قبل ما تشتري سلحفة.. 8 حاجات لازم تعرفها الأول
لو بتفكر تجيب سلحفة وتعيش روح المغامرة في التدوير عليها في كل ركن في الشقة ? بس مش عارف أنواعها وكمان هتتعامل معاها إزاي، هتلاقي في الموضوع على كل حاجة عنها.
اختيار السلحفة
لما تروح تشتري سلحفة هتلاقي سعرها بيبدأ من 75 جنيه، وفيه اللي سنها كبير واللي سنها صغير، والسلحفاة الأنسب اللي تجيبها هي اللي سنها من 4 لـ 6 شهور عشان هيكون حجمها مناسب.
هل تفسر الكلاب نبرة الكلام مثل البشر؟
الصحراوية والزراعية والمائية
السلحفة فيه منها اللي بتعيش في المية زي السمك كده، واللي اسمها السلحفاة المائية، وفيه اللي بتمشي على الأرض اللي فيه منها السلحفاة الصحراوية اللي جاية من الصحراء ومتعودة تاكل وتشرب قليل، وفي منها السلحفاة الزراعية اللي لونها مايل للأخضر اللي جاية من الأماكن اللي فيها زرع فمتعودة تاكل وتشرب وتتحرك كتير.
الصحراوية الأفضل
ومن تجارب الناس مع السلاحف فالسلحفاة الصحراوية هي الأحسن إنك تشتريها لأنها حركتها قليلة ومش بتشرب ولا بتاكل كتير، ولو سبتيها لظروف ما عندك من غير أكل ليوم واحد مثلًا مش هيحصل ليها حاجة فكدة هتوفر معاك في أكلها بعكس الزراعية.
أما المائية فمن تجارب الناس برضه بيكون ريحتها وحشة لما بتتحط في المية وبتكون صغيرة جدًا وليها أكل مخصوص زي السمك بعكس الصحراوية اللي منطلقة معاكي في البيت واللي هتقدري تحميها وتخليها نضيفة وريحتها كويسة وكمان هتأكليها من أكل البيت اللي هنقولك عليه دلوقت.
ظواهر وكائنات غريبة في المحيطات.. تعرف على 8 منها
الصحة والأكل
بالنسبة للصحة فلازم توديها للدكتور بحيث تتأكدي إنها معندهاش أي أمراض، أما بالنسبة للأكل فالسلحفة بتاكل خس وخيار بس لازم تقطعهم قطع صغيرة عشان تعرف تاكلهم وحطيهم في طبق ليها أو بليهم ليها عشان هي كمان بتشرب المية بتاعتهم عشان ساعات مبتشربش مية عادية بس ده ميمنعش إنك تحط ليها طبق تاني فيه مية.
طريقة الاستحمام
السلحفة بتستحمى كل أسبوع واللي هتعمله إنك هتجيب طبق وتحط فيه شامبو بس خلي بالك إنه ميجيش على عينيها وهتنضفها بفرشة السنان ولازم تنضفها من ناحية رجلها كويس عشان بتبقى مش نضيفة وبعد كدة نشفها بفوطة ولفها في منديل عشان تتطمن إنها نشفت كويس ومتاخدش برد.
الحمام بتاعها
الكلب والقطة لما تعودهم يعملوا فين حمام بيعموا فيه، لكن السلحفة الموضوع بيبقى صعب إنك تعودها تعمل حمام فين بس قدامك حل من اتنين: إما تحط مشمع على السجادة في الشقة بحيث متبوظهاش، أو إنك تخصص ليها مكان تقعد فيه زي أوضتك مثلًا وتحط برضه فيه مشمع على الأرض وتبقى من وقت للتاني هويها في الشقة بس هويها فعلًا ومتحبسهاش.
مود السلحفة
السلحفة بتنام كتير عامة، بتدخل جسمها جوا القوقعة وتنام فمتتخضش من ده وتفتكر إنها ماتت مثلًا، وفي الشتا هتلاقيها داخلة جوا نفسها كتير ودايمًا نايمة ومش بتاكل خالص عشان بتكون مخزنة أكل الصيف. وبالنسبة لسيرة الموت دي فمن خلال تجربة الناس مع السلحفة قالوا إنك لازم تخلي بالك إنها متتقلبش على ضهرها لأنها لو اتقلبت هتموت.
اللعب معاها
السلحفاة بتحب إنك تلعب في صوابعها وفي راسها بس براحة يعني :D. وكمان لما تختفي في الأماكن اللي مش باينة قوي في الشقة زي مثلًا تحت الكرسي العب معاها واجري دور عليها. وحاول تتابع حركتها وتشوف هى بتروح فين بحيث لو اختفت وملقتهاش يكون سهل عليك إنك تلاقيها.
