رئيس التحرير أحمد متولي
 لو هتربي أسماك زينة.. شوف كتالوج التعامل معاها

لو هتربي أسماك زينة.. شوف كتالوج التعامل معاها

السمك من الكائنات الجميلة اللي ربنا خلق منها أشكال وألوان خلابة وعشان كده ناس كتير مننا بتحبها، ولو قررت خلاص إنك تشتري سمكة زينة تحطها جوا البيت عندك وتشوف جمالها ليل ونهار يبقى لازم تعرف الأول إزاي تعتني بيها، وده اللي هنعرفهولك في الموضوع ده.
في المحل  
لما تروح المحل وتشتري السمكة شوف إنت عايز تجيب سمكة واحدة مثلًا تحطها في بولة صغيرة ولا سمك تحطه في حوض كبير.
ولازم تعرف إن في انواع سمك لو عاشت لوحدها تموت وفي أنواع ماينفعش تعيش غير لوحدها عشان ممكن تاكل النوع التانى زى ال «fighter» فاسأل في المحل على الأنواع وشوف إنت عايز سمكتين ولا سمكة في بولة ولا حوض كبير مليان سمك.
ولو هتاخد بولة أو حوض كبير، اطلب إنك تاخد ماية معاها عشان تبدأ تملاها بيها لأنك مينفعش تحط ماية من الحنفية على طول في البولة لأن لازم الماية تكون مكررة ومركونة بقالها 48 ساعة يعني يومين عشان الكلور يروح منها. لأن الكلور بيموت السمكة وده على حسب ماقالنا عبد الله أحد العاملين في مزرعة سامي للحيوانات الأليفة.
تخزين المياه
نتيجة بحث الصور عن اسماك الزينة
«ميشيل» أحد العاملين في نفس المزرعة برضه بيقولك إن لازم تكون مخزن عندك أزايز ماية دايمًا بدون غطا وحططها في مكان مفيهوش غيرها يعني مش جمب صابون أو أي حاجة تانية. وده عشان تغير دايمًا للسمكة ماية.
تغيير
وبيكمل «ميشيل» إنك لما تيجي تغير الماية مش بترميها كلها وتملى ماية جديدة، لأن إنت بكدة بترمي العناصر المفيدة للسمكة اللي موجودة في الماية وبتغير البيئة اللي اتعودت عليها.. فاللي بتعمله إنك لو جبت بولة فإنت بتشيل بس مقدار كوباية ماية منها وترميها وبعدين تحط فيها مقدار كوباية ماية من اللي إنت ركنها وبعدين تحطها في البولة.
ولو جبت حوض كبير بتعمل نفس العملية بس بتشيل مقدار ربع كوباية من الحوض وترميها وبعدين تحط فيها مقدار ربع كوباية من اللي انت ركنها بعدين تحطها في الحوض.
الأكل
نتيجة بحث الصور عن أكل سمك الزينة
«عبد الله» بيقول إن أكل السمكة عبارة عن قشر أو حبوب بتجبهم من المحل وإنت بتشتري السمكة وأكلها لازم ميكونش كتير عشان ميسحبش الأكسجين من الماية ويعكرها ويموت السمكة.
وبيكمل «ميشيل» الكلام وبيقول إنك هتأكل السمكة مرة واحدة بس في اليوم وتثبت الميعاد اللي هتأكلها فيها. ولو جبت حبوب وجبت سمكة واحدة هتديها حباية واحدة ولو جبت سمكتين هتدي ديه حباية وديه حباية مش أكتر من كدة. ونفس السيناريو ده هتعمله لو جبت قشر.
خلي بالك 
وإنت بتأكلها ميكونش ايدك فيها ريحة صابون أو كريم أو برفيوم أو أي ريجة نفاذة لأن الروايح ديه بتسبب ضرر للسمك. كمان لما تيجي تغسل الحوض متغسلوش أبدًا بصابون.
وكمان خلي بالك من حاجة تانية وهى إن لو حصل ولقيت طفح على جلدها روح على طول للمحل وخد ليها علاج من هناك اسمه White Spot.

الكلاب أوفياء إزاي؟.. شاهد الحقيقة في هذه الأفلام

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»