نفسك تصحى على عصافير بتزقزق؟.. يبقى تعمل كده

زقزقة العصافير دايمًا لما بنسمعها بنحس بإحساس جميل، ولو عايز تصحى على زقزقة العصافير وبتفكر تجيبها بس مش عارف هتتعامل معاها إزي، يبقى متقلقش خالص، في الموضوع ده هنديك زتونة التعامل معاها ? 

العصافير دي فيها أنواع كتير وأفضل نوع تشتريه كبداية ليك هو العصفور الأسترالي اللي بيكون سعره 125 جنيه، وفيه منه بـ150 جنيه، وطبعًا هتجيب عصفور وعصفورة مع بعض، وده نصيحة «عبد الله» من «مزرعة سامي» للحيوانات الأليفة.

ولو حصل إنك جبتهم وواحد فيهم مات لازم تجيب واحد تاني بسرعة مكانه عشان القديم ميموتش نتيجة لتأثره بإن العصفور اللي كان معاه في قفص واحد مات.

«عبد الله» بيقولك إن العصافير لازم تتحط جوا البيت وتختار مكان مخصص تحط القفص فيه زي مثلًا إنك تحطها على الترابيزة أو في مكان عالي بعيد عن الأطفال عشان الأطفال ميسببوش ليهم إزعاج.

ومينفعش برضه تتحط برا في البالكونة عشان هما ميقدروش يستحملوا حر الصيف أو برد الشتا فلما يقعدوا جوا البيت هيكون الجو معتدل بالنسبة ليهم لا حر قوي ولا ساقعة قوي، وكمان لما يقعدوا جوا البيت ده هيحميهم من إن الحداية تيجي تاكلهم في حالة إنهم كانوا برا في البالكونة.

خلي بالك

إنك تحطهم في مكان ميكونوش معرضين فيه لتكييف أو تيار هوا لأن ده ممكن يخليهم يتعبوا ويجلهم اسهال. وكمان تجيب حجر كالسيوم ونقط للبرد ورش عشان ميجيش ليهم حشرات. القفص

ولازم تتأكد إن القفص مقفول كويس عشان ميفتحوش القفص لأنهم بيعرفوا بمنقارهم إنهم يفتحوه، وجوه القفص اعملهم بيت خشب ورش فيه نشارة خشب عشان التكاثر.

علامات مرض العصفور

«عبد الله» بيقول إن فيه علامات كده لو شوفتها على العصفور هتعرف إنه تعبان ومحتاج توديه لدكتور وهي إن تلاقي التواليت بتاعه سايل مش ممسوك لأنه لو سايل معناها إنه مريض ولو ممسوك معناه إنه صحته كويسة. كمان إن تلاقيه نافش ريشه وكسلان.

أكله

العصفور بياكل بذور بتجيبها من المحل المختص، وجنب البذور بياكل خيار وخس وجرجير. ومع الأكل لازم تحط كل شوية مية في الطبق اللي موجود في القفص وتتأكد من وقت للتاني إنها مش خلصانة، وطبعًا لازم تنضف القفص كويس بتاعهم عشان منظره وهو مش نضيف بيضايقهم.

بيض العصفور

البيض اللي بيكون جوا البيت والأم قاعدة عليه خلي بالك إن لو قربت منه الأم ممكن تهجم عليك. وهى بتقعد مراقبة البيض لغاية ما الأطفال يكبرو شوية، وبعدين بيطلعوا لوحدهم.