيت بس متأكلهاش منه بصفة مستمرة لا هو ولا التونة لأن ده ممكن يسببلها مشاكل صحية تأثر عليها زي إن شعرها يقع.
الحمام
عودي القطة برضه على إنها تعمل حمام فين، وحطي ليها طبق فيه رمل في أي ركن أنتي شايفاه مناسب، ولو عملت حمام في مكان غير اللي أنتي محدداه هتشمميها الحمام اللي عملتوا في المكان الغلط وهتوريها المكان اللي أنتي حاطة فيه الطبق وعايزاها تعمل فيه.
الكلاب أوفياء إزاي؟.. شاهد الحقيقة في هذه الأفلام
بتتضايق من إيه
القطة بتتضايق من كذا حاجة، ومن الحاجات ديه إنك تسيبيها قاعدة وقت طويل لوحدها، أو إنك تطرديها برا أوضتك وتقفلي عليكي الباب، أو تقعديها من غير أكل أو شرب لوقت طويل، أو متلعبيش معاها، أو تخرجيها في الشارع لأنها من اللي بيخاف من دوشته.
وبتتضايق وبتتعصب كمان لو متجوزتش، وهتحسسك بده يعني على سبيل المثال لو كنتي خارجة في مكان كان فيه قطط وروحتي البيت هتجري عليكي لأنها شامة فيكي ريحة القطط اللي كانت في المكان حواليكي وهتقعد تتمسح في رجلك عشان تخليكي تاخدي بالك إنها حاسة بالوحدة ومحتاجة تتجوز.
ولو جوزتيها وأخدتي ولادها تبيعيهم لحد دي من الحاجات اللي ممكن تضايقها جدًا إنك تاخدي ولادها منها. وكمان فيه حاجة ممكن تضايقها لو مهتمتيش بشكلها كويس وهي قص ضوافرها اللي لازم تكوني واخدة بالك وأنتي بتعمليها.
ولازم تروحي لدكتور كويس عشان يعرف يتعامل معاها بشكل ميضيقهاش. وكمان الناس الغريبة اللي جايين بيتك ممكن يضايقوها فأنتي حاولي تقولي ليهم إنهم ميقربوش منها عشان متخربشهومش. وكمان بالنسبة للضيوف ابقي عرفيهم قبل ما يجوا إن فيه قطة عندك عشان فيه ناس بتخاف من القطط.
بتفرح لما
أما بقى الحاجات اللي بتفرحها فهى إنك تلعبي معاها، بس خلي بالك إنك تغطي الحاجات الموجودة في المكان اللي بتلعب فيه زي الكنبة والكرسي بقماشة ناشفة بحيث وهى بتلعب ضوافيرها متخربش الكنبة والكرسي، ومن الحاجات برضه اللي بتفرحها إنك تلعبي في شعرها، وتطبطبي عليها، ويكون ليها مكان مخصوص للنوم، اللي ممكن تعمليه ليها بطريقة مختلفة فيها بهجة كده زي إنك تزينيه مثلًا.
وكمان ممكن تعملي ليها لبس بشكل مختلف بمعنى أشمل تبهججي قطتك على طريقتك :) . والقطة بتفرح كمان لما تلعب مع قطة تانية بس بشرط إنك متفضليش قطة عليها عشان متحسش بالغيرة من ناحيتها.
