حبيبك محتاج دعم عشان يحقق حلمه.. خليكي وراه (مقال)

من زمان قالوا إن «وراء كل رجل عظيم امرأة»، وكل يوم واقع الحياة بيثبت المقولة دي من خلال قصص ناجحة كتير لرجالة كان السبب في نجاحها هو المرأة اللي فضلت واقفة معاه لغاية ما بقي رجل ناجح عظيم.

ومش بس الواقع، ده حتى الأعمال الفنية بتثبت لينا من وقت للتاني المقولة دي، يعني على سبيل المثال منقدرش ننسى فاطمة كشري اللي وقفت جنب عبد الغفور البرعي ودعمته لحد ما بقي «المعلم عبد الغفور البرعي».

ولا «هيلجا» اللي وقفت جنب النمر الأسود لحد ما بقى رجل أعمال كبير، ولا «رقية» اللي وقفت جنب «همام» لحد ما بقى صاحب أكبر سلسلة مطاعم باسمه. وغيرها وغيرها من النماذج.

ولو تحبي بقى تحققي المقولة دي وتدعمي حبيبك المرتبطة بيه في تحقيق طموحاته، هقولك على شوية حاجات كده تعمليها لأنك لو عملتيها هتضمني إن علاقة الحب بينكوا تكون قوية وده لأنه هيشوف فيكي إنك السند ليه وإنه مهما حصله هيلاقي حد بيدعمه ويقوله كمل أنا جنبك. وطبعًا ده كله هيخلي حبه ليكي يبقى قد الدنيا :)

وصلت الـ30 ومعملتش حاجة؟.. اقرأ الموضودع ده

الكلمة الحلوة

«متقلقش من حاجة كل شيء هيكون كويس.. أنت قدها وقدود.. أنا جنبك متخفش»، الكلام ده أو أي كلام حلو يطلع منك لما تقوليه هتدعميه نفسيًا وتخلي نفسه مفتوحة كدة على إنه يشتغل ويحقق حلمه، وده لأن الكلمة الحلوة دايمًا ليها مفعولها الإيجابي في نفس الواحد.

مشاركته في التفكير

لما يكون فيه حاجة شاغلاه شاركيه في التفكير فيها وحاولي على قد ما تقدري إنك تحلي معاه أي صعوبات تقابله لأن إحساسه إن فيه حد بيشاركه في نفس الحاجة اللي شاغلاه هيخلي التوتر بتاعه يقل ويرسى على بر في الشيء اللي شاغله.

هدية تحفيزية

كل لما يحقق إنجاز ما جيبي ليه هدية. لأن الهدية هتحفزه نفسيًا وهتخليه يكمل طريقه ومش شرط تكون هدية بمبلغ كبير لأ جيبي ليه أي هدية بالمبلغ المتاح معاكي. لأن الهدية هتفرق معاه نفسيًا.

لهذه الأسباب.. احترسي من غرفة تغيير الملابس في المحلات

الكلام عن النجاح

كلميه دايمًا عن قصص ناس كافحوا في الحياة واتعرضوا لصعوبات لكن على الرغم من كده وصلوا للي عايزينه، وبقوا من الناس العظيمة في مجالات مختلفة. لأن القصص دي هتخليه متأكد إن لسة فيه أمل إنه يوصل ويحقق حلمه.

ولما تعملي اللي اتكلمنا عنه ده هيوصل حبيبك لمكانة عظيمة وهيتقال عليه إن وراه امرأة عظيمة :)

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»

ميكس ميديا